زوجة الاعمى
السلام على الكل....والحاضر يبلغ سلامي للغايب....
يحكي في قديم الزمن ان واحد اعمى وسمعه ثقيل تزوج وحدة تشوف كويس بدون نظارات
....(قولوا ما شاء الله)..المهم هالحرمة مسكينة كل يوم في سوق...وكل يوم في مول 
تبي تتزين لزوجها...وزوجها الله يرحمه مايشوف....ونص راتبها تحطه في المكياج 
عشان تغِير على زوجها وما تبيه يلتفت لأحد غيرها...
المهم كل يوم تجي متأخرة....وكل يوم زوجها يهاوشها....ما تسوي له الغدا....ولا العشا...
قررت انها ما تضيع راتبها...وقررت في نفس الوقت انها تكتفي بالموجود عندها....
وكل يوم تقوم الضعيفة من بدري وتلبس وتحط مكياج....وتتزين....وزوجها ما يشوف ولا شي.....
وفوق كذا تبي تقوله كم كلمة حلوة....وتسمع رده عليها....لكن لا حياة لمن تنادي...سمعه ثقيل...الين يوم من الايام قالت له الحياة كذا تقصر العمر معاك...والرجال ماهو حولها....
صحيت الصبح اخذت الونيت ودقت سلف على بيت اهلها اللي في الوادي الثاني ويوم طمرت الجبل 
الا الذيابة تلعب وتلف وتدور قالت بيت زوجي ازين.....و رجعت لزوجها....
ويوم دخلت الا زوجها زي ماهو.....الحرمة ارتفع عندها الضغط....وجلست تبكي وتولول....وبعدين هددته بالقتل......وانها بتعلقه على الخشبة اللي في المزرعة عشان تخوف به الحمام والطيور....يمكن تستفيد منه بعد ما يموت....لانه لما كان حي ما استفادت منه....
وبعد الوعيد والتهديد اللي قالته له....قالها سويتي الغدا....
الحرمة جاتها جلطة وماتت.....
للاسف....هذا حال مشجعين الكورة.....تلقاه مقطع نفسه عشان النادي الفلاني...وتلقاه لما يتكلم ...يتكلم بصيغة الجمع....وفي نهاية كل مباراة حاسمة اشوف العنف الغير مبرر.....بحجة ان الحكم ماحسب للفريق الثاني بلنتي....
مرة كنت ماشي جنب ملعب جدة....وما ادري ان فيه مباراة مع فريق مصري وما ادري الا وذاك الحجر اللي صافق في القزاز وكسره عن بكرة ابيه....يوم نزلت اشوف اللي رمى....ما ادري الا واحد يصيح يقول ياعياااااااال هذا يشجع الفريق المصري....قلت ياولد خلني انحاش قبل لا يلحق راسي القزاز....رحت صلحته اليوم الثاني.....نصحوني المقربين ان اروح اشتكي للشرطة 
....لكن رفضت بقوة لان الشرطة راقدة فوق الشعب اضف الى ذلك انها ما مسكت الحرامي وهو قدامهم وبصماته عندها...تبونهم يمكسون اللي كسر القزاز وهم مايدرون عنه....قم بس قم...
المشجع يصايح من على المقاعد.....ويوجه اللاعبين....
مرة رحت مع واحد للملعب....المباراة كانت بعد العشا...وحنا رايحين بعد العصر....المهم وصلنا قبل ماتوصل الفرق....ويوم بدت المباراة اسمع السب واللعن....والكلام الفاحش البذي....وتطاول على الاعراض...
صاحبي كان يتكلم مع واحد جنبه....يقول له::: احنا الاسبوع اللي راح تعادلنا في الدقايق الاخيرة.....وكان عندنا لاعب مصاب.....وكمان المباراة مو في ارضنا....على ارضهم....
بعد ما انتهى من نقاشه (العقيم) قلت له....متى لعبت الاسبوع اللي راح....انت مقابلني 39 ساعة في اليوم....لمدة شهرين.....قالي لعبنا يوم الاحد....قلت له يوم الاحد انا وانت كنا في الورشة نصلح السيارة اللي صدمت بها 
....وناسي يوم تقول لي تقدر تمشي السيارة على كفر واحد .....وناسي الدورية اللي صدمتها....
وبعدين من اللي مصاب....لا يكون ارتفع السكر عند ابوك....عارفك ثور كل يوم تعطيه تمر وانت عارف ان الدكتور مانعه منه....
ووش قصة الارض اللي لعبت عليها ....انا عارفك ما تحب تلعب....تحب تحط صابون وتقعد تزحلق وما تهجد الين تنكسر احدى ضلوعك.....
قالي احنا لعبنا.....قاطعته....وقلت له ياااااااااااااخي فهمني متى لعبت معهم وانت مقابل خلقتي ......فهمني لا تطير عقلي....ترى ماعاد فيه الا برج واحد
قالي فريقي لعب وتعادل.....
قلت له الظاهر انت منت صاحي.....شكلك كنت عند حمود الفاغر....وشارب معه شاهي.....وانا محذرك لاتشرب شي معه.....
قالي ياخي الفريق اللي اشجعه لعب.....وتعادل......قلت له هو اللي لعب على ارض ماهي بأرضه.....؟؟؟؟
قالي ايه....قلت له ولما جا صاحب الارض وش قال؟؟؟؟ لايكون جاب لكم الدورية....
قالي لا ما قال شي.....قلت له شكله سارق الارض ....والا لو يشوف ناس تلعب خارج اراضيها الاقليمية كان ردعهم......
قال لي ياخي انت شايب....ما تفهم شي في الكورة.....قلت له لي الشرف اني مترفع عن كل ما يضيع وقتي....وبعدين انا مادري وش اللي خلاني اجي معاك....قالي اسكت لا اصيح الحين واقول انك تشجع الفريق الثاني.....واخليهم يرفعون بك...قلت له صيح...لكن شوف لك واحد ثاني يرجعك البيت....قالي خلاص فك وافك....قلت له تم....
قلت له ممكن سوعال...قالي تفضل...قلت له شكرا....قالي عفوا....قلت له يعطيك العافية على ذوقك....قالي تسلم....قلت له الله يسلمك....قالي ميرسيم (يقصد ميرسيه)...قلت له ومن قال....قال لي يسعدك ربي....قلت له مشكور....قالي لا شكر على واجب....قلت له بنطول كذا....ما تبغاني اسعلك سوعال....قلت تفضل....قلت له يزيد فضلك....قالي الله يحفظك....قلت له لا حول ولا قوة الا بالله.....قالي لله درك....(ماأدري وش يبغى)....
قلت له خذ السوعال....هالحين انت تشجع ومنسدح فيذا من العصر ولا صلاة ولا احترام لأحد....لأنك تحب الفريق....طيب....اذا انهزم الفريق وش تسوي.؟؟
قالي : احزن.....
قلت له: ياحرام.....طيب في احد يواسيك.....
قالي : لا....
قلت له:طيب لو فاز وش تسوي.....؟؟؟
قالي : اعلق شعار الفريق على الصدامات......وألفلف جدة كلها ...
قلت له : كل هذا حب....؟؟؟
قالي ايوه
قلت له طيب....لو تزوجت.....وحبيت زوجتك....بتربطها بالصدام وتلفلف بها جدة؟؟عشان تعبر لها عن حبك..... يمكن ما تلحق تحس بحبك لها الا وهي في الشرشورة.....
قالي: لا مو كذا...
قلت له: اجل وشلون...
قال : من الفرحة الواحد ما يدري وش يسوي....
قلت له: انا بربطك بصدام الفورد حقي 
...وادور بك في جدة عشان اثبت لك اني احبك.....
وبعدين وش قصة الفرحة هذي اللي الكل عايش في وهمها....اي فرحة واي خمبقة هذي اللي تخليني افرح بإنجازات غيري....ومالي يد في تحقيقها....كفاك دلاخة....متى تفيق من غيبوبتك......
قلت له: انت تحب فريقك....؟؟؟؟
قالي : ايه....
قلت فريقك يدري انك تحبه....؟؟؟
قال : ما ادري....
قلت له: والله هو اللي مادري عنك وعن حبك 
.....ياخوي النادي اذا بيستفيد منك بيحبك...اذا ما له فايدة من وراك ما بيعطيك وجه.....عندك (ناديك يناديك) على قولت سيد زيان (شحاته معلبه)
وبعدين انت اللي تحب فقط......والحب من طرف واحد مذلة....اغلب حالات الطلاق تحصل لما الزوجين ما يحبون بعض.....يعني الزوج ما يحب الزوجة...والا العكس....
الحب اعلى واسمى من ان يفهمه محدودي التفكير....الحب شي راقي اذا كان بين المتزوجين....تتجدد الحياة به 
وانت مسكين ذابح نفسك وذابحني معاك ومسحبني من العصر الى الحين ولا صلينا المغرب ولا العشا.....بحجة انك تحب ناديك....وناديك مادري عنك.....والعشرين ريال قيمة التذكرة حرام فيهم....كان رحت اتعشى بها ازين لي....
ناط علينا ويقول وين اللي يقول ان النادي ما يحبني.....الجماهير كلهم طالعوا فيني....ويوم شفت وجهه قلت بيني وبين نفسي...انت امك وابوك يحبونك مجاملة....تبغى النادي يحبك.....؟؟؟
وبعد برهة دخلوا اللاعبين
شفتهم ملتمين
قلت الظاهر بيخلون المباراة ويطبون في بطني
.... حلفت اني ما اتفرج المباراة لاني خايف لا يجي في راسي قارورة والا شي ....ثم تشوفني زوجتي وتعيي علي.....وتكون حسرة ما بعدها حسرة.....طلعت اول ما بدأت المباراة والله يعوضني خير في العشرين ريال قيمة التذكرة....
طلعت وتركت مايسمى بالجمهور يعيش في الاحلام الوردية....والحب والتشجيع....والكلام الفاضي وتضييع الوقت.....المشكلة ان اللاعبين اللي يشجعهم الجمهور لهم مدخل ومخرج خاص بعيد عن قرف الجمهور....
أرى من وجهة نظري ان افضل وقت لتسوق العوايل هو وقت المباريات الكبيرة....يعني بين الهلال والنصر او الاتحاد والاهلي....او النهائيات.....
وارى ايضا انه لو لا قدر الله واحتلت بلدنا من المعتدي....انه بيتم تصنيف البلد على اساس الميول الكروية.....بعكس اللي حصل في العراق الان....عندهم شـيـعـي وسني...وحنا عندنا اهلاوي واتحادي ونصراوي
اتمنى من الاخوان اللي يهتمون بالكورة انهم يزودوني بجدول المباريات الجماهيرية لأني قاعد أأثث بيتي وكل يوم في سوق....عشان اسلم من الزحمة ....
باقي لي غرفة النوم....هذي يبيلها مباراة الاهلي والاتحاد...واللي يعرف رئيس النادي والا حكم المباراة يقوله يسلم عليك الدبلوماسي ويقولك خل المباراة تنتهي بضربات الجزاء عشان القى وقت كافي للتسوق....
والمطبخ اشوف له مباراة النصر والهلال....
حبذا لو تكون المباريات من الظهر الى بعد صلاة العشا....
الدوري الاوروبي ما ينفع لان المباريات تبدأ من بعد الساعة 10 في الليل...والمحلات تقفل....
قاتل الله الغباء....وقاتل الله الجهل......
ملاحظة: اقسم بالله العظيم....وعلى كتابه الكريم بأنني لا اتشرف بتشجيع أي نادي سعودي او عربي او خليجي او اسيوي او افريقي او اوروبي او امريكي جنوبي او امريكي شمالي او من القارة القطبية الجنوبية او من القارة الشمالية.....بما في ذلك مايسمى بالمنتخب السعودي
يعني لا احد يرد الا وهو مشغل الانوار....واذا الكهرب مقطوعه عنده....يكتب على نور السيارة.....
اشوفكم على خير......محبكم الدبلوماسي
24-03-2008, 01:14 AM
......والله العظيم ان شفت واحد داخل معه علبة فيري وقطعة قماش...اثاري الرجال كان يغسل سيارات وجا يتفرج على فريقه المفضل....ويوم انهزم فريقه قام يسب دين الحكم...والحكم مسلم....والسبب الميول الكروية....وبعدين نجد اللي يبرر له سب الدين ..... عجبي
العرض العادي
