السلام عليكم

اسعد الله صباحكم/مسائكم بالخير

اليوم بتكلم عن دورة الامن العام اللي مضت 1432-1433
اللي انا كنت فيها طبعاً دورة مكه المكرمه

اول شي يوم انقبلت قبول نهائي كان يوم الاثنين على ما اعتقد والدوره كانت يوم السبت
خلال الايام ذي نومي قل صرت افكر بالدوره
وليلة الدوره ابد ابد ماجاني النووم تخيلوا رحت لهم مواصل
كانت الدوره 11-6 تاريخ لن ينسى
رحت لمدينة التدريب وانا خايف وافكر بالدوره^^^ لاتفكرون وتوسوسون زيي خلوكم رجاال
يوم وصلت والا اشووف العالم كلها لابسه زي بعض سروال كحلي وفلينه بيضاء
اهم شي فكوا الباب ودخلنا للتفتيش كان التعامل زفت فالتفتيش من المدربين
كاننا داخلين سجن وكاننا مجرمين مو عسكر
تعامل المدرب معك فالتفتيش يقول لك ارفع الشنطه^^ طبعا الشنطه فل من الملابس حقت ال45
يوم ترفع الشنطه يدخل يده فالشنطه وطلع الملابس ويرميها فالارض من باب النرفزه
بس انت خل وضعك طبيعي
راح يقول لك ياحيواان ياجزمه ياغبي ^^ ترى عاادي تخيل انه يقول لك يابطل يارجل يامحترم
وبعدها تروح تشوف تخصصك فالاوراق وتصف فمجموعتك

وتوقع تجيك سبه من اي محل ^^ شي مهم وانت داخل الدوره خل كرامتك برا وادخل بدوون كراامه

وبعد مايصفونكم يقولون لحد يتحرك ويسحبون عليكم فالشمس الين الظهر ويقولون يلا اطلعوا السكن حطوا عفشكم وانزلوا
وشلفته طول اليوم

الجدول اليومي"
يصحونك قبل الفجر بساعه ونص تقريباً الا ساعتين
طريقة الصحيان في جرس مززعج اسمه (برووقي)
يدقوونه ويسمعونه كل اللي فالسكن وعلى كذا يطلع لك مدربين للسكن ويقولون 10 عدات ولا اشووف اي احد فالسكن ولا اسجل اسمه وشغله الظهر
عااد اف اف اف لو تسجل اسمك رحت فخبر كان
يكرهونك العافيه الظهر بالجزوات
اهم شي تروح المسجد وباقي يمكن ساعه ونص عالصلاه
ولا ما يخلونك ترقد حتى لو جالس لو شافوك مغمض سجلوا اسمك وشغلك الظهر
بعد الصلاه حصه عباره عن هروله الين يقطعون نفسك مع تعلم بعض الحركات البسيطه بالتدرج يعني حبه حبه بالحركات لانك ماتعرف شي بالبدايه لمدة ساعه تقرباً

بعدها تروح تفطر وترجع حصه ثانيه
فالميدان تدريب حركات ايضاً
الين الساعه 10 قبل الظهر ينادون باسماء المخالفين اللي تسجلت اسمائهم


وكرف وقلت حيا وجزواات ومزيج من التهزيئ
تدرون ان تعب الدوره بنسبة 50% نفسي يعني لعب بالنفسيه وسب وقلت حيا
بس انتبهوا لا تاثر فيكم ذي زي ما قلت لكم ادخوا بدون كرامه انتم جاي لهدف وهي الوضيفه وكل مابيغت تفصل تذكر ان غيرك ألااااف يتمنون مكانك
وانت ماجيتها بسهوله الا بعد جهد جهيد
واذا فصلت انسى انك ترجع
فغير مفهمومه
ف ياحيوان=يابطل
ياجزمه = يارجل
ياغبي = ياذكي

اهم شي نكمل ^^وي وصلنا
اذا انصرفت من الحصه الثانيه انسى انك تشم ريحة السكن يرسونك للكفتريا
عاد انت وشطارتك مع الزحمه عالكافتيريا يا تلحق ياماتلحق
بعدها يدخلونك للمسجد لصلاة الظهر
وتطلع بعد الصلاه للصفه فالميدان الين اثنين يمكن عشان تحترق شوي من الشمس
وتدخل للميز وتتغدى
وتطلع تصف شوي ويصرفونك للمسجد لصلاة العصر
وبعدها حصة العصر ايضا تدريب وكرف
والمغرب ينغسون عليك
بالعربي ما يخلونك ترتاح تصليبه وثبوووت ولا تتحرك واللي يتحرك ياويليه
وسب
وبعد العشاء تصف ويلطعونك يمكن ساعه او اكثر وبعد تخش تتعشى
ترا الميز تخش له صف واحد وترتيب وبدون صوت تخيل هدوووووء وانت فالميز
صعبه صح الواحد مو متعود عالسكوت
وتطلع بعد العشاء سريع سريع وتصف الين 11 تقريبا واحيانا 12 وتطع تتنضف ووتروش وترقد
وانتهى اليوم

معلومات
ال45 يوم مو شرط تاخذها كلها يعني يمكن40 او 41 او42 او حولها
وراح تسمع الاشاعات عن الخروج الين تطفش لدرجة ان كل 5 دقايق اشاعه
ولازم تصدق وتضحك على نفسك عشان تمشي الوقت


فال45 في زياره للاقارب يجون يشوفون عياليم فترة العصريه يوم واحد فقط
يذلونك المدربين عليها
اذا صار منك اي شي قال سجل اسمه وماله زياره
الزياره تقريبا بعد اسوعين او ثلاثه يوم الخميس
وبعد الزياره يقولون لك الاسبوع الجاي في زياره واذا جاء الاربعاء قالوا اجلناها الاسبوع الجاي وهاكذا تنتهي ال45 بزياره وحده فقط والجوال احلم تشوفه مو تكلم به
احيان تحصل البنقالي حق الميز او الكافتريا وتقول له تكفى بكلم يقول لا لا مااافي
بعد محاولات عديده تكلم الدقيه ب30 ريال او 20ريال
والدخان نفس الجوال البكت يوصل ال50 ريال
كل ذا بالدس طبعاً

وتنتهي ال45 وتطلع وتشوف ناس لابسين اشمغه وتشوف سيارة تمشي وتشوف العالم اللي لك فتره ماشفته 45 عن 45 سنه

نصيحه نصيحه نصيحه لا تفكر تسحب او تفصل تذكر انك تعب وحصلت هالوضيفه

ولا تفشل ابوك وامك واهلك
لا قالوا لهم الناس بشروا وسوا ولدكم تطيع وجيههم ويقولون والله فصل ماقدر يكمل افااااااااا

وصل الله وسلم

اتمنى ان قلت كل شي وما نسيت
واي سؤال انا جاهز

اعذروني اذا في اخطأ لغويه او كتابيه لاني كاتب الموضع عالسريع

والسلام عليك

الله يجزاك الف خير وعافية

معلومات مفيدة

بيض الله وجهك اخوي

اخوي عندي استفسارين

1/ كيف ادرب نفسي على بداية الدورة يعني بالبديه احس بنفسي الحين مابغاها اقول صعبه واهانه ومثل هالكلام .
2/ اخوي انا فيني قصر نظر عادي لو ادخل بنظاره .؟ يعني فيه احد عندكم يـ لبس نظاره


الله يعطيك الف عافيه وبيض الله وجهك

اخوى بالنسبة للتعيين كيف وضعة للنسبة مدينة تدريب مكة ؟

لان في ولد خالتى اتخرج مهمات و واجبات من مكة وجاه التعيين في الباحة !!

الله يعطيك العافيه

التصليبه في الشمس الظهر مايجي الطلاب ضربة شمس
لان شمس مكه قويه

مدينة تدريب مكه مايمدحون مدربينهم
تعاملهم وسخ عكس الرياض يمدحونهم