11-05-2012, 07:38 PM
|
عضو جديد
|
|
تاريخ التسجيل: May 2012
المشاركات: 23
معدل تقييم المستوى: 214787
|
|
قصتي ..... مع الليموزين .... اكتشفت انه ذهب
بسم الله الرحمن الرحيم
في البداية :
أود أن أقول لكم
قبل بداية أي مشروع
... فكر... وادرس ... واعزم ... واستخر ... واستشير ..... وتوكل على الباري سبحانه
وضع هذه الكلمات نصب عينيك وهي :
(علمت أن رزقي لن يأخذه غيري فإطمئن قلبي)
أخوكم متزوج ولدي ابنتان ( الله يحفظهم )
وموظف بإحدى الجهات الحكومية
في بداية الأمر جمعت لي مبلغ 30000 آلف من وظيفتي وفكرت أن ادخل بها مشروع
ودخلت بها الأسهم وخسرت ما يقارب 5000 آلاف ريال
ويوم من الأيام جالس أتمشى بالسيارة وشدني كثرة الليموزينات وأقول في خاطري
على كثر هالليموزينات يا ترا يكسبون
رجعت البيت بحثت ودورت أي مواضيع عن الليموزينات
قريت وسالت ودخلت الفكره براسي
وطبقت
... فكر... وادرس ... واعزم ... واستخر ... واستشير ..... وتوكل على الباري سبحانه
ففكرت ودرست المشروع واستخرت الله سبحانه
وجيت للاستشارة
فوجدت ان 80% منهم معارضين
و 20% مؤيدين
80% كان يقولون لي :
1- صاحي انت تبي تصير باكستاني
2- يا اخوي مو مخليك ساهر بياخذ تعبك في اليوم في ثانيه ارقد بس
3- غثا وزحمه وش تبي بالغثا
4- انتبه الليموزينات فيها بلاوي
5- وووين تكسب منه من كثرة الليموزينات
الخلاصة :
أنواع التحطيم
جلست معي نفسي وفكرت
وقلت الشغل مو بعيب والعيب هو ان امد يدي لغيري
وتوكلت اللي ما تنام عينه
واستعنت بأخوي الأكبر الله يجزاه خير ووقف معي وأيدني
وعلى المعارض
ومن معرض لمعرض
ومن ساحه لساحه
مره بالنسيم ومره بالشفاء
جلست ثلاثة أسابيع وأنا أدور لي ليموزين ما حصلت على قد فلوسي
ان حصلت فهو غالي وان لقيت نفس سعري فهو تعبان بالحيل
تصدقون بعد الثلاثة أسابيع جاني إحباط
ولكن الحمد لله كنت اعزم ولا ايئس وأقول لعل في الأمر خيره
بعدها بأسبوع ولله الحمد لقيت هذاك السعودي بمعارض النسيم ( ونعم الرجل )
شكله طفش من زحمة السيارات وهالمكرفونات
وأعطيته سومتي
وقال أنت شراي قلت نعم
قال بعتك
يالله وش قد فرحت حسيتا ني أنجزت بعد كل هالاسابيع الي فيه التعب
رحنا فحصت السيارة وشرينا السيارة ولله الحمد
أول يوم طلعت الليموزين من المعررض بعد ما نقلت ملكيتها
بعد صلاة المغرب قلت
بسم الله وتوكلت على الله
واشتغلت
أول يوم من بعد صلاة المغرب إلى الساعة 11 بالليل
100 ريال
والله ثم والله أني أحس أن الريال والخمسة والعشرة لها طعم خاص
يا شباب لا يهمونك المحطمين واليائسين
الآن لي سنه كاملة .... قيمة التكسي طلعته منه ... ولله الحمد
نصائح لك اخي :
1- صف نيتك لله سبحانه وبتشوف الرزق
2- إياك والرزق الحرام
3- أن تتحلى بالصبر ( الكل يركه سيارة الليموزين ) أول ما يشووفك طااااااااااط
4- بالنسبة للنساء .. اذا ركبو اعتبرهم اهلك فالنسبه لي ... التزم الصمت ولا أتحدث ألا للضرورة
5- ابتواجه أجانب ما يركبون معك بمجرد يعرف انك سعودي يصرف ( انا ما فيه معلوم عربي او يبخس السعر او يروح ويطنشك ) فثق رزقك ما راح يأخذه غيرك ... فوسع خاطرك
أكيد أخواني بيسألون كم تربح يوميا ؟
طبعا بحكم اني موظف فداومي من 8 الى 2
ابدا الشغل بالتكسي على حسب من الساعة 5 الى 11 بالليل
احيانا من بعد المغرب الى 11 بالليل
على حسب اذا كان عندي ارتباط او لا
طبعا في البداية بحكم انك ما تعرف بعض الأماكن ولا تعرف التسعيرة الحقيقة لها
فأول شهر ... لازم تضحي به يعني لا ترد رزقك وصل حتى لو تشوف أن السعر قليل
طبعا انا الآن لي سنه
الخمسة شهور الأولى اطلع بالشهر من 2000 الى 2300 ريال
الثمان شهور المتبقيه من 3000 الى 4000 ريال
اطلع باليوم اذا اشتغلت من 5 الى 11 بالليل
100 الى 200 ريال
الخميس والجمعة من 250 الى 300 ريال
وعسى الله يوفقكم ويرزقكم من واسع رزقه
اعذروني كتبت على عجاله ... كان ودي انسق موضوعي أفضل من كذا
لكن الأهم أني أوصل فكرتي لأخواني لعل احد يستفيد
واكسب منهم دعوه بظهر الغيب
و لا تتردد اخي اذا عندك سؤال فانا حاضر
وفي الختام
لا تنسوني من صالح دعائكم
|
العرض العادي
