السلام عليكم ورحمة الله وبركاته

مساكم الله بالخيررر حبايبي أنا ياحبايبي أبسولف وفض فض اي شي عندي هنا .. أخاف فيه ناس يقولون أبلشنا هذا كل شوي طالع لي في شي ..أنا كلامي هذا للناس اللي فاهمه واللي كبيره وعاقله وتقدر الظروف..

ونـا جالس اليوم الصباح مع أمـي أسولف عليها بما إني ماحصلت وظيفه وفرطت فالعسكرية وسحبت على الدوره لي اسبوع ونص اقولها يمه تصدقين بديت احس اني تحسفت اني تركت الدوره العسكرية واني خايف اندم على اتخاذ القرار وشوف قدام عيني الحين كل شي صعب ولا في فرص وظايف وابغى اكون نفسي ونا صغير علشان ارتاح قدام مع اني يمه حتى لو رحت ابتضاايق وحالتي حاله مثل ما انتي عارفه واحس اتخاذي للقرار اخاف اندم عليه قدام بما ان الوظيفه مضمونه دامني بالدوره
قالت لي تبي الصدق يا عبدالله دامنك تركتها وجلست عندنا أصلن ياوليدي منول ماكنت اقطر بعيونك يوم انك تسوي العمليه علشان تتدخل العسكرية قلبي مو مرتاح منها ولا ابيك تروح لها قلت يمه طيب كان قلتي لي علشان مايضيق صدرك .. قالت ياعبدالله انا اصـلا مابي أضيق صدرك ولا ابي اي شي يضيق صدرك قلت خله يرووح وعسى ربي يوفقه وتكوون له خيره ويرتاح فيها.. قلت يمه طيب الحين وش اسوي بس اسبوعين ونص جلسة بالبيت جاني هبال ابي شي يشغلني قالت عبدالله انا متفائله فيك شي كبير وزين واحسن من هالعسكرية ويمكن ربي رادك عنهاا عن شرر بيجيك
قلت لها انا والله مقتنع بكلامك لاكني ابي اتوظف بأي شي وشيل اي شي بالبيت احس اني مسكت مسؤوليه واني خلاص الحين .. على دخلة الوالد ونا اسوولف قالي ياعبدالله لاتقول هالهرج ذا اشيل شي بالبيت ولا شي الحمدلله على كل حال الحال يالله لك الحمد ممتاز انت اطلب اللي تبي ونعطيك وش هالهرج والحمدلله الامور زينه مرره وحتى الوالده قالت لي لاتفكر وشيل هالشي من راسك تقولنا علشان اشيل شي بالبيت ومثل كذا .. قلت طيب ابي علشان اتزوج وكون نفسي ونا صغير هذا خويي فلان ماشاء الله نفس عمري تزوج وتوظف وعيال عمي كذلك قالولي تبي نزوجك زوجناك ياوليدي ولاتضيق صدرك حتى البيت موجود قلت لالالالالالا ابي اتزوج ونا معي وظيفتي حكومية ومرتاح فيها قالولي اذا كذا لازم تصبر تصبر وتحط الله امام عيونك والصلاة الصلاة وابشر بكل الخير اللي بيجيك ولا راح من عمرك شي ياوليدي وشهاداتك ماشاء الله كلها تقاديرها ممتاو ومتفوق
ولاتجلس كل الوقت تفكر وتهووجس لاحظنا عليك هالشي خلاااص العسكرية انسى انك كنت في دوره خلك الحين كأنك توك متخرج وتتدور وظيفة مثل عيال النااس ماضر عيال الناس تركوا دورات عسكرية والله رزقهم باحسن منها

كل هالكلام ياخواني انا داري ان كلام ابوي وامي لي صحيح بس انا غصب افكرررر غصب افكررررر اني ابي وظيفة الحين ويضيق صدري لاني انا ما فكرر بيومي وبس افكر لشي قداام زواج + استقرار + تملك بيت + حيااة سعيده مع عيالي .. لو اني ابفكر مثل بعض تفكير الشباب بيوومي والله تلقوني ماهمني شي ومطنش للدنيا كلهاا وقول ببليس راحت هااذي بعدين القى وظيفه وعمري انا تووني صغير خلني استانس وانبسط لاحق بعدين عالغثا والتفاكير والهموم

عجزززززت القى حل يرووح عني التفكيرررر هذا قسم بالله ارووح النادي اشغل نفسي بالنت اطلع وروح مع ربعي لاكن غصب يجي هالتفكيرر وبعدين نفسيتي تصير زفت حتى مع اهلي تلقووني مالي خلقهم او مثل كذا ... مع ان الوضع عادي اشوف بعض الشباب وخوياي اللي لهم مو بس اربع شهور ماحصلوا وظايف لهم سنتين واللي ثلاث سنوات واللي 4 سنوات ماحصلوا وظايف وماشاء الله عاتي ابي اكوون نفسهم كذا ... أبي حل .. صحيح اني طولت بكلامي ونا من الناس اللي كثير كلامه لاكن ابقول كل اللي عندي هناا (( خاصة للي يرتاحون لكلامي واللي فاهمين بالحياة ))

يارب توفقني وتسهل لي امري بالوظيفه اللي تسعدني ويوفقكم يارب ويرزقكم من حيث لاتحتسبوا

*