السلام عليكم ورحمة الله وبركاته ...

كيفكم ان شالله تكونوا كلكم بخير ...
قصتي انا اني كنت عاطل لمدة سنتين مع اني متخرج من الكلية التقنيه بمعدل ( 4.21 من 5 )
وحاولت اقدم في الأنترنت كثير شركات بعضها رد علي وبعضها مارد
اللي ردوا بعد يقولون لي ارسل السيره الذاتيه .. ولما رسلت ماردوا علي
بصراحه بديت ايأس من نفسي وقلت الحظ ماراح يبتسم لي ابد
الى ان جا صاحبي وقال لي شركتي تبي واحد خبره بالكمبيوتر وانجليزي
قلت له على يدك يلا انا موافق اشتغل ان شالله لو حمالي

توظفت والحمدلله على يد صاحبي بس انا من النوع اللي ماأعرف كيف اتعامل مع ناس جدد في حياتي يعني على النيه ... اسف بس انا طبعي كذا ماأعرف لأحد الا بعد ماأجلس معاه مده مابعرف كيف اعامل الناس من اول نظره وكيف احلل الواحد اذا كان هو طيب او ردي
المهم صاحبي بدا يتضايق من تعاملي للناس على اني زي مايقول هو اني اعطيهم اكثر من حقهم وبدا يتضايق اكثر واكثر لدرجة انه كل ماشاف مني على كلامه شي مايعجبه يصرخ علي
ويعاملني كعامل نظافة
يعني يفشلني ويخليني ماأسوى لدرجة انه بهالأسبوع انفجرت في وجهه وقلت له
مو عشان انك شغلتني معاك تعاملني هالتعامل ومن هالكلام لدرجة اني خلاص من داخلي
بديت اكره اني اروح الدوام واقابل صاحبي

لأني ماصرت أكلمه يعني قطعته بس اللي ابي انا اعرف وش المفروض اسوي الحين احس
انه خلاص ياولد لاعاد تورينا وجهك منه ومن مديره

يعني لو طلعت مالي امل القى شغل
وثاني شي انا ماني عارف وين القى شغل لي وبالسرعه

فياليت احد يفيدني لأني بديت وبكل صراحه احس اني اتمنى الموت ولا انذل من ناس زي كذا


شكرا لكم على مروركم الكريم علي والله يفرج همكم ان شالله

والله مدري اش اقولك بس يمكن صاحبك كان يبغاك تغير من شخصيتك وكان يبغى مصلحتك وانقهر من تعاملك مع الغير

ويمكن سامع كلام من الموظفين بانهم يستغلونك او شئ من هذا القبيل التمس له العذر وحاول انك تغير من نفسك ومن شخصيتك لانك لو ماغيرت من نفسك راح تستغل واذا راتبك كويس استمر وحاول انك تقدم يمكن تلاقي شئ احسن بس الاهم انك تغير من شخصيتك قد ماتقدر اقرا كثير عن طرق التعامل راح تفتح افاقك للتعامل مع الشخصيات

والله يعينك ويفتحها بوجهك

اسمح لي

تفكيرك غللللللللللللللللللللللط لاسباب راح اسردها لك


1- صاحبك ما توسط لك لانه يبي يذلك .. يحبك ويبي مصلحتك .. هذي لا غبار عليها

2- انا اتوقع اما انه سمع كلام انك شخص بسيط و على النيه على قولك .. وهذي مو ميزه ترى .. انا ما اعذرك لما تقول لي على النيه! لازم تكون واعي و عندك ذكاء اجتماعي ولباقه بنفس الوقت
او الاحتمال الثاني انه يبي يستفزك علشان ترد و تتعود على خشونه بيئة العمل

3- مهما كانت مضايقات العمل . ما دامت مش مباشره يعني مو شخص متسلط عليك مثلا مديرك يطفشك او يخرب شغلك .. لا تهتم .. وشو مذله ومدري وشو و كلام الافلام هذا؟
اهم شي مستقبلك
طيب نفرض انك طلعت علشان كرامتك.. صاحبك مازال ماسك شغله و مبسوط 24 قيراط و اسلوبه معك مخليه يعيش برنس في بيئه العمل
وانت اللي تاكلها على راسك عشان "مذله وكرامه"

4- هو ما يعطيك شي من جيبه و لا حتى مديرك متكرم عليك .. انت تاخذ مقابل عمل تؤديه
ما احد متجمل عليك و حصولك عالوظيفه تحصيل حاصل علاقاتك الاجتماعيه
يعني انا لما اقرى بموضوع لك ان شركتكم فيها وظايف و ربي يكتب لي فيها نصيب .. خلاص اصير اسيرة جمايلك طول عمري؟


فكر بطريقه ايجابيه

اعتبر صاحبك تدريب على ضبط النفس و التعامل في الحياه الحقيقيه مع الناس الحقيقيين
وفرصه لك لصقل مهاراتك الاجتماعيه و المهنيه
اعتبر الاخطاء في العمل كورس مجاني عظيم لك علشان تتعلم وش الصح وكيف تأدي شغلك باحسن شكل
اعتبر الناس اللي قدامك بالعمل نماذج يحتذى بها في جميع النواحي .. اللي تشوفه ناجح في مجاله شوف و حلل نجاحه وسوي مثله

اما تستقيل عشان صديقك خايف عليك "خصوصا انه نصحك من قبل" معليش ما راح تتطور ولا تتعلم شي
بالعكس بترجع لورا و بتخسر بكذا صاحبك وشغلك

اشكره على خوفه عليك و خذ نصيحته بعين الاعتبار
انا لو اجيب صاحبتي مكان شغلي راح انصحها واوجهها م ولانها جايه عن طريقي
لكن ببساطه لاني اهتم لامرها واخاف على مصلحتها!!

هذا الموضوع باختصار

اما بتجلس تحارب علشان كرامتك ومشاعرك!! اسمح لي يعني العمل في الشركات ما راح يناسبك !

اعتقد عرفت مشكلتك وين تكمن فيه
انت تقول ((على النيه)) باين انك تجامل الناس وتعطيهم اكبر من حجمهم في العمل
فنصيحه اذا كنت كذلك خللك (ثقيييييييييييييييييييييييييييييييييييل) في العمل وابتعد عن المجاملات في العمل
واسال مجرب

كم راتبك ؟

وبقولك رايي

شوف يالغالي الشباب الي قبلي ماقصرو في النصايح

لكن انت اوزن امورك بمعنى اذا لك عقد انتها دور صاحبك

عقدك بكم ومتى ينتهي وشروط ابلاغ الشركة بعدم رغبتك بالاستمرار خلال شهرين او شهر

فيه برنامج عند شئون المؤظفين او الشخص المعني بمكتب العمل عشان يسقطك من التأمينات

اما خويك دام يرفع صوته عليك ويتمادا لا ياخوي كرامتي وكرامتك راس مالك ومالي

انا وصل فيني الامر قدمت شكوة على مؤظف في الشركة بقسم الشرطة إلى اليوم راح ابو مصير في خراطيشها ومستعد اهينه بس خل ظروفي تزين وربي الله اني اخليه يحب الارض الي جاء من مصر عشانها

بختصار كلللللللللللل شيء عادي إلا كرامتك !!!!!!!!!

ولازم تعرف ان كل قرية فيها خريه

ومن دون لحيتي الف لحيه

وانت فكر اذا 3000 ريال تخليك تستغني عن كرامتك وافق على النصايح الي فوق

الله يكون في عونك

رزقك عند الله .. ما هوب عند خلقه

وخل دائماً حديث الرسول صلى الله عليه وسلم , نصب عينيك في رزقك :
"إن أحدكم يجمع خلقه في بطن أمه أربعين يوماً ثم تكون في ذلك علقة مثل ذلك ثم تكون في ذلك مضغة مثل ذلك ثم يرسل الملك فينفخ فيه الروح ويؤمر بأربع كلمات : بكتب رزقه وأجله وعمله وشقي أو سعيد " .

ودائماً أطلب من الله الرزق ولا تطلبه من خلقه
وأعمل بالأسباب ..

والله اني مثلك جلست حول السنة وفي الاخير توظفت في شركة وقعدت 3 شهور وطلعت
ورحت لثانية وقعدت 8 شهور وطلعت واللحين في شركة لي شهرين وأفكر اطلع منها

والله ما عمري قلقت وقلت والله ما فيه أمل الاقي وظايف
ولكن بحكم اني مقدم على اكثر من 1000 شركة على النت ..

بمجرد ما أطلع من الشركة الاولى الاقي الشركات تدق على جوالي بعد اسبوع من خروجي
والله الرزق عند الله ما هوب عند خلقه .. ولكن اعمل بالاسباب وقدم على الشركات بنفسك وبالنت

وبرضو قدم على صندوق الموارد البشرية .. حط اوراقك عندهم وبيجيك رزقك براتب جيد

ولك رساله على الخاص .. فيها شيء يسرك بإذن الله

موفق ..