[align=center]
السلآم عليكم ورحمه الله
قرأت مواضيعكم السابقه عن الزواج والمصاريف والمهر ..
وقرأت ردود الشباب .. وقرأت ردود البنات ..
وهنا كتبت وجهة نظري بموضوع آخر
بصراحه خلوني ابدي وجهة نظري بهالموضوع بما اني بنت

معظم البنات تحلم بعرس وحفل وشهر عسل وتسافر وتعيش حياتها ..
واللي هي مرحله مؤقته ..
وبعدها يبدأ الحمل ..
وتجيك البنت ما ابغى اولد الا بالمستشفى الفلاني .. بصراحه انا ما لومها اذا كانت واقعيه واختارت مستشفى ذو اهتمام وعنايه
لان مستشفياتنا الحكوميه بالحضيض وهذي الصراحه
لكن بعض البنات تدور اغلى وارقى المستشفيات عشان صديقتي ولدت فيه واللا بنت خالتي والا ,,,,
وبعدها مراسم الولادة وتجهيزاتها وعمل السابع اللي يمكن يغطي على حلفة زواجها وصارت الناس تتباهى فيه للاسف الشديد ..
( لاحظو ان الزوج باقي ما انتهى من القرض ولا من المديونيه )
بيروح ياخذ زياده من البنك غصب عنه..
بعدها يكبر هالطفل ويجي الثاني والثالث
وتبدأ مرحله البحث عن مدارس اهليه ونبدأ ببدايه الروضات تروح تدخل ولدها بروضه رسومها يمكن 14 الف وطالع
ومن الروضه للمدرسه وهلم جرا
:
لكن وللاسف بعدها تكثر الديون ويصير الزوج نفسيته بالحضيض .. ودائما عصبي .. ومايتحمل احد يقول له كيف الحال
انتهينا من البنات

.................

الشباب
ولاتزعلون
بدايه ما يتوظف ويطيح الراتب بيده ..
يلا بسافر بعيش حياتي .. كنت محروم ..
ومره المغرب ومره الامارات ومره اندونيسيا ..
الخ
وبعدها يجون الاهل ويلاحظون ولدهم ماصار يجلس كل اجازه وهو معلق بطائرة ..
وتجي وساوس الام
وتفكيرها الاستراتيجي ..
ولدي بيضع نفسه .. وتتصل على فلانه وتحكي لها القصه
عاد تجيك المصلحه الاجتماعيه وتقول ليه ماتزوجونه ترى بيعقل ..!!
وتبدأ الام تزن والاب كذلك بس الام دائما ما تتعب بعكس الاب
والولد ما عنده غير هالراتب لاهو اللي جمع للحياة الجديده ولاهو اللي مستعد ..
ويخطبون له البنت
ويجي الاب بتتزوج ماعندي مشكله بس وين راتبك
وساعتها جاك الموت ياتارك الصلاه لمن تنحسب المصاريف بتكون معجزه بالنسبه للشاب
وتبدأ فكره البنك والاتصال بالاصدقاء
فلان من فين اخذت القرض وكم النسبه ..!!
عاد تبدأ الاستشارات تتفاعل
ويوم ينشل على البنك المناسب تبدأ اجاراءات تحويل الراتب
ويتكمل العرس على خير
وتجيك بعدها المصاريف و...و....
وتتكمل الحياة بديون وضجر الزوجه .. وعصبيه الزوج
ونسأل الله السلآمه

:

اذن :-
فيه بعض الشباب هداهم الله مايقدر نعمة ربنا عليه واول ما يتوظف يبدأ بصرف الراتب على امور لاتسمن ولاتغني من جوع
وبعد الملل والتعب والعوده الى الطريق الصحيح يكتشف انه ما جمع شئ ولايقدر يتزوج وساعتها مافيه حل الا القروض والبنوك ..
وفيه بنات تفكيرها بالعنآن .. وماترضى بشئ عادي ..
وللاسف مرت عليا كثير
مثال على ذلك :-صديقتي مطلقه مرتين .. ودائما استغرب ليش تطلقت بالرغم انها اخلاق وحبوبه وجميله بعد
وفي يوم كنت اكلمها عن الم بأسناني وقلت لها ابغى طبيبة ممتازه شكلي بروح المستشفى الفلاني ....
قالت لا وع روحي لـ ..... ياشيخه يكفيك وانتي بالاستراحه تنتظري دورك بس تأملي بالديكورات
طبعا سألتها عن الكشف قالت 250 وتنظيف الاسنان بكذا والتلميع كذا
حسبتها يمكن الشغله كلها تكلفني 12 الف ول ول
وهنا بديت اتكلم معاها قالت انا يا اشواق سبب مشاكلي ما اقدر اعيش بوضع عادي بصراحه مو اي مستشفى اروح له
ولا اي لبس يعجبني
وبدأت تتكلم .
استمعت لها الى النهايه وبعدها قلت اسمحي لي انتي انسانه عاديه وتبغي تعيشي عيشه اثرياء
ليه لايكلف الله نفسا الا وسعها .. ابوكي راتبه 6000 وماشاء الله كلكم عايشين بشقه ايجار اربع غرف وسياره عاديه
ودرستي بطريقة عاديه وتخرجتي بطريقه عاديه ..
وتربيتي بطريقه عاديه
وتبغين زوج مو عادي ...........!!
يخلق لك من الجبل كومه ذهب
بصراحه حسيت انها اقتنعت شوي وبدأت تفكر بكلامي انها عايشه عيشه وهم ..
واحلام كاذبه..

..........

الحقيقه لو نفكر بالحياه ونعيشها بطريقه صحيحه ونبتعد عن الاسراف والتبذير والمنافسه ..
والتقليد .. بنقدر نعيش افضل حياه
ولكن الاخطاء اللي ذكرتها فوق اتحدى تقدر تعيش او تعيشي وترتاح نفسيا لانك مهما تحاول تتجنب مشكله بتطيح بمشكله اعظم ...
انا مثلكم اعيش واحلم والبس واسافر
ولكن في حدود المعقول ولايمكن اكلف على نفسي او اقلد فلان او اوهم نفسي بحياة خياليه ..
...
بنفس الوقت انا ما اقول لاتعيشو ا حياتكم ..
ولا تتمتعوا بالدنيا
كل شئ مسموح ولكن يا اخوان ويا اخوات في حدود المعقول

واسال الله تعالى التوفيق للجميع

ملآحظه :- ماذكر بعاليه عينه للمجتمع ليس الجميع كذلك .. ولكن لو فكرنا قليلا سنجد الغالبيه هذا حالها
[/align]

كلامك صح

بس فيه نقطه غلط

والله ويعلم الله اعرف بنات كثير مايهمهم الفشخره ولا احنا من اهلها مو عشان شي

لا بس من تواضع لله رفعه

وانا تعبت من الي اشوفه كثر المطلقات وشي مفجع على اتفه سبب قال طالق

يطلق عشان شكلها ويطلق بعد ماجاب منها درزن عيال قال مارتحت سلامااات وش يحس فيه

وكل واحد يطلع سالفه يطلق عشان مصاريف العيال كثرت ويطلق عشان شكلها وعشان لونها وعشانها ماتتزين له البنت تكرف بالبيت وتحمل وتجيب عيال وتربي وتطبخ ويبي تتزين 24 ساعه

حسوا البنت تصبر على ضربه واهانته وتصبر عالمر وعلى فقره وبالاخير قال ابي مثل نانسي والى هيفاء

يعلم الله انا نعرف اجانب يتمنون ظفر سعوديه بس يتزوجها ويحطها ملكه

الاجانب صاروا يضحكون على كلام السعوديين الي ينجرفون ورا الشكل الصناعي والي مع الايام يزول

صار الرجل السعودي حديث الخارج يسمونه الكبش وهو يفتخر بالقب يمر وينثر فلوسه الي جمعها حق شهر

وبحكم انها ماتسوى شي ببلده فببلاد الخارج تسوى كثير

للاسف اتمنى اتزوج من عربي غير السعودي افضل لنا منها عالاقل يسوون خير بالبلد ويطوروها شوي

اما الشعب السعودي افتحوا لهم البحرين والمغرب وفكونا منهم

وجهة نظري

وجهة نظرك على عيني ورآسي
ولكن ي أختي مو كل الرجال مثل ماذكرتي فيه رجآل يقدروا حريمهم ..
وحده من أخواتي وربي زوجها ينح على الجرح يبرى لدرجه اذا كانت بتروح زياره يمسك الاولاد لها عشان تلبس براحتها وتتكشخ
واذا كانت تشتغل بالبيت وتنظف وتكوي يقول لها لاتطبخي اشوفك تعبتي بجيب من المطعم ..
وعلى هذا كله تحلف انها احيانا تصحيه من النوم وتقول يافلان قوم طفشت بروحي يقوم ويطبع يمشيها ..
ماشاءالله تبارك الله
اصابعك ماهي سوآ والناس تختلف والدنيا فيها الخير وفيها الشر
بس المشكله حتى الزواج صار حظ مثل السمك بالمويه
ياتلاقين خير او تلاقين شر
واذا صار الزوج طيب ..صاروا اهله العكس وتتنغص الحياه
الدنيا صبر
ومو كل شئ نتمناه بجينا على طبق من ذهب ..
واسأل الله لي ولكم التوفيق

الزواج بالنسبة للشاب اصبح شبه مستحيل...ما في وظايف...واذا حصل بيكون راتبه بسيط ما يكفي شي

الله يرزقنا الجنة

مرحبا


أقول تربيتكم ممتازة

ماتبون تزوجون أحد أخوانك خخخخخخخخ

شوفي حبيبتي المفترض من الأول (مد رجليك على قد حااافك)

والرجل يبحث عن وحدة ترضى بوضعه الحالي لأنه مع الوقت أن شاءالله بيتغير


{خذوهم فقراء يغنيهم الله من فضله } إذا تحقق هذا الشيء بيرتاااح ويريح

وأوافق أمل أن في بنات يدورون الستر ومهورهم بسيطة وحدة من قريباتي

رغم أن مستوأأأكهم المعيش جيد الا إنها خذت وحد ومهرها 5000 فقط

وبعهد الرسول تزوج واحد والمهر خاتم حديد قال الرسول عليه الصلاة والسلام


:- التمس ولو خاتما من حديد.


وعلى قوله الأولين ,, ريال وشيمت الرجال ,, والي يبي الزواج الله كريم أن شاء يتيسر


شكرا ع الطرح المفيد

الله يوفقكم يارب

السلام عليكم ورحمة الله وبركاته"

بقولكم حاجه شي صارلي والله العظيم وبكون صادق معاكم السالفه ان امي قالت اللي معك تزوجو ونت لساع مع العلم يعني عمري مو كبير مره يعني25 المهم قلت لها طيب روحي اخطبي بس من عند مين قالت وحده من الجماعه والله صراحه فرحت يوم قالت لي من البيت الفلاني لاني اعرف امها طيبه جداااا والبنت مثل الام محترمه وخصوصا يعني من القرابه ومن جيهة الوالده المهم قالت بروح قلت لها احلى شي بتسوينه وكانت الارض ماتشيليني من الفرحه وراحت وبعد ماجت شفت خاطرها ما ذاك الزود قلت بشريني وش صار قالت ياولدي يقول ابو البنت مو موظف قلت خير انشاالله الله اللي يكتب لنا الخير لكن ياامي لي طلب عندك صغير ممكن قالت ابشر يانظر عيني قلت لها الجماعه اللي رفضوني لاتقطعين صلتك بهم ابيك تروحين عندهم وتزورينهم مو عشان رفضوني تقطعين علاقتك بهم وتغيرت ملامح امي من الحزن للفرح وقالت الله يكتب لك الوظيفه اللي تبيه والبنت اللي تبيها المهم سوت الولده مثل ماقلت والحمدلله انا توظفت الان وبخطب قريب انشالله ((((((((((((خلاصة الكلام بقولها لكم والله رفضوا يزوجوني بسبب الوظيفه مع الرغم اني قريب لهم جداا ثاني شي يعرفوني تمام اني انسان طيب ومحترم ووسيم ولا اقول هذا مادح نفسي لكن الواحد يقول الحمدلله اللي ربي خلق محبتي في الناس ولم يخلق محبتي في الفلوس و الحمدلله لك ياربي الحمدلله الله يديم علينا وعليكم الصحه والعافيه والله ويرزوقكم بالزوج الصالح بالوظيفه اللي احسن من وظيفتي رغم وظيفتي حكوميه وحلوه لكن اتمنى ان تكون لكم وظيفه افضل من وظيفتي وان يرزقكم بالانسان اللي يكون افضل مني الله يوفقكم في حياتكم ))))))

اخوكم /احمد الحربي

ايه وانا اختك كلامك سليم ميه بالميه

الله يرزقك شبابنا ويستر على بناتنا

اوافق اختي الفاضله اشواق

كلامك منطقي وسليييم بالمررره

واصبعك ماهي سواء ي اختي امل جده

بكل الجنسين فيهم الصالح والطالح

متمني لك ولكم جميعا حياة سعيده مليئه بالمفاجآت الحلوه

كنت هنا

سيف ونخله

بصراحة عين العقل

والله لو كل بنت تفكر بنفس عقليتك

ماكان وصلو الى هذى الحال

وربي يصلح الامور ان شاء الله