مساء الخير اخواني واخواتي

حبيت اطرح موضوع مطفشني صار له اكثر من ثلاث شهور وهو مهور البنات

ليه مهورهم كذا غاليه ؟؟؟؟ قسم بالله الي بيتزوج يعني لازم دين وبهذله

والي اعرفه ان الواحد يتزوج عشان يرتاح مو عشان يركب نفسه ديون !!!!

قسم بالله الزواج صار هم !! والبنات يشتكون من العنوسه !!! احس البنات يستهبلون

مافي احد قالكم تزوجوا انسان شحاذعند بيبان المساجد . يعني انسان فيه بدايه حياته

وش تتوقعين يابنت الاجواد انه يملك رصيد مليون وقصر وسياره مرسدس الخ

هذا شي مستحيل لانه لساته متوظف ويادوبك بدا براتب خمسه الالف . يعني خلو فيه واقعيه شوي

الا انك بتتزوجين احد وارث من اهله اوشي لكن انسان طبيعي يعني خلص جامعه ويادوبك متوظف

له خمس سنين او ست سنين . من وين له المبالغ الطائله ذي . الشي هذا يخليك تفكر بالمغربيات

ياجماعه الخير قسم بالله عشرة الالف او عشرين الف ريال تزوج احسن بنت بالمغرب

وازيدك من الشعر بيت بعد تكون مبسوطه وفخوره فيك . حتى اذا جت للسعوديه ممكن تعيش معاك

بدور او شقه عادي . بس الي يقهر ان الواحد وده ببنت البلد مع احترامي للجنسيات الثانيه

السعوديه غير غير مليون مره بس غااااااااااالي مهرها وش نسوي يابنات نسرق يعني ؟

انا كمثال موظف ولسا ببدايه المشوار يعني ملايين ماعندي . اذا قدامي حل واحد الزواج من الخارج مع اني مو مقتنع . يكفيك ان السعوديه تفهمها وتفهمك وتعرف طباعك وانت تعرف طباعها يعني راح تفهمون بعض بسرعه فرق لما يكون فيه بنت لها ثقافه تختلف عنك

بس العين بصيره واليد قصيره . لذلك اخواني الشباب اذا بناتنا الله يستر عليهم

صمموا على استهبالهم ومهر الوحده فيهم قيمه فله . انصحكم بالمغرب بعده الاردن

لانهم حدا ما يشبهون السعوديات من ناحيه انهم بنات ناس معروفين وقبائل معروفه

واتركوا السعوديات لين يجيهم ابو ملاااايين يعني شايب تاجر ... يمين بالله احس اني منقهر

ودي اتزوج سعوديه وبنفس الوقت مهرها يقطع القلب يعني لازم اسلاف وديون

يعني صار هم مو زواج ؟؟؟


على العموم انا اسف بس هذا شي بنفسي وحبيت اقوله وافضفض عن نفسي

لا تزعلون يابنات السعوديه والله انتم غاليات على قلوبنا يكفي انكم بناتنا

لكن العين بصيره واليد قصيره

خفضوا مهوركم شوي

على هونك يا عم وش فيك معصب

اول شي البنت مالها ذنب بالمهر الا هي تبي الستر بس الاهل يتحكمون خاصه الاب

لاكن فيه عوايل تدور الستر لبناتها وماتتشرط وترضي بالقليل بس الشباب يتشرطون ويدورن ملكه جمال واخوانها مراكز عاليه وبنت فلان الفلاني اكيد بيتشرطون اهلها لاكن دور اسر طيبه ومتواضعه وبتلقي ناس تخاف الله وماتدور الطمع والفلوس والله يوفقك ويستر علي بنات المسلمين

[align=center]الله يوفقك ويرزقك البنت الحلال الي مهرها قليل ومناسب لك
اتمنى لك التوفيق من كل قلبي
[/align]

موفق بإذن الله ... لك مني أجمل تحية .

المهر من حق البنت عشان تتجهز وتسنع نفسها ...وصدقني المشكله مو بالمهر 40 او 50 الف سهله

المشكله بحفله الملكه وحفله الزواج والسفره والهدايا << هذا كله يجي ظعف المهر ..

الان فيه بالقصيم عووايل كثير وحنا منهم الغينا شي اسمه زواج ..صار الزواج عندنا استراحه للرجال فقط وكم ذبيحه وخلاص لان القاعه مع الطقاقات والبوفيه مكلف جدا ..خاصه للشاب اللي توه متوظف حفيان منتف ..

مدري كم طالبين منك هههه
من قال ان البنات يبون مليونير ي اخوي بنات الحلال
اللي يبن الستر وااجد والاهل اللي يشترون رجال وااجد بس انتم
احسنوا الاختيااااار هذا عمي الله يوفقه متزوج مهر زوجته ماتعدا٢٥الف
والذهب ع اهل الزوج يعني براحته لو مايجيب الا حديد والزواج بالبيت رجال
وكم وحدة من عماتي وبس ماشاء الله الله يوفقهم واحنا عموما مهورنا ماتتعدا ال٤٠
وفيها كل شي انا مدري وين غلا المهور اللي تتكلمون عنه وزواجاتنا بسيييطة اغلبها
عاائلي اذا طنخناااا حطينا فاستراحة ب٢٠٠٠ريال وحمدلله تساهيل بصراحة نسمع
بغلاء المهور بس ماحسيناه ولله الحمد الله يعينكم
بس هو موجود عند بعض القبايل اللي تتفاخر بكل شي الله يعينهم على انفسهم وربي
اعرف جيران جدتي ابو العروس متدين حول الثمانين الف عشان يبيض الوجه قدام ربعه
استغفر الله العظيم بس المشكله لو انسجن عشان هالدين محد دفعه عنه الله يعين
ويستر على بنات وشباب المسلمين

المهر عمره ماصار مشكله شكلك من اول ناوي تاخذ اجنبيه اوانت بنفسك مغربي وتبغى تسحب عيال السعوديه عندكم بالمغرب
فيه عوائل مهور بناتهم عشره الى عشرين الف ولو دورت كان لقيت بس انتم الشباب عندكم شروط ( تعجيزيه)

انت شكلك تبي مغربية او اردنية ؟؟

والاه الغريب انه المهر اللي تتكلم عنه هذا كم؟؟ مليووون؟
مافي عائلة تاخذ مهر اكثر من 40 الى 50 الا القبائل المتشددة اللي مازالت متمسكة بأن المهر يكون 100 الف ومافوق

انا تزوجت بـ 40 الف وزوجي عــــاطل بعد بس يشتغل اعمال حرة ع قدنا < فديت قلبه
والزواج اتفقنا يكون الحظور اهلي واهله فقطط
والرجال اخواني واخوانه وعيال العمومه
في استراحة ماكلفت الا 1500 ريال
وذبيحتين للرجال< ع زوجي
وبوفيه للنساء < علي انا

بالرغم انه من عاداتنا ان الزواج والمهر وشهر العسل والتأثيث كله ع العريس المسكين
بس انا كسرت القاااعدة لانه ماتعجبني كذا بلا عادات بلا تقاليد
في فترة الملكه قلت للهازبند .. اسمع ياولد الاجواد ..
زواج كبير وطقطقه واعزم ولد عم خال ابو جد جدي .. مااااابيه
ابي زواج هاديء بسيط وعااائلي ومختصر ..
رفض بالبداية بس مع اصراري .. اقتنع .. وحلف ماينساها لي لانه افتك من ديووون وضيقة صدر < فديت ئلبووو

والحمدلله عايشين ومبسوطين ربي يخليه لي ويخليني له

ع فكرة ترا بالقصيم اغلب العوائل هناك المهر فقط 40 ..
والزواج ع اهل البنت ..
خلك من المغربية والاردنية وخذ لك قصيمية تسوي لك كليجة حزة المغربية


لاتنسون .. اذكرو الله

5000 × 12 = 60 ألف × 5 سنوات = 300 ألف ريال

والمهور في السعودية عند الناس الفاهمة وهم الغالب والحمد لله ما تتخطى 70 ألف من مجاميعه !

300000 - 70 ألف = 230 ألف

30 ألف تستأجر قاعة ( أعرف أن كثير صار توجههم للزواج العائلي )

بـ 100 ألف تقدر تستأجر وتأثث بيت على قدك ( باعتبار أن باقي 200 ألف اشتريت فيهم سيارة + بعزئة ( وأنا كثرت هالمبلغ ))

= النتيجة النهائية زواج من زوجة تعرفها + راحة بال

اللي ناوي فشخرة وفندق و....... المظاهر هذا هو اللي يشكي من المهور

واللي وده يتزوج أجنبية ( الله يسهل عليه ) هو اللي يشكي من المهور

واللي طبيعة عائلته ارتفاع مهور بناتها عليه أن يحارب هالشيء ويبدأ بأخواته !

الخلاصة مو الكل لهم نفس الوضع اللي تعاني منه

الله يسهل عليك