بعد السلام عليكم ومسائكم ورد وكادي

لي احد معارفي يريد ان يفتح مشروع بسيط الا وهوا تقسيط سيارات بنسبه 40في الميه

الان السوال كيف ممكن يضمن الرجال حقه
هل يكفى الاستقطاع

ولا يسوي مع الاستقطاع شي ثاني

السوال الثاني هل العميل يقدر يوقف الاستقطاع ولا مايقدر

هل البنك ياخذ عموله او موضف البنك على كل عموله يسويها لي واذا كان نعم الاول ولا الثاني (يعنى البنك ولا الموضف الي ياخذ )والسوال هل تعتبر رشوه ولا لا لانه احتمال يضرب بجميع الجالسين ويمشى العميل حقي في مقابل انه يحصل على عمولته هذا لو كان له عموله

بس الشي الي يخليني اقول انها ممكن ماتكون رشوه ان هذا القريب لي عنده تميز

مارائيكم الاقوى استقطاع ولا كمبيالات ولا ايش

اهم مافى الموضوع كيف يضمن حقه الرجال

وهناك استفسار اخر

لو صارت مصيبه هل اموال الرجال تروح (يعنى مثلا مثلا على سبيل المثال وليس الحصر )
واحد هكر حسابات الراجحي مع انها مستحيله بامر الله بس برظه الانسان يضع كل احتمال

نهايه الموضوع اتمنى رائيك بالمشروع من ناحيه مميزات المشروع وعيوبه

والله يوفق الجميع لما يحبه ويرضاه

اخوي اللي اعرفه انك تسوي استقطاع ومعه شيك بكامل المبلغ كضمان بس وترجعه اذا خلص الاقساط اللي عليه هذي واحد من الشباب مسويها

صباحك سعيد اخي الدحباني


انا صاحب مكتب تقسيط في الرياض اذا حبيت تزورني تتعلم الشغله بسيطه ممكن تتعلمها بنص ساعه الشغله هذي مربحه وفيها خير انشالله مع التعب
الشديد في الأتصالات على العملاء كل يوم 25 إلى 30 لكن هناك شروط لازم تطلبها من العميل

وهي :

1ــ تعريف من العمل يكون بتاريخ نفس اليوم الي تقدم فيه بالطلب مختم موقع

2ـ كشف حساب اخر ثلاث شهور من البنك الي ينزل عليه راتبه

3 ــ تاخذ عليه شيكات لكل قسط شيك بدون تاريخ تسجل التاريخ انت في نفس اليوم الي بتحتاج

انك تصرف الشيك فيه ، بالأضافه إلى شيك نهائي بإجمالي المبلغ مع الفوائد + 7000 ريال تسمى اتعاب

محامي .

مثال

لو كان قيمة السياره بـ 20،000 عشرون الف ريال وبتقسطها عليه بـ 30،000 ريال وقيمة القسط

1500 معناها راح تاخذ عليه 20 شيك بقيمة 1500 ريال لان اجمالي المبلغ مع الفوائد 30 الف

و 20 قسط * 1500 = 30،000 حقك كامل وتاخذ شيك اخير بقيمة 37،000 ريال حقك بالكامل + اتعاب المحامي

وهذا الشيك الأخير الي بإجمالي المبلغ الـ 37،000 الف لان تستخدمه ولن تحتاجه إلا في حاله وحده وهي لا قدر الله سحب الرجال واظطريت ان ترفع عليه شكوى تاخذ معك العقد والشيك بإجمالي المبلغ

وورقه من البنك تثبت انك تقدمت بصرف الشيك ولا يوجد في حساب العميل المبلغ الكافي تسمى ورقة

اعتراض مصدقه من البنك وحينها تطالبه الشرطه بالمبلغ الكامل + اتعاب المحامي

4 ــ لاتنسى ان يوقع لك ويبصم لك على ورقه ضمن العقد يذكر فيها ارقام الشيكات بالتفصيل التي وقعها لك

بالاقساط مع رقم الشيك الأخير باجمالي المبلغ ، وهذي ايش فايدتها فايدتها طال عمرك لو نكر امام الشرطه

ان الشيكات مو توقيعه ولا احتج بأن الشيكات ضايعه منه او مسروقه منه ، تكون هنا الورقه الي تم التوقيع

والتبصيم عليها بأرقام الشيكات تدين العميل وتكذب حجته وتكون سند اصلي يضمن تسليمه لك بالشيكات

5ــ لاتنسى ان توقعه وتبصمه بالأبهام الأيسر على كافة اوراق العقد من ضمنهم الصفحه الي مدون فيها ارقام

الشيكات لأنها الأهم .

6 ــ يفضل ان يكون لديه كفيل موظف حكومي يوقع على صفحة الكفيل في العقد ويبصم ( كفيل غرامي )

* لان يتقدم احد بكفالة شخص في امور ماليه إلا وهو ضامن الرجال وعارف سيرته ومتطمن منه .


بالنسبه لأستفسارك عن استقطاع البنك انا اقولك :

جميع البنوك تعمل استقطاع اي كلام مجرد ان العميل اذا نزل راتبه يستقطع لك قسطك ويحولك في حسابك الي هو حساب المؤسسة وفي حال رغبة العميل من تغيير البنك
اذا كان ماعليه التزامات معه قرض او فيز يستطيع يغيره بسهوله وانت تروح عليك

ماعدا بنك الراجحي بنك الراجحي هو الوحيد الي يلزم العميل انه يبقى في الراجحي ما

يستطيع عمل مخالصه الا بعد ماتستوفي دينك منه وبعد توقيع ورقه مخالصه من مؤسستك
مختمه من ختم المؤسسة تبعك بأنك لا تطلبه ولا ريال ولهذا السبب تجد اغلب اعلانات
مكاتب التقسيط بهذا الشكل ( يوجد تقسيط لعملاء الراجحي ) ليه لراجحي لأن الأستقطاع
بالراجحي يضمن حقهم بإذن الله كما يضمن البنك حقه منك

بالنسبه لعمولة البنك من الاستقطاع نعم ياخذ عموله على عميل لأول مره بمقدار 15 ريال
على كل عميل تريد ان تعمل معه استقطاع اياً كان المبلغ وهذا يعبتر مبلغ زهيد جدا امام
ضمان حقك منه بعملية الاستقطاع يعني اذا فوائد من العمليه 10،000 عشر الاف ريال لن
يشكل معك مبلغ 15 ريال

والله يرزقك واي استفسارات ثانيه حاضرين لطيبين

...........
موفق

رفع

عاشق الحمضيات بارك الله فيك على اجادتك للشرح بشكل مؤجز

الفكر الحر الله يوفقك ومشكور جدا فعلا كفيت ووفيت والطيب اصلك يادهن العود

مجرد احلام
رياضيات عاطله بارك الله فيكم جمعيا وموفقين

الكاش ملك دورلك مشروع تحت اشرافك وفلوسك قدامك

رفع.. والله يرزقك

بالتوفيق للجميع