[align=center]

.
.
.
.
.


السلام عليكم ورحمة الله وبركاته



.
.
.
بدايةً ماكتبت هذا الموضوع الا للي أشوفه من مواضيع ملئت صفحات المنتدى حتى صارت بالصفحة الوحدة بدل الموضوع 3 من نفس الشاكلة .. وحزت في نفسي ان اشوفها كذا ورب البيت .. الآن ياشاب يامتعافي يامن ملكت كنوز مهمة جداً .. ملكت عنفوان الشباب وملكت فراغ من الوقت كبير جداً والاهم ملكت الصحة والعافية .. لله الحمد والشكر اولاً واخيراً على كل هذه النعم لكن لييييييش تهدرها ع الفاضي ؟؟ وشوله تسلم لحيك لغيرك ؟؟ اللي يقول يبي يشتري سيارة ويأجرها للغير سعودي والأدهى البعض يقول يبي يملكها تأجير منتهي بتمليك او تقسيط عشان يعطيها الأجنبي يكد عليها ويرمي له المقسوم نهاية الشهر .. بالله هذا منطق ؟؟ اللي يقول يبي يفتح محل بحر ماله لأن الأجنبي طلب منه يفتحه له وبيرمي له فضلة الدخل نهاية الشهر .. بالله هذا منطق ؟؟ شفت اكثر من اعلان لشبابنا في مواقع عن تأجير اسمائهم لأجانب مقابل مبلغ ايجار مقطوع شهري او سنوي .. بالله هذا منطق ؟؟[/align][align=center]
ما ابي اعيد لكم الإسطوانة اللي المفروض كل شاب يفكر هالتفكير يكون حافظها .. ان الأجنبي يجي بحال اسوء مني ومنك ويبني نفسه .. مافي احد يغمض عين ويفتح عين يلقى قدامه اموال مكدسة .. مافي شئ يجي بالهون ولا كان الجميع قعدوا في بيوتهم وقفلوا ابوابهم واكتفوا .. وكان هالاجنبي بجلالة قدره ماجاك لبلدك وتغرب .. البلى ان هالأجنبي يجمع القرش ورا القرش من تعبه وكده عشان يلقى له واحد (.....) ما ابي اقول كلمة تجرح او تزعل .. لكن خلنا نقول واحد مغشى عليه يقبل بفضلة هالاجنبي عليه كل شهر .. ويزيد هالأجنبي بناء في نفسه وولدنا يزيد في التطلب من هالاجنبي مبالغ وصدقات ..
الحين الشاب اللي الله معطيه الصحة والعافية والفراغ بدل مايقول ابي اطلع سيارة اكد عليها بنفسي واتحرك ويرزقني الله .. بدل مايقول ابي افتح محل واجلس فيه ويرزقني الله .. يختار المخرج الأول ويزيد في راحته .. بدل مايشكر هالنعم بالسعي واستخدامها في اللي ينفعه لا يطاوع النفس ويختار الراحة .. ليش ؟؟ بتلقى لك بدل العذر مليون عذر لكن بذمتي مامنها شي يكسر مجاديف الرجال .. لاتقول لوبي ويحاربوني ولاتقول ماحد بيناظرني ويكسبني لاني سعودي ولاتقول عيبة وقلة قيمة .. اولها وثانيها الرزق بيد الله ماهو بيد مخاليقه .. ثالثها اللي يشوفونه الناس عيبة (كانوا) بالأصح يشوفونه عيبة .. لامن سويته ضرره اقل عليك من انك تقعد وتناظر هالناس .. ولو احتجت هللة ماحد منهم ناظر وجهك ..
ياخي قم تحرك وشوف لك شغلة .. الأجانب يقولون بلدكم مليانة فلوس في الهوا طايرة وفي الشوارع طايحة لكنكم كسالى ماتبون تنحنون لها ولا تطمرون لها .. وش اللي خلاهم يقولون هالكلام عنا ؟؟ وش اللي خلاهم ينظرون هالنظرة لنا ؟؟ غير التبطح والكسل ؟؟ غير الاعتماد عليهم ؟؟ غير ترك الخيط والمخيط لهم والرضى بالقليل ؟؟ العرب تقول إن ماقدرت تخطف البعير اخطف سنامه وشبابنا الحين للأسف حتى ذنبه ماقدروه ولا لحقوه ..
اذا انت تشوف نفسك رجال من صلب رجال .. اذا انت تشوف انك كفو وقرم .. من الصباح قم ياخي لاتدور وظيفة ولا تدور غيرها .. ابدأ من اي شيء عشان تكون شيء وتكبر مع الايام .. لاتستحقر الريال وجمعه فوق اخوانه لين تصير هالريالات الوف وهي اللي بتجيب اخوانها وتصير اكثر واكثر .. لكن لها ثمن لابد تدفعه .. لابد تدفع التعب والجهد .. وكل غالي وله ثمنه .. وكل غالي ثمنه فيه .. وهذي هي الغالية اللي بتغنيك عن كل احتياجاتك ..
لاتحط لك اعذار .. لاتقول لوبي وبيحاربوني وبيغلبوني .. لعنبوهم الدار دار ابونا وجدنا والغرب يحاربونا لا وبعد يغلبونا ؟؟ لاتترك لهم مساحة يتنفسون فيها وبتقدر تغلبهم .. وهم اللي بيجونك يتمسحون بك ويطلبون رضاك لامن غلبتهم لكن قوو عزمك وقلبك واصرارك وبتقدر عليهم ان شاء الله ..
لاتقول مافيه سيولة ولا دعم ولا راس مال .. انت كون هالمال وابدا منه .. لاتنتظر احد يمد لك يده لا فرد ولا حكومة .. انت اسعى وانت ضبط امورك بالهداوة وبالحرص ..
لاتقول مافيه افكار ولا مشاريع .. لو تبسط بشاهي وحليب وقهوة بيجيك رزقك .. ولو تبيع قطع غيار طيارات هم بعد بيجيك رزقك .. وكلها هذي افكار ومشاريع بسيطة كانت او كايدة ..
ياخوك ماتعرف ان اللي يسلم لحيه للرجال يهبلون به ؟؟ ماتعرف ان لحيك اغلى ماعندك والواجب ماتسلمه لاحد من ماكان ؟؟ مابالك يوم تسلمه لغريب عنك لايحشم ولايقدر ولا له بسلومك ولا علومك ؟؟ والله لو يلبس بدل الطيبة ملائكية .. صاحي انت يوم تسلمه ؟؟ تسلمه اسمك وسمعتك ؟؟ تسلمه حر مالك وحلالك ؟؟ تسلمه .. لا .. تبيعه كل ذا عشان كم قرش نهاية الشهر ؟؟ ياخي الطفيليات ماتعيش الا على غيرها .. نفس الحال معهم .. ان قفلنا كلنا عليهم الابواب واهتمينا في انفسنا ومشاريعنا وقبل هذا كله بلدنا والله ليرجعون مثل ماكانوا الواحد مايقدر يقول لك أأجر لي ولا ما اشتغل .. افتح لي محل واديره لك .. وغيرها من اسطواناتهم الكريهة ..
اعتذر ان كان كلامي يضايق او يكدر .. لكن والله اني متكدر بدل المرة الف مرة كل مافتحت صفحة المنتدى وكل ماشفت هالمواضيع تزيد وتزيد وتزيد ..
واللي يقهرني زود ان كل هالافعال تقوي شوكتهم وتزيد من تكاتفهم وتعاونهم وعنصريتهم ومحاربتهم لنا .. قد شفتوا احد يبيع رزقه لعدوه ؟؟ صارت وللأسف عندنا ..
اسف ان كان في الموضوع ركاكة او عدم ترتيب لكن الزعل والنوم مشكل إن اجتمعوا ..
في امان الله
[/align]

جزاك الله خير

بارك اللة فيك واللة يعطيك العافية

ياشيخ روح الله يفتح عليك من واسع فضله
والله العظيم كلامك يشرح الصدر وتخلي الواحد يقدر يقول الدنيا لسا بخير
ياخي والله الأجانب يهمشون من خيرات بلدنا وحنا ساكتين وقاعدين نطالع ومبققين عيوننا
الغرابي بالرياض كلهم اجانب ومحصلين خير .. والبطحاء اجانب ومحصلين خير بس ماندري عنهم ,,, هماهك يالسعودي لارحت تشوفهم ولا ملابسهم مقطعه ووصخه تحسب انهم فقرا ولا ماشافوا خير ,,, خلك من ذا كله وشف ارصدتة اذا ماكانت بمئات الألوف احلق شنبي ياشيخ

الله يعطيك الف عافيه ياخوك ووالله لو نص تفكير شبابنا مثل تفكيرك كان غدينا بخير بس مين بس مين يسمع

جزاك الله خير وفعلا كلامك صحيح انا عن نفسي بعد الاتحاد الخليجي ما بخلي وزارة ولا مكان بقطر والامارات الا قدمت عليها هناك اقدر اشتغل على راحتي لكن بدولتنا الحبيبة سعودي ما يمديك يا حبيبي الاجانب لاعبين فينا لعب واحد من اخوياي توه جاي من استراليا كان مبتعث وطبعا ما حصل وظيفة المهم ابوه عطاه مبلغ يفتح له مشروع لين تجيه وظيفة يشتغل ويسترزق الله فيها وما قصر فتح له محل الكترونيات لان تخصصه الكترونيات جيرانه كلهم اجانب ما تركوه بحاله طفشوه اخرها اخذ قرض حقت دعم المشاريع الصغيرة وعطى المحل كامل مكمل لاجنبي وهو راح توظف بوظيفة اقل من طموحاته ومستواه العلمي وفلوس القرض اخذهم وواشترى قطعه ارض وجلس

جزاك الله خير والله العظيم كلامك يشرح الصدر
شـكرا لك وبارك الله فيك... لك مني أجمل تحية .

والله ان كلامك بلسم لو تحطه على الجرح يبرا . بس من يسمع للاسف ان العقليات عندنا بين شيابيه مصديه عليها غبار البداوه وبين عقليات طائشه همها كيف تعيش اليوم وتفخفخ لو بالدين . اللي يقهرني اني كل مانصحت احد من جماعتي يقلي انت وش سويت . حتى اخواني يوم اقولهم ادرسو يقولون معك جامعه وللحين ماتوظفت كان الرزق مايجي الا بالوظيفه
خلها على اللـــــــــــــــــــــــــــــــــــه وكفى.

يسلم راسك والله

وربي كلامك درر ياليت الشباب يفهمون ويطبقون

ربي يسعدك ويجزاك خيير

احسنت

واحلى تقييم

تحياتي لك

[align=center]
جزاك الله خيراً
[/align]