السلام عليكم ورحمة الله

لا أخفي عليكم تنتابني ضيقة عندما أرى الوظائف المتدنية لأبناء هذا الوطن

وأكثر ما يضايقني إلحاح وزارة العمل ورضاها على سعودة الوظائف المتدنية

فهذه قصيدة متواضعة مني لعدم الرضى بسعودة تلك الوظائف وتطرقت فيها إلى ما يعانيه العاطل من بحثه عن الوظيفة وظروفه المالية والنفسيه والمعنوية

أسأل الله أن يرزق كل عاطل وعاطلة بالوظيفة التي تؤمن له مستقبله وتساعده في أمور زواجه وإستقراره .

اخوكم

يحيى الدوسري


المُحاله شفتها بانت مُحاله=مالها حل ٍ ولو طالت سنيني
تتعب العقـّال وراعين الشكاله=وتتعب اللي بالمعارف فاهميني
البطاله مالها حل البطاله=وش نسوي بالشباب العاطليني
كل والد ذايق ٍ حرة عياله=ضايق ٍ صدره وفكره صار شيني
حتى حافز ما يجيهم بالسهاله=عقدوهم والأمر والله هويني
الملف الأخضر عليهم صار عاله=وتعبوا من دوجة في الليموزيني
يركب التكسي من اطراف السباله=لين خشم العان ويرجع خطوتيني
هذا حاله كل صبح ٍ هذا حاله=والملف الاخضر معه والحر شيني
لو تفتش جعبته تلقى رياله=في طرف مخباه يابس ما يليني
كل منهم يطرق الهاجوس باله=وقتهم يابس ولا ظنه يليني
الاجنبي في ذا البلد قد شاف حاله=كل اموره ماشيه والحظ زيني
صادق اللي قال يا منهو شراله=من حلاله علة ٍ وسط البطيني
شفت حظ عيالنا طايح لحاله=مالهم الا الله الواحد معيني
كم قرينا عن حلول للبطاله=للأسف يا ليت ما تقراه عيني
في الإذاعه نستمع هرج الجزاله=والكلام يرددونه مرتيني
خدرونا بكلمة ٍ والفكر داله=ليتني ما كنت ضمن السامعيني
سعودة سوق الخضار أكبر دلاله=يضحكون بها على اللي جاهليني
هيه يا مسؤول فكرك ويش جاله=يوم ترضى بالهوان وبالهويني
السعودي لازم ٍ يرقى مجاله=ما هو في بيع البصل والجحتيني
آه ثم آه الصدر يا ضيق باله=من هموم ٍ شيّبت بالمرضعيني
كل عاطل قصّت الدنيا حباله=عايش ٍ همه سواة اللي سجيني
كم عاطل خاطره في بنت خاله=مير قـِل المال سبب وجعتيني
أول الوجعات من هم العطاله=جابت الوجعات يتلاها الونيني
وكم سجين ٍ يشتكي لله حاله=ضايق ٍ صدره ويهل الدمعتيني
البطالة تجر لدروب الرذاله=كافحوها قبل هرج الشامتيني
هذي أبياتي وذا نص الرساله=احفظوها وانشروا يا عاطليني
ونجتمع في منتدانا ومن خلاله=انتشاور في أمور العاطليني

صح لسانك أ. يحيى

في الصميم



هــذي أبيـاتـي وذا نــص الرسـالـه
احفظوهـا وانشـروا يــا عاطليـنـي


إن شاء الله يكون لها صدى وتكون احد أبواب لحل ازمه البطالة

بارك الله فيك كنت وما زلت صاحب الفضل والمبادرات لصالح العاطلين

عليكم السلام ورحمة الله

نورت المنتدى

صح لسانك على الأبيات الجزلة

والقصيدة أعتبرها ملحمة العاطلين


سعودة سوق الخضـار أكبـر دلالـه
يضحكون بها على اللـي جاهلينـي

هيه يا مسؤول فكـرك ويـش جالـه
يـوم ترضـى بالهـوان وبالهويـنـي

السـعـودي لازم ٍ يـرقـى مـجـالـه
ما هو في بيـع البصـل والجحتينـي

آه ثــم آه الـصـدر يــا ضـيـق بـالـه
مـن همـوم ٍ شيّبـت بالمرضعينـي


بيض الله وجهك

__________________
ومن يعمل من الصالحات وهو مؤمن فلا يخاف ظلما ولا هضما

صح لسانك يا أ. يحيى الدوسري

يا ليت تشرفنا بكتاباتك في المنتدى من فترة لاخرى

مع تمنياتي للجميع بالتوفيق

اللهم آآمين
وصــــح لســــــــــــــــــــــانكـــــــ أخوووي يحيى على القصيده الاكثر من الرائعه

البطاله مالها حل البطاله .... وش نسوي بالشباب العاطليني

صح لسانك ع ماجادت به قريحتك الجميله
تحياتي وتقديري

صح لسانك أ.يحيى الدوسري
وبيض الله وجهك
الله يوفق جميع العاطلين ويرزقهم بالوظائف اللي يبونها

قصيدة جميلة واسأل الله أن يعين جميع العاطلين ويوفقهم لامايحبهم ويرضاه