السلام عليكم
كيف الحال جميعا ان شاء الله تكونو بخير وسعاده

عندي استفسار بسيط ياليت الي عنده خبره او علم يفيدني واكون شاكره


سويت مقابله في بنك البلاد قبل 3 اسابيع تقريبا
ودقو علي يوم الاربعاء الي فات قالو السبت فيه مقابله مع مديره قسم الموارد البشريه سالت الي دقت على اساس اي وظيفه تكلميني قالت بعد المقابله على حسب المقابله وتوفر الشواغر نشوف

ابي اعرف ليه مقابلتين ؟ وهل المقابله الثانيه معناها انه فيه وظيفه او بس ينقحون الي قدمو ؟

وغير كذا بالمقابله الاولى قالت لي عن شي اسمه تارقت واني ملزومه اجيب للبنك كل شهر تقريبا مليون واجيب لهم عملاء من قرايبي او معارفي واذا ماوصلت لتارقت هذا ينزلوني تسويق
ابي احد يفهمني هالنقطه


مشكورين يعطيكم الف عافيه

وعليكم السلام والرحمه

اختي الفاضلة

ابعدي عن اي شيء فيه تارقت

لان التارقت يعتب الواحد وهم يشيله معه

وهذي مشكلة بعض البنوك!

حاولي تشوفين وظيفة غيرها بالبنك او قدمي على بنوك ثانية مثل الانماء والراجحي

التارقت هذا حد معين لازم تجيبين فيه عملاء بالشهر مثلا

وهذا الشيء مررره متعب وهم على الواحد


يعني ما تتهنين بدوامك ولا بإجازتك الاسبوعية من هذا الهم وانتي تدورين

مساء الخير عذوبه

حتى أنا برضو عندي مقابلة مع بنك البلاد السبت وراح تكون مع مديرة الموارد البشرية مثل ما تفضلتي
أنا سألت اللي كلمتني اذا فيه شواغر حالياً قالت لا بس قريب راح يكون فيه شواغر ، اتوقع راح يتوسع البنك هالسنة ويفتتحون فروع كثيرة.
بالنسبة لاستفسارك عن التارقت حتى أنا قالت لي هالكلام بالمقابلة الاولى بس ما أدري ليه ما أخذت كلامها على محمل الجد !
يعني مو معقولة بتطلعني تسويق ميداني اذا ما حققت التارقت لانه اللي اعرفه اغلب موظفين البنوك ما يحققونه على كذا ماراح يبقى احد بالفرع !!
بصراحة أنا متفائلة وبنفس الوقت حابة اعرف ليه طلبوني لمقابلة ثانية !
والله يوفقني وإياك والجميع ان شاء الله ونكون زميلات عمل

اهلين عذوبه
بصراحة هذا ظلم اذا فعلاً ينزلون موظفين خدمة العملاء للتسويق اذا ماحققوا التارقت !!
الحركة هذي تأثر بالأمان الوظيفي وتسبب تسرب عدد كبير من الموظفين من البنك من وجهة نظري..
وبالنسبة لي أنا تخصصي لغة انجليزية وعندي دورات في الحاسب والإدارة وانتي ايش تخصصك ؟

^

لا تيأسين من اولها و ماتروحين المقابلة لسا ما شفتي خير الوظيفة من شرها

الان اغلب البنوك صارت مثل البنك الاهلي موظف خدمة العملاء هو نفسه للمبيعات

ما عدا بنك الراجحي في موظفة لخدمة العملاء و موظفة مبيعات منفصلات عن بعض


بعدين فكري بإيجابيه ليه في موظفات بالبنك قدروا يحققون التارقت وش ناقصك انتي عنهم

و بالنسبة للتسويق الميداني اسألي عنه كيف يتم اذا ما حققتي

هل في تنسيق معين بالفرع بحيث انك تطلعين انتي وواحدة من زميلاتك في فترة الدوام و ترجعون للفرع ؟

اسألي كمان عن الاماكن المستهدفة من قبل البنك يعني مدارس او مستشفيات؟

هل في فترة الدوام راح يتم و لا بعد الدوام >> السؤال هذا جداً مهم


عموما الميداني اخر حلول اذا ما قدرتي تحققين نتائج من خلال الفرع او التلفون

والمقابلة راح تبين لك كل شي لكن اكتبي تساؤلاتك و رتبيها في عقلك و اسألي عنها لانه من حقك


موفقه يارب و تفائلي الله يخليك