السلام عليكم ...ظهر الخير.....!

آنساتي سادتي ...تغديت وفي كلام يقرقع بداخلي ودي أقوله وأنا ارتشف القليل من البيبسي وحبيت ألخص كلامي في محاضره بعنوان (إلـــــــى مـــــــتــى؟) **الجزء الأول** الرجاء الإنصات والإصغاء والإستماع والتركيز علماً أنه سوف يتم توزيع عدد 1كروسون سفن ديز + و1عصير ربيع برتقال + و1مويه صحه أم نص ريال على الحاضرين المستميع أما المزعجين والملاقيف والله مايذوقون الوجبه....
------------------------------------------------------------------------------------------------
المهم ندخل في بطن الموضوع... العطاله وما أدراكم ما العطاله.... والمشكله عطاله وفضاوه
ودنا نشتغل باللي يسمونه تجاره لكن وين خشم المال أقصد راااس الماااااال طيب بتقولولي قرررض طيب لازم تسدد كل شهر مبلغاً من المال.. طيب دام اني عاطل باطل من وين أهلي أسددلك كل شهر مع العلم اذا تبغى المشروع أو المحل اللي بتفتحه يمشي لازم ماتاخذ ولا ريال منه لمدة سنة كامله يعني أي مكسب ترجعه في المحل وتحاول تطوره إلين يوقف المحل او المشروع على رجله(((ياخوفي لاوقف على رجله يروح عني ويتركني))) هذا على كلام التجار ...
يعني (((إلــــــــــــــى مــــــــــتى))) نجلس ندور على رأســــ مـــــال؟
فيه رأس مال.....:
1ـ تكد ليل ونهار لين تجمع المبلغ اللي حاطه براسك وبكذا وصل عمرك 60 وانت لسه تكد على سيارتك وماجمعت نص الراس حق المال
2 ـ أو انك تاخذ قرض ويسحبون فيك في الحقوق المدنيه.
3 ـ أو انك تقدم على رياده ولا باب رزق جميل وغني يا ليييييييييييييييييييييييل ما طولك وتطيح سنونك والقرض لسه ماجا في الطريق مبنشر عند الإشاره
هذا غير تحطيم الأقارب تقولهم بدخل مشروع يقولون لا وتخسر وماينفع لازم يكون عندك مبلغ زايد عن حاجتك يعني بالعربي مستغني عنه ..فاهمهم تدرون ليش يقولون كذا عشان لا خسرت يقولون انت اللي سمعت كلام راسك ..(أول مره أدري إنه الكلام من الراس اخبره من الفم) يلا مافي مشكله مافي شي يدوم على حاله ويتركونك وينحاشون على شان لا يدبسون بديونك ويسددون عنك
لايجيني واحد يقول انت وانت وانت هذا راح أحرمه من الوجبه وأخليه طول المحاضرة واقف بدون كرسي
(((ياخوفي يطب علينا الأخ عبدالله المفلح ولا عالم القهوة ويصكوووني بباند محترم ولا يهونون باقي المشرفين))) لكن اعذروني فضفضة فضااااوة .

((إلـــــــــى مــــــــتـــى؟)) كنا نسمع بعنوسة البنات ....صح!!
الحين في حاجه اسمها عنوسة الشباب ======> انتظروني في المحاااااضره القادمه

مع فـــــضـــــفـــضـــــــة فــــــضــــــــاوة
اللي مؤيد لكلامي ....يحط كذا >>
واللي مو مؤيد (يعني خالد ولا محمد) يحط كذا >>

معك حق مااقول لا


بس انت رجل يعني بالغالب املك سيارة اشتغل مع الحريم الي يبيعون وصر مندوب توصل طلباتهم كل مشوار بثلاثين كحل مبدئي للعطالة


اشتغل كاشير ببندة ولاجيان رواتبهنم ثلاث الاف اصرفف الف وخل الفين لندة سنة وابتدي بمشروع صغيييير وتكبرة باذن الله


مافي. شي بالساهل ولا اقولك مثاليات بس لازم تسعى

السلام عليكم ورحمة الله وبركاته
اخوي عندي مداخلة بسيطة قبل اعطيك رايي >>الشباب في هالمنتدى يافوق ياتحت كيف انا اقولك
الاول متفائل بزيادة يجيك يطرح فكرة مشروع ويقول هذا ذهب هذا شهريا كذا في سنة كذا وعاد انت اضربها في كذا وما ادري ايش ولما تجي للواقع يادوب يجي نصف الحسسابات صح >>يقولون كلام العاقل يطيح نصفه هذا وهو عاقل
الثاني يمكن بس مر مرور الكرام على سوق الخضار وقال حاربوني الاجانب والا في راسه فكرة يبغى خبط لزق ينفذها وجالس ينتظر تمويل وما ادري ايش
انا بقولك طريقة ليش ماتشتغل كاشير في سوق السدحان او الهايبر او اي سوق كبير رواتبهم من 2800 الى 3200 تشتغل كم شهر يالاخو وتجمع لك مبلغ او تقترض من اي ممول براتب وظيفتك وتبدا مشروعك ولا تترك شغلة الكاشير حتى تضمن مشروعك بعدها تنتقل لادارة مشروعك الخاص وتسدد عن طريقه
اقل شي تسويه اذا انت خواف تشتري فان هونداي موديل 2000 نظيف وتنقل معلمات او موظفات او طالبات جامعيات هذا في النهار وفي الليل تشتغل كاشير حتى تزين امورك وتسدد مبلغك وتتفرغ لباصك
والخير كثير
تحرك بس

و عليكم السلام رحمة الله و بركاته


بالعافيه الغدى ..

حتى تنجح في آي مشروع ..
حط في بالك هالنقآط

* الصبر ..
لآنك مستحيل تنجح من آول مره إلا إذا معك من يسآندك آو خبير تستشيره < وهذا مستبعد ..

* كتمآن الآمور ..
الكثير و للآسف .. بس يحآول يحبطك و يكسر مجاديفك ..
آنا عن نفسي عآنيت من هالشغله
لكن الحمد لله ثقتي بذآتي كآنت كفيله بنجآحي ..

* القرآءه و الآستمآع ل تجآرب الآخرين ..
عندك هالمنتدى كفيل بأن يعلمك كورس كآمل في مجال التجآره ..
كل الآقسام مفيده لك بلا إستثناء ..

* إبحث عن الفرصه النآجحه ..
آنا آشوف من كلامك قآعد تعتمد على باب رزق و باقي هالشله ..
ياليييييل ..
لو الكل مثلك .. ماحد نجح ..
آبدآء ب أي عمل ينآسبك .. آنت شاب و آكيد بتلقى .. و الآخ عمر شقراء ذكر لكـ تفآصيل مفيده ..


مآ فيه شي يجي بدون تعب و جهد و .. فشل ..
المهم تتعلم درس من كل فشل يصير لك ..


و سلامتك

قدم على برنامج ريادة وخلال ثلاثة أشهر أو بالكثير أربعة أشهر والقرض بحسابك

**
عندي مداخله بسيطه..وبعدها ..سو اللي تبي ..فقع وجهي بالعصا اللي معك خخخ

لكن ياخي الكريم..اكتشفت انا نحن من اسس العطاله..
نبغى كل شي تحت ايدينا..بدون تعب ولا مشقه..

العطاله موجوده في رؤسنا فقط.. الواحد لو يشغل مخه شويتين يطلع بافكار رهيبه..حتى ولو كانت افكار بسيطه وغريبه او غبيه..
انت حاولت وفكرت..وهذا شي طيب.

الفرص في البلد هذي ملياانه..
مافيها شي لو اشتغلت في ورشه براتب 1500 ريال..
مافيها شي لو اشتغلت محاسب في محل ب 1000 ريال..
اهم شي انك حاولت اهم شي انك قررت ..
وتقدر من 1500 او 1000 تبداء تجارتك..
تقولي كيف وانا ما املك راس المال للمشروع..
انا اقول تقدر ..تعم تقدر وتقدر بعد.. لكن شويه بحث ماراح تتبعك..

بالصدفه في احد المطاعم قابلت شخص ماشاء الله له سمعته ومكانته..وعنده شركات في الكويت والسعوديه ..

وسألته سؤال صريح ..عن بدايته في التجاره ..لاعتقادي انه ورثها..

قال انا بديت براس مال 300 ريال قبل 20 سنه..
وكانت هي انطلاقتي بعد فشل 4 مرات.. وضياع 4 سنوات من المشاريع الغير مناسبه....

يقول انا ماني نادم على 4 سنوات اللي ضاعت ..ولا على الافكار اللي طارت معها..
انا نادم على الاسبوعين اللي ضيعتها في البكاء واليأس اللي عشته فيها..
...................

يوجد داخل كل شخص فينا...شخص اخر يعين على المماطله والكسل والتسويف..
هذا هو الشخص اللي يستحق المحاربه..لانه ان قدر عليك..ندبت حظك ..وان قدرت عليه..عشت مبسوط..


وياخي مو شرط تقول لاي شخص تقابله فكرتك او مشروعك..
الناس تفكيرها مختلف..
انت المشروع اللي تشوفه ناجح..هم يشوفونه فاشل

اي مشروع في بالك لاتستعجل عليه..سويله دراسه شامله من والى.... حتى لو تاخذ فيها اشهر.اهم شي انك عرفت كيف تبداء بدايه صحيحه.

حتى التسويق لمشروعك خليه من اولالويات..لان التسويق الشي الوحيد اللي يبداء قبل المشروع وماينتهي ابدا...

كل خطوه تبداها احسب لها الف حساب..


والتوفيق من الله سبحانه وتعالى..



**** ملاحظه بسيطه ****

اغلب القصص اللي سمعتها عن التجار الناجحين سؤاء عندنا واو في الغرب..
كان بينهم عامل مشترك واحد فقط..


((الصدقه)) التجاره مع الله..
حتى اليهود والنصارى وان لم يأمنو بذلك لكن الشي هذا موجود عندهم..واقرب الامثله..ابحث عن الجمعيات الخيريه والكنائس في امريكا ..من يمولها..؟؟ الغالبيه العظمى من التجار باذخي الثراء..


اسأل الله لك التوفيق في حياتك..وتذكر (( ان مع كل عسر يسر )) باذن الله تعالى..

الحين تقدر ترفع فيني الين ماتطفش..

والله وانا اخوك خلك صادق مع الله وابتهل الى الله وسوي اللي تقدر عليه تلقى التوفيق حليفك

صدقني الله اعلم بالناس من حالك ونفسك والاهل والاقارب والاصحاب لو بيفيدك ماراح تلقى العون التام الا من الله تعالى

احتمال مايكون الحظ حليفك من اول مره بس اصبر واعزم الرجوع الى الله وتصدق لو بريال

يمكن دعوة خالصة من مسكين او شخص قريب من الله سبب في سعادتك

واانا اخوك العالم طقة الثلاثين ولسا ماتجزوجوا والناس مو مزوجين بنتهم لاي احد

واللي يقهر اكثر من كذة لمن تتعب وتتعنى وماتلقى بنت الناس اللي تقدر اهتمامك وتعبك

يعني تتزوج بتزيد المصاريف والالتزامات واغلب الحريم مايقدرون

الله يرزقنا ويرزقك باللي يسرك ويطيب خاطرك ويسعدك

ادري كلامي مو مرتب بس وش حيلتنا نفضفض خخخخخخخ

الله يوفقكم ويجزاكم خير ..

صح انك من بدايتها طردتنا يامعشر البنات الحلوات القميلات بس داخلين داخلين الله لايعوق بشر

ماعلينا ندخل بالمهم

ياعزيزي اغلب كلامك صح ماقلنا شي بس يااخي الكريم مافي شي يجي بالساهل الا ويروح مثل ماجاء

عمرنا ماسمعنا بشخص نجح وكون ثروه وهو حاط رجل على رجل الا اولاد الامراء والملوك والبشوات على قولتهم

اما انا وانت والسامعين محنا حولهم

وربي الفرص كثيرة خاصه لكم يالشباب اكثر مننا يابنات بس انتو واعذروني عالكلمه ماتحبون التعب تبون اللقمه تجي بفمكم وانتي متكيين >>>اقولكم تبطون عظم ياحبايبي هع

اغلب الشعب السعودي والخليجي يبي مكتب وكرسي دوار ومكيف مركزي ومايبي احد يقوله نص كلمه

حتى الرواتب ماتعجبكم 2000كخه موحلوة 3000بعد وعه موحلوه نبي 10000وين يابو الشباب اتعب بالاول بعدين تشرط

الاجانب اغتنو من ظهوركم وانتو ترددون هالوظيفه مو مناسبه لطموحاتي

مع احترامي للكل بس بجد وش فيها لو اشتغلت بورشه؟عيب والا حرام؟

اعرف واحده من صديقاتي زوجها حط ولده الكبير 18سنه في محل قطع غيار لواحد يمني يعرفه والكل انتقده وقالو حطه في ورشه فشلنا وفشل الولد

الولد بالبدايه ماحب الشغله بس قبل مجامله لابوة والحين توه له3شهور راتبه قرب يصير 3000 ويقول والله الشغله حلوة ومريحه وراتبي يزيد وصار عنده طموح يفتح له محل بالمستقبل ..امه الحين مستانسه تقول انه مبسوط شرى لاب توب جديد وجوال جديد يعني الحياة حلوة وفيها فرص بس تبي الجرأة والصبر ونبطل نتعالي على الشغل

ادري طولت بس كان الكلام يقرقع بخاطري وطلعته