مساكم الله بالخير

اليوم ماعندي مشروع بس عندي سالفه بقولها لكم للفائده فقط


انا من طبعي الصراحه يعني مابقولكم ناس اعرفهم لا بقولكم الحقيقه


انا لي اخت من امي واكبر مني بواجد

المهم زمان وانا باقي ماانولدت تقدم لاختي واحد بس مو من قرايبها وكانت متردده تقبل او لا وكله عشان ايش؟؟؟

عشان الولد تقدم لعدة بنات ورفضو بحجه انه مو من مستواهم

السبب لان الولد يتيم وكان يعشق التجارة بس ظروفه صعبه وزمان كانت المواصلات قليله جدا

ايش سوى؟

شرى له حمار اكرمكم الله وبدى يتجول في انحاء المناطق ولما تقدم لها ماكان عنده شي الا مبلغ بسيييييييط جدا

امي كانت موفقه وتحاول تقنعها

قالت لها اختي ..يمه تبين اخذه وماعنده الا حمار؟

قالت امي يمكن ربي يجيب الرزق على ايدك ودخلتك تكون خير عليه .بعدين الولد دين واخلاقه ماشاء الله


المهم اختى اخيرا وافقت وتزوجت الرجال

تدرون الحين عيالهم كلهم متزوجين

والرجال ماشاء الله تبارك الله عيني عليه باردة عنده محطات ومطاعم ومغاسل وشاحنات وكم سوبر ماركت يعني بتاع كله

شفتو كيف البداه تكون بسيطه بس مع الاصرار والعزيمه الانسان ينجح؟

هذي الحكايه ابي الكل يستفيد منها واولكم انا


دمتم بود