المشاركة الأصلية كتبت بواسطة الفارس القحطاني

السلام عليكم ورحمة الله وبركاته

الله يسعد جميع اوقاتكم بكل خير

هذي اول مشاركه لي بالمنتدى فلكم مني اجمل تحيه وتقدير جميعا كلن بأسمه ,,

يأخوان بغيت أستشيركم في شيء و على قولتهم ما خاب من شاور ,, وطبعا قبل لا أستشيركم أنا بشرح لكم حالتي بالتفصيل الممل (واستحملوني شوي على الاطاله لا هنتم ) ,,

أنا تخرجت من الثانوي علمي سنة 1428 (آخر سنة أختبارات الوزارة) نسبتي كانت (ما شاء الله) 96 % علمي والقدرات 85 والتحصيلي 80 ,, طبعا ما أخفيكم بعد هذي الدرجات صراحه كل الابواب تفتحت لي جامعات ,بعثات ,كليات عسكرية, وكأي طالب قدمت عليها كلها والله وفقني وانقبلت فيها كلها قبول مبدئي والقبول النهائي كان شيء مضمون بالنسبه لي طبعا بعد توفيق الله ,,

الي حصل يا طوال الاعمار اني رسيت على اربع خيارات كتحديد للمستقبل وكملت اجراءاتها الى النهائية
الخيارات هي
جامعة الملك سعود - طب (قبول نهائي وعطوني موعد لتسليم الشهاده)
جامعة الملك فهد للبترول - هندسه (قبول نهائي وعطوني موعد لتسليم الشهاده)
الابتعاث - (أستراليا - هندسه - كملت اجراءاتها كلها وعطوني موعد لتسليم الشهاده)
الكليات العسكريه ( الكليه الجويه -خلصت الكشف الطبي وكل الاختبارات وتم قبولي النهائي وعطوني موعد لتسليم الشهاده),,

وما أخفيكم أنها كانت من أصعب لحظات حياتي ما كنت عارف أقرر , أيش أختار بينهم رغم ميولي الشديد للعسكرية الا ان الكل كان يحذرني منها ويطلبني اكمل دراستي للبكالوريس وبعد ما شاورت كل الي اعرفهم ,, وقع الاختيار على جامعة البترول و توكلت على الله وسلمتهم الشهادة وقلبي كان معلق بالكليه الجويه لكن قلت ان شاء الله انها خيره والي كاتبه الله بيصير ,,

خلصت السنه (التحضيريه) بنجاح وبدأت الدراسه الجامعيه وتخصصت هندسه كهربائيه اصعب انواع الهندسه كملت مواد السنه الاولى ومواد السنة الثانيه الا ماده وحده كان الدكتور الي يدرس الماده ( عنصري جدا جدا ) حاطني في رأسه ما أنجح لو أيش أسوي طبعا صارت بيني وبينه مشكله قبل كذا والسبب عشان أخر اسمي قحطاني وهو ما يداني أهل الجنوب عامه والقحاطين خصوصا ودايما أنواع السب والاستهزاء في اهل الجنوب وطبعا الطلاب المساكين كانوا يتقبلون ويسكتون ولا بيدهم حيله الدكتور كان (واصل) يقرب لمدير الجامعه فما فيه وسيله لتأخذ حقك واذا تكلمت فبتكون انت الغلطان 100% ومصيرك معروف راسب في الماده واذا فيك خير رح اشتك عليه ,, طبعا أنا كنت مثل الطلاب أمشيها له لكن مره من المرات وصل لحد ما ينسكت عنه وصراحه ما قدرت استحمل وقمت وسفلت فيه سفلت فيه قدام الطلاب وخليته يلعن اليوم الي انولد فيه , طبعا الطلاب كلهم كانوا يضحكون عليه وطلعت الي في قلبي وقلوبهم كل المده الي فاتت ,, طبعا بعدها طردني برى القاعه ,, في اليوم الثاني يوم جيت ادخل طردني وقال انتظرني عند المكتب رحت انتظره عند المكتب وشوي الا وهو جاي ومن غير تفاهم قال انت راسب ,, يا دكتور منا منا ما فيه وقال والله ما تنجح دام انا هنا (ما أخفيكم جاتني افكار شيطانيه بغيت اتهور واصكه بكف اخليه يعض الارض لكن ربك سلمه),, طبعا بعدها حسيت الدنيا ظلمت في وجهي معقوله كل التعب والدراسه تطير بسبة هالدكتور وهالماده الي من دونها ما أقدر أنتقل للسنه الثالثه ,, طبعا الدكتور له صلاحيه يرسب الطالب ويكتب فيه تقرير وهذا الي سواه معاي الله ينتقم منه ,, حاولت اشتكي لكن كل السبل قفلت في وجهي.. قلت امر الله طبعا الرسوب هذا أثر على المعدل وتم أيقافي عن الدراسه لمدة فصل دراسي (6 شهور تقريبا ) ,,بعدها تم أعادتي للدراسه و أعدت الماده عند دكتور ثاني ولسوء الحظ الدكتور العنصري صار رئيس قسم الماده قلت خلاص نسى السالفه وكلها فصل واحد وافتك من ذا القسم,, والماده أنا الحمد لله فاهمها وما بتصعب علي ,, لكن ما كنت متصور مدى حقارة الدكتور تخيلوا جاب أسئلة أختبار رغم ان الدكتور الثاني الي نزلت عنده الماده هو المفروض يحط الاسئله لكن هذي المره حطها الدكتور العنصري (واقدر احلفلكم أنه ما حطها الا عشاني ) طبعا جاب اسئلة يمين بالله ان الدكاتره عجزوا يحلونها والنتيجه رسوب أغلب الطلاب والي نجح نجح بالحظ لان نظام الاسئله اختياريه زي نظام القدرات يعني الي نجح محظوظ وامه داعيتله طبعا طوال الترم هذا كان هناك اختبارات قصيره من الدكتور الثاني وكلها جايب فيها درجات عاليه لكن الاختبار النهائي هو الي عليه الكلام طبعا رسبت مثل معظم الطلاب رغم أني فاهم الماده من الجلده للجلده لكن سوات الله رحت مع مجموعه طلاب نشتكي ونطلب اعادة الاختبار وقابلنا رئيس القسم الي هو الدكتور العنصري ووقتها طالعني بنظره تذكرت فيها حلفانه اني ما بنجح دام هو موجود ,, طبعا شكلوا لجنه من الدكاتره يدرسون الشكوى لكن كلهم اخوياه فحطوا الخطأ مننا و طبعا رسبت ونزل المعدل لدرجه 1.6 من 4 والمطلوب 2 من 4 للتخرج من الجامعه طبعا ما فيه اي أمل اني اتجاوز الماده وذا الدكتور موجود ,, ونظرا للنزول المعدل تحت 2 تم أقافي عن الدراسه للمره الثانيه وقالوا لي خذ ملفك ودور لك مكان ثاني أمسك الباب,, راحت السنه الي فاتت في الهواء زياده على ثلاث سنين تصير اربع سنين من التعب والسهر والدراسه والاختبارات راحت تبخرت قدام عيني والسبب حسبي الله عليه دكتور ما يخاف الله ,, طبعا بعدها شانت اخلاقي وانا اشوف مستقبلي ضاع قدامي وكرهت شيء اسمه دراسه (خصوصا ذيك الماده ) مستحيل أرجع ادرسها مستحيل ومستحيل اكمل دراسة التخصص من دونها هي اساس التخصص ,, صار عندي كره للدراسه بشكل فضيع ,, رحت سحبت ملفي من الجامعه ,, وحلفت اني ما عاد ارجع ادرس ولا افتح كتاب .. قررت اتوظف في اسهل شغله وما يبيلها دراسه وما كان قدامي الا المباحث قدمت على المباحث وتم قبولي لكن في اخر وقت تراجعت والسبب كلمه من واحد من اخوياي قال معقوله من مهندس الا جندي ,, في البدايه قلت في بالي وش الفرق الراتب الي بأستلمه وانا مهندس هو نفس الراتب تقريبا لجندي المباحث والفرق بسيط ,, لكن والله ما نمت الليل من التفكير في كلمته ,,أنغبنت ,, وبعدها قررت اني اتراجع وتركت التقديم على المباحث...

طبعا انا الان ما عندي خيارات كثيره لان اغلب الجامعات في المملكه ما بتقبلني الى في تخصصات ضعيفه والوظيفه فيها صعبه ومهي أكيده يعني برجع ادرس 4 سنين وفي النهايه أسفط جنب العاطلين الي تخرجوا قبلي في نفس التخصص..
واذا بطلع ادرس في امريكا في نفس تخصصي السابق بيحاولون يعادلون الدرجات وبيصير فيه ظلم وبتروح على الاقل سنتين من الي درستهم في الهواء وما بعادلونها (تخيلوا ارجع ادرس مواد قد درستها وعديتها بنجاح وتروح علي سنتين على الفاضي) يعني مستحيل افكر في هذا الخيار ,,,

الخيار الثالث: وهو الي ابي منكم الشور يا طوال الشبور ,, هل فيه ذرة امل اني ارجع للكليه الجويه أو اي من الكليات الي تخرج ضباط ولو بواسطه(كبيره) لان مثل ما انتم عارفين (ما يقبلون الى خريجين الثانويه من نفس العام ) فهل فيه امل ينلغي هذا الشرط أو القبول الان الكتروني فما يقبل الطلب الكترونيا ..

أو أقدم على معهد البحريه (طبعا انا قدمت وبأنتظار النتائج) وأشوف من كلامكم أن فيها جلسه في البحر بالشهور وهذا شيء رائع بالنسبه لي انا اعشق شيء اسمه بحر وماعندي مانع اقعد 6 شهور فيه,, والي زاد رغبتي هو كلامكم بان المعهد يعتمد جدا على الللغه الانجليزيه وانا كنت ادرس اربع سنين بالانجليزي ولغتي الحمدلله ممتازه جدا أقدر اكتب مقال في اكبر الصحف البريطانيه والامريكيه يعني مستوى اللغه لدي اكاديميه يعني تقريبا كأنها لغتي الام,, طولي تقريبا 176 ووزني 71 والنسبه 96 والقدرات 85 ودرجه الاتجليزي في الثانويه 99 ,, وحبيت اسألكم عن الترقيات لان بأذن الله بعد مده من الوظيفه ناوي على تكملت البكالريوس أنتساب في أي جامعه,, واطور من نفسي فهل تمشي الترقيات ولا يصير فيه تلاعب ؟؟ على العموم انا خربتها وقدمت واصلا قدهي خاربه خاربه في عيني ولا عاد تفرق في شيء ,, لكن شايل هم الي قريبين مني اذا عرفوا اني يصير من مهندس الى وكيل رقيب بياكلون وجهي ,, بس والله ذا الزمن يخوف اذا ما توظفت الحين يمكن ما تتكرر الفرصه وابلش طول عمري ,,, أذا الله قال وقبلوني كان بها واذا ما قبلوني خيره ويفرجها الله من عنده ,,,


أعتذر عن الاطاله للمره الثانيه وحبيت اشكركم مقدما على استحمالكم لي على سرد قصة حياتي الحزينه << لا بالله كدينا خير ,,,

واي خدمه لكم انا حاضر واتشرف بمعرفتكم جميعا ويمكن نكون زملاء في الدفعه أن شاء الله << عاد الي وده يسنع عمره بالانجليزي يخاويني ههههه ,,

لا والله اتشرف فيكم جميع ...
أخوكم الفارس القحطاني

المشاركة الأصلية كتبت بواسطة العضو العالمي

حسبنا الله ونعم الوكيل


حسبنا الله ونعم الوكيل


حسبنا الله ونعم الوكيل

المشاركة الأصلية كتبت بواسطة العضو العالمي

موفق ...

المشاركة الأصلية كتبت بواسطة العضو العالمي

موفق ...

المشاركة الأصلية كتبت بواسطة عاطل برتبة سبيعي

صباح الخير

بشروو وش صار ب القبول المبدئي

المشاركة الأصلية كتبت بواسطة أعبط عبيط

أخوي العضو العالمي أنت مقتبس رد الفارس القحطاني من أي موضوع !؟