بسم الله الرحمن الرحيم


لاحظت بالآونه الأخيره استفسارات كثيره عن المقابلات الشخصية .. ولاحظت كونها عقبه في طريق التوظيف لكثير من العاطلين ..



أتمنى من كل قلبي مايكون الموضوع مكرر .. ولو كان مكرر فالمعذره حاولت اشوف لو في موضوع ثاني بالمنتدى عن المقابلات بس ماحصلت ..



الموضوع راح أطرحه على شكل أسئله وأجوبه بطريقه سلسه ومفهومه بإذن الله ..
طبعا بطرح الموضوع من خبرتي المتواضعه كحديث تخرج .. خضت غمار 15 مقابلة شخصية حتى الآن


1- ماهي المقابلة الشخصية وليش تستخدمها الشركات؟
أحيانا تلاقي نفسك في مكان معين ومع شخص جديد مجرد ماتبدا تتكلم وتتناقش معاه تاخذ عنه فكره مبدئيه
( واثق من نفسه, بثر , مغرور, طموح, عقلاني, ثرثار, جاد, مرح, مستهتر, حساس ... الخ)
هذي ميزه المقابله الشخصيه .. ياخذون فكره مبدئيه عنك وعن شخصيتك ..
المقابلة الشخصية بشكل عام هي طريقه تستخدمها الشركات بحيث تعرف عنك معلومات اكثر وتستخدمها في الحكم كونك مؤهل لشغل الوظيفه او لا .. وبرضو تستخدم كطريقه مفاضله في حال كان عدد المتقدمين كثير لشغل وظائف معينه ..



2- ماهي أنواع المقابلات الشخصية ؟
طبعا المقابلات تختلف باختلاف الوظيفه والمهارات المطلوبه لكن بذكر انواع المقابلات بشكل عام جدا
· المقابلات المعلوماتيه :
مقابلات عاديه جدا هدفها جمع معلومات عن المتقدم بشكل اكبر واوضح لها اسئله اعتياديه مثل: عرفني عن نفسك, طموحاتك, ايش تعرف عن شركتنا, وين تشوف نفسك بعد خمس سنوات, ليش دخلت التخصص الفلاني وتتضمن ايضا اسئله عن تخصصك هذا اذا كانت وظيفه مباشره وماتحتاج تدريب ....
· المقابلات السلوكيه:
هي مقابلات تختص بمناقشه المهارات السلوكيه لدى المتقدم وطريقتها هي طرح اسئله لمواقف معينه ومعرفه رد فعل المتقدم فيها سواء كانت في الماضي او في المستقبل مثل:
اخبرني عن موقف وجدت نفسك تعاني من مشكله ... كيف حليت المشكله ووش سويت بالظبط؟
اخبرني عن موقف استعملت فيه ذكائك؟
اخبرني عن قرار اتخذته وندمت عليه؟
طبعا المقابلات هذي مرحله متقدمه وغالبا تكون لخريجي الشهادات العليا ..
دخلت مقابله مره امتدت لنص ساعه .. من دخلت لين طلعت وهي اخبرني واخبرني ..
· مقابلات الغداء أو العشاء:
هذي مقابلات نااااادره جدا .. غالبا تكون للمدراء التنفيذيين واصحاب القرار والمناصب العليا ..


3- سر الإرتباك في المقابلات الشخصية؟
مافي أحد مايرتبك في المقابله الشخصية .. لكن الإمتياز هو قتل الإرتباك وتحويله لثقه بالنفس .. السر في الإرتباك والسبب الرئيسي هو ( إحتياجك للوظيفه ) .. تخيل لو انت موظف وراتبك 15000 ريال ومرتاح ومبسوط واتصلت عليك شركه ثانيه تبي تسوي لك مقابله شخصية .. صدقني بتروح وانت مبسوط وماضربت لهم حساب .. ليش؟ .. لانك منت بحاجتهم متوظف ومبسوط .. لكن تخيل لو انت عاطل لخمس سنوات واتصلت فيك شركه مقابله شخصيه .. بتضرب مليون حساب وتفكر بشكل مرهق وتدخل المقابله وانت مرتبك ..
قبل المقابله الشخصيه .. لازم يكون عندك ايمان كامل بان الارزاق بيد الله سبحانه وتعالى .. والوظيفه بامر الله سبحانه .. مهاراتك وقدرتك هي مجرد سبب فقط لاغير .. وصدقني بتدخل المقابله وانت مبتسم ومبسوط ..

4- مواقف لأساليب المقابلات الشخصيه المختلفه
احيانا اللي يسوي لك المقابله شخص واحد فقط واحيانا 4 أو 3 أشخاص .. والزياده في العدد في لمرحله متقدمه غالبا تكون مع مدراء في الشركه .. لازم تعرف انه في المقابله بيستخدمون اي سؤال عشان يربكونك او يسألونك سؤال انت ماتتوقعه ويشوفون رده فعلك .. أي تأتأه أي اشاره انك تكذب او تتهرب من الاجابه قيم اوفر ..
تذكر دائما ان انتظار المقابله اصعب من المقابله نفسها ... حاول دائما ماتروح بدري للمقابله وترهق نفسك بالتفكير وانت تنتظر .. روح قبل المقابله بوقت قليل 15 الى 20 دقيقه .. اشرب قبلها قهوه وروووق ..
حتى لو تلاحظ في بدايه المقابله يسولف معك عادي .. هو عارف انك مرهق وممكن مرتبك ويحاول يلطف الجو عليك شوي ..
احيانا يسألونك سؤال ماتتوقعه .. سؤال يرفع ظغطك .. تذكر حبيبي مايقصدون نهائيا لكن مجرد اختبار لوسع البال عندك ..
واحد من الشباب سوو له مقابله .. مع إجابته لأحد الأسئله نقز مدير وقال له وش اسم امك؟؟ .. خويي طالع فيه بكل لطافه وابتسم وقال اسم امه .. توظف ماشاء الله .. في ناس ماتتحمل ممكن يقوم يصكه على جبهته لابوكم لابو وظيفتكم ..
انا في مقابله لاحد البنوك السعوديه مع اربع مدراء تنفيذيين .. سألني واحد منهم ايش طموحك في المستقبل .. بديت اشرح الا نقز واحد منهم وقعد يضحك ويحاول يخفي ضحكته .. هالاسلوب ترى جدا مستفز ويخليك تستغرب واحيانا تتضايق وتوقف اجابتك .. انا بكل بساطه طنشته وماناظرت فيه ( انتبه تحط عينك عليه هذا يدل انك تضايقت ) وكملت اجابتي عادي وتجاوزت المقابله ولله الحمد ..


5- نصائح مهمه جدا :
· دائما وأبدا ونهائيا لاتكذب بالسيره الذاتيه .. لاتحط شئ مو موجود فيك .. لانهم ببساطه يمكن يكتشفون كذبك ... لازم تكون حافظ السيره الذاتيه زي اسمك .. 99% من المقابلات يحطون السيره الذاتيه قدامهم ويبدون يسألونك عنها ..
· الاناقه لها دووور .. رح للمقابله كانك رايح لحفله زفاف .. ولازم تكون عالموعد ولو تأخرت حاول يكون العذر مقبول وواقعي ..
· لاتبين في المقابله انك حافظ اجابات .. رتب اجاباتك وجملك على اساس انها ارتجاليه ومنت حافظها قبل المقابله ..
· لاتضحك كثير خليك مبتسم وجاد .. لاتكون بارد لاتبين لهم انك محتاج لهم او للوظيفه .. بين لهم انهم بحاجتك وبحاجه لمهاراتك ..
· غالبا يقولون لك في نهايه المقابله اذا عندك اسئله لهم .. رتب لك سؤالين تبين اهتمامك وجديتك ز. لاتسأل عن الراتب وعن الاشياء الماديه نهائيا ..
· لاتتصنع شخصيتك .. لاتحاول تبني لهم شخصيه غير شخصيتك .. خليك على طبيعتك عفوي وجاد وطموح ..
· لغه الجسد جدا مهمه .. لاتشبك اصابعك ولا تحط رجل على رجل .. اجلس بشكل معتدل ومع كل اجابه حاول تشرح بلغه الجسد تستخدم ايديك وراسك .. لاتنزل راسك تحت استحضر اجابتك وانت تطالع سواء يمين او يسار او فوق ..
· بعض المتقدمين يبني شخصيه الشخص المؤدب جدا .. بالعكس خليك عااادي جدا ..
· أخيرا تذكر دائما .. إذا الله كتب لك الوظيفه بتاخذها لو كل المدراء ضدك .. ولو الله ماكتب لك الوظيفه ماراح تاخذها لو وقفو معاك كل المدراء ..


في النهايه ... اتمنى افدتكم ولو بالشئ القليل عن عالم المقابلات الشخصيه .. طبعا مع الردود راح ابين مواقف اخرى واشياء اخرى عن المقابلات .. وياريت اللي عنده خبره بالمقابلات او اشياء اخرى يضيفها هنا ..
الموضوع تحت تصرف المشرفين ..

بالتوفيق يارب للجميع ..