السلام عليكم
حبيت اخذ مشورتكم انا تخرجت من الجامعة قبل سنتين طبعا حطيت امل اني بتوظف على طول وانا في الرياض واهلي في الديرة و ابوي شايب كبير وعندي اخوان لكن اعتماد الشايب بعد الله علي في امورة فترة ما كنت ادرس بالجامعة كان الشايب الله يحفظه ينتظر متى بس الاربعاء يجي واخلص اشغاله اللي يبيها اخواني طبعا متزوجين وكل واحد في ديرة وابوي خايف اروح مثلهم فعشان اطمنه اني ماراح اخليه قررت اخطب بنت تقرب لي بالديرة وفعلا خطبت هذا طبعا بعد تخرجي من الجامعة بشهور والملكة ان شاء في شهر 7 طبعا اهل البنت وافقوا لكن احيانا افكر ليه سويت كذا يمكن تسرعت وانا بعد ماتوظفت و احيانا اقول ابي ابوي يرتاح وانتظر التعيين اللي ماندري عنه متى يجي حالتي حاله لكن فكرت لو عملت لي مشروع ضغير بحيث انه يكون دخل لي اذا ماتوظفت هل ممكن اني اقدر بهذا المشروع البي متطلبات البيت او لازم يكون عندي دخل ثابت لان المشروع يوم كسبان ويوم خسران مو مثل الدخل الثابت

أول شي أنا أهنيك على برك بالوالد وعسى ربي يجزيك كل خير ويرزقك بالوظيفه اللي

تبيها وبعدين لو المشروع حلو ومربح بنسبه كبيره توكل على الله العالم زمان ماكانوآ

يعرفون دخل ثآبت يشتغلون بالتجاره ولو بشئ بسيط ومنهم صآروآ من أكبر التجار

وعسى الله يرزقك من واسع فضله

اخوي الفاضل اهنيك على برك بوالدك وحابه اقولك دعوه من والدك بتوفقك في حياتك ولاتنسى انك بتتزوج يعني مسؤؤليه علشان كذا فكر وشوف المشروع الي يحقق لك الدخل المناسب وقدم بالشركات بالرياض ويمكن امورك تزين وتاخذ اهلك معاك والله يوفقك ويكتب لك الخير.

انا اقول لو تقدم على مدرسة أهليه مؤقت الى ان ياتيك التعيين الرسمي .. الله يحفظك