السلام عليكم ورحمة الله



بما انو بطاقتي بتنتهي بشهر 2 ميلادي فرحت لهم قبل انتهائها ب 15 يوم عشان اطلع الجديده
لما وصلت طبعا الزحام كالعادة وسوء التنظيم تدخلين قاعه تقولك مو هينا القاعه الثانية
تروحين القاعة الثانية يقولون لك ليش جايه هينا انت هناك
المهم بعد المعمعه هذي اخذت رقم وجلست انتظر دوري طبعا الدوام يبدأ 8 ما استلمو الطلبات الا 9 الا ثلث
ماعلينا جادوري وعطيتها البطاقة وناظرت التاريخ قالت لاااا وين.؟؟ انتي بطاقتك باقيلها اكثر من شهرين ونصف قلت بس البطاقة باقيلها 15 يوم
واخاف تنتهي صلاحيتها قالت لا اصلا اذا حطيتي البطاقة بالصراف بيقولك متى تنتهي..وبعدين بطاقات شهر 1 لسا ماوصلن تبغين بطاقتك توصل..؟؟
يعني مافيه فايده ان جينا بدري صرفتونا وان جينا متأخرين قطعتوها
قلت طيب انا ضاربه مشوار ومغيبه ولدي عن مدرسته المفروض يكون عندكم تواريخ محددة لاستخراج البطاقات مو شهر تنزلونها بدري وشهر لا
ترا الناس عندهم التزامات وضروف قالت الخطأ من عندك المفروض ماجيتي الا متصلة..قلت تلفونكم مايرد ولا كان ماقصرت
يعني عادي اغيب ولدي واتبهذل واخذ رقم عشان بس اشوف بطاقتي طلعت او لا
واخرتها تقولي هذي من مسؤليتك تتأكدين قبل ماتجين
طيب انت موظفة ومؤتمنه وتستلمين راتب يعني مسؤليتك عظيمه وتعطيل مصالح الناس مايجوز
ليش ماتوجهون المراجعات تطبعولهن شروطكم وطلباتكم وكل مراجعه تعطى نموذج
ليش مايرفعن طلبات للمسؤلين ويوضحن فيه كل مايعطل او يساعد المراجعات
ليش مافيه اي تطوير للمكاتب النسائية
مع الاسف الاقسام النسائية كما هي منذ سنوات واجرائآتهم اكل عليها الدهر وشرب


بعدها بفترة صرفت وكان مكتوب بالصراف باقي 37 يوم وتنتهي البطاقة...ويوم جيت اصرف هالشهر البطاقة ماتصرف...يعني مقطوعة..
ما ادري مافيه اي مسج يوضح لك..ولنفرض انها انتهت باقي لها 7 ايام على اي اساس يقطعونها..وش فايدة السبعة ايام اذاهم بيقطعونها قبل



انا ما اعمم لكن هذا مالحظته في مكتب الضمان بالسلي والله على ما اقول شهيد