السلام عليكم

الصراحه انا شفت مشروع تحت ادارة يمني والعمال يمنيين بدون رخصه وما صدقت حتى شفت بعيني

وجلست مع المدير اليمني .. كيف!!! انا اقول لكم ..

الحقيقه كانت فيه مناسبة عشاء عند احد اعمامي في بيته وقد حضرنا في ذلك اليوم .. ومن باب التعاون
كلمت عمي اذا رغب في مساعده او شي .. قالي لا تعب نفسك انا جبت قهوجيه وصبابه . قلت خير

المهم رحت للقهوجي وسلمت عليه وكنت متوقع انه سعودي ماشاء الله راز نفسه بالغتره والعقال

والله انه معدل الغتره تقول سعودي . قلت له انت سعودي .قال: لا .انا يمني ودار بينا حوار طويل بس

انا بختصره لكم .

قلت له : من متى وانت تسوي القهوه والشاهي .قالي: من 5 سنوات . قلت له: تابعين لمحل او مؤسسه. قالي: ما يحتاج يارجال الجوال موجود وانا صرت معروف عند الكثير . قلت : طيب كم تاخذ اجر في كل مناسبه . قالي: شف الفلوس تختلف من مناسبه لاخرى يعني اذا زواج اخذ في اليوم 2000 ريال واذا غداء او عشاء اخذ الف ريال واحيانا اذا ما فيه شغل اقبل ب500 ريال .

قلت طيب: المبلغ شامل لكل شي . قالي: لا الصبابين لهم حساب ثاني في الزواجات 500 ريال لكل واحد وفي العزايم العاديه 300 ريال لكل واحد .

قلت : حلو الله يرزقك بس اتوقع انكم تشتغلون في الشهر مره او مرتين . قالي: بالعكس احنا في الشهر نطلع ما يقارب 30000 الف ثلاثين الف في الايام العاديه وفي العطله ايام الزواجات نتعدى الخمسين 50 الف . ( يارباااااااااه بدون رخصه) .

قلت طيب الي معاك منهم قالي : هذولا عيال عمي واقاربي ( كلهم لابسين غتر ) وقال لي : على فكره احنا اليوم كنا عند واحد كان عنده غداء بالف ريال وعمك عشاء بالف ريال يعني اليوميه الفين
قلت له : بالتوفيق الله يرزقك ومشيت من عنده وانا قاعد احسب كم يدخلون في الشهر .

حسبتها قلت : يعني لو يدخلون في اليوم اقل شي 1000 ريال × 30 يوم = 30000 الف
لو ما يشتغلون الا نص شهر 1000 × 15 = 15000 الف
في السنه كم تطلع 15000× 12 = 180000 الف مائة وثمانون الف في السنه من غير الشغل في الصيف وايام الزواجات .

بدون رخصه وبدون سجل تجاري وبدون ايجار محل


يعني لو فتحت مؤسسة نضاميه وبرخصه وبسجل تجاري وبسميها ( مؤسسة القهوه العربيه )
واحط منشورات في قصور الافراح والاستراحات واوزع عند الاشارات . واجيب عماله يمنين وادربهم
على عمل القهوه والشاهي والنعناع واعلمهم الترحيب وصب القهوه . مو احسن من هذا الاجنبي الي يعمل بدون رخصه ويدخل في السنه 180 الف ريال .......... اترك لكم التعليق

معقوله

ماشاء الله الف له لوحده في اليوم من غير العماله

الله يرزقنا ويرزقه يارب

ياليتني رجال كان اشتغلت

وين بعض الشباب النايم الله يهديهم بس ويرزقهم

أصلن يالحبيب هذآ العمل مايحتاااج رخصصصصصة ابدآ

ولا له ترخيص يقدر يشتغل هاليمني الي مب عاااجبك شششششششغل مخـــه ويطلعووون من الترآآآب ذهـــب لو شبابنا يفكر نص تفكير هالحضارم واليمنه والله لنصصصير فوووووق


مين اغنى بالموارد احنا ولا الامارات ورووح شششوف الامارات وشوووفنا حنا


العمانين الطلاب الي في بريطانية ياخذووون 2500باوند في الشهر غير السكن الطلاب السعوديون ياخذون 1180 باوند مع السكن

15 ألف ريال أو 30 ألف ريال في الشهر !! أقول.. كيف الحال !

ماشاء الله عجبتني الفكره وعجبني طريقه تفكير صاحب الموضوع يعني باختصار استفاد من تجربه القهوجيه اليمنه
يالله ياشباب الي مالقي وظيفه ليه مايصب قهوة المبلغ مشجع جدا لو انا شاب لااحترف هاذي الشغله وحنا على ابواب الصيف همتكم شباااااب
الله يوووووووووووووووفقكم

صحيح يكسبون وينافسونهم فيها الباكستانية خصوصا النساء مع أني ألاحظ مبالغة بعضهم في الأسعار

بالنسبة للرخصة مو ضروري وهذا عمل شريف لمسلم في بلاد الإسلام المهم إقامته نظامية ولا مارس عمل مخل يضر الوطن والسكان مثل غيره!

وأساسا لو تركوها قليل من السعوديين راح يشتغلوا فيها

الله يرزقهم

الله يرزق المسلمين انا شايفهم في مناسبه لا احد اقاربي جايين على جيب فكسار ومجهزين الشنطه بااغراض القهوه والشاي

احلى شغله مفاطيح وبوفيهات ووناسه وكل المسئله صب قهوووه
يالله همتكم يا شبابب
العمل ليس عيب, العيب تكون شنب وامامك الفرص وترضى يان يصرف عليك ابوك او امك

اذا بطلع موسسة اروح للغرفة التجارية
وكم العمال يعطوني هل فيه صعوبة

مشروع رائع جدا
بالتوفيق ان شاءالله