الجزء الثاني: في مطار الدمام
بعد ما أغمي علي في الطايرة...فقت وانا في مطار الدمام كنت ممد على الارض وكان حولي م.ع.ع.ح ومعه واحد لابس شماغ (من المباحث)
....ويسولفون عني.....انا كنت مسدوح ومتلثم بالشماغ وتوني فاتح وحدة من عيوني والثانية حطيت الطاقية فوقها .....كانوا يتكلمون عني....
اللي لابس شماغ: هذا خويك.....
م.ع.ع.ح : ايه خويي أباً عن جد....
ابو شماغ: من متى تعرفه....
م.ع.ع.ح: اعرفه من زمااااااااان يعني تقدر تقول 35 سنة....(اصلا انا عمري 28 ...يمكن قصده ابوة كان يعرف ابوي ...ووده يكمل المسيرة)...والرجل شروه....شروا من عندي...وشروا اللي في المطار كلهم....
ابو شماغ: خويك هذا مشتبه فيه....ومتهم بإختطاف طائرة....وممكن يكون في القائمة الجديدة للارهابيين....
م.ع.ع.ح انقلب وجهه: والله شوف ياخوي....الرجل هذا ما اعرفه....وان كان تبي الصدق....ترى ما عرفته الا من سنة وتقدر تقول اقل من سنه....وعن طريق النت
ابو شماغ: كيف تتعرف على واحد عن طريق النت....مو عيب عليك.....
م.ع.ع.ح: ياخي مافيها شي....انا قايل اني متعرف على بنت؟؟؟
ابو شماغ: خلاص لا تدقق.....
م.ع.ع.ح: يابن الحلال والله ثم والله ان ما وراه الا الدجة ولا يدري وين الله حاطه...شوف سدحته كيف....بالله هذي سدحة واحد صاحي.....
ابو شماغ: طيب هذا مغمي عليه....ومانقدر نحكم عليه من خلال سدحته الا اذا كان واعي....
قلت بيني وبين نفسي: واعي والا راعي ....الجوف
م.ع.ع.ح: انا اقصد انه حتى وهو صاحي وفي كامل وعيه...برضه مو في كامل وعيه...
ابو شماغ: يابن الحلال خذ بطاقته والله يستر عليكم....كلكم منتم صاحيين....والشرهه مو عليه....على الافدغ اللي بلغ عنه......لو اني مطنشه كان ازين....طلعني من البيت وعندي ضيوف....خذ بطاقته وانتبه له....
جا م.ع.ع.ح يصحيني ....
يا ابوالشباب قوم ...
انا : عفوا يالحبيب ...من معي؟
م.ع.ع.ح: يابن الحلال قوم بغيت تودينا في داهية....
انا: خير وش فيه...
م.ع.ع.ح: ياخي الضباط قبل شوي كانوا متجمعين حولك....وقالوا بيودونك جوانتانامو بس انا اعترضت...
انا: ليش .........هم اخذوا رأيك؟
م.ع.ع.ح: لا مو مسألة رأي...لكن ماخليت احد يمد يده عليك....
انا: قل قسم....
م.ع.ع.ح مايحتاج اقول قسم....كل اللي في المطار شافوني وانا ادافع عنك بشراسة....
انا : اقول هرجك لا يكثر....شل الشنطة الله لايهينك....
والرجال شال الشنطة من باب اكرام الضيف....ومن باب دفع الضرر...لأني كنت ناوي اخربها معه.....من اولها بكش
طلعت معه في السيارة
....وكل ما شاف واحد لابس شماغ قال شوف اللي كان بيقتلك كان لابس زي هالشماغ ....
التفت اليه وعنفته وانا اقول: مين اللي سدحته سدحة واحد مو صاحي؟؟؟؟؟ومين اللي ماعرفته الا عن طريق النت.....؟؟؟؟؟
طالع لي : ألا تريد وجبة عشاء....؟؟؟
فقلت ممازحا: كلا بتاتا البتة.....لقد شكراً لك
فنظر الي قائلا: لقد لازم والله....ولقد انني حلفت....
نظرت الي قائلا: لقد خلاص اوكي.....نروح نتناول وجبة العشاء....
نظر الي قائلا: لقد حسناً...
حقيقة توقعت انه يستخدم نفس السوبيا التي استخدمها ولم يدر بخلدي انه لا يدخن فكيف به يتعاطي السوبيا....
سفطنا عند احد المطاعم....وتناولنا وجبة عشاء في احد المطاعم المهجورة...ثم هممت ان ادفع الحساب فإذا به يسحب بيدي ويلويها ثم يرفعني بأقصى قوته ويدبج بي الارض وهو يزمجر بعنف قائلا: لقد علي الطلاق ان مايدفع الا انا.....
فما كان مني الا ان سحبت ماكينة الحساب وخبطت بها على راسه انتقاما منه.....وبعد ان تهاوشت معه وحسنا ام الدنيا....ظن البعض اننا من الفئة الضالة....فأبلغوا قوات الطواري....وكان قائد قوات الطواري (ابو شماغ اللي كان في المطار) واول ما شافنا مسك اللي بلغ عنا بتهمة ازعاج السلطات.....قال له هذولا مرفوع عنهم القلم....قال لي م.ع.ع.ح مين يقصد اللي مرفوع عنهم القلم...قلت له اللي يحاسب عند المطعم هذا....
بعد ما طلعنا من المطعم....وداني لشقة احد الاصحاب.....رقدت عنده بعد يوم مليء بالمتاعب....
الجزء الثالث:يوم التقديم
واليوم الثاني رحت لفندق الظهران
وحذفت ملفي
عندهم ...استفسرت من المسئول عن التقديم.....وعرفت ان اللي عنده خبرة اقل من 3 سنوات يحط ملفه ويروح....واللي عنده فوق الـ3 سنوات يحط ملفه وينتظر.....
فاستنتجت ان اللي خبرته اقل من 3 سنوات ما يحتاج يجي يعني يدف ملفه مع خويه...(وش رايكم في الذكاء)
اتصلت على احد المشرفين في البطالة.....لكن رقمه غير موجود في الخدمة مؤقتا....كنت ابغى اقوله ينزل موضوع في قسم الوظايف ويبلغ الاخوان ما في داعي يجون للي اقل من 3سنوات خبرة......
قلت الله يعينني اروح لمقهى انترنت وانزل الخبر....رحت لمقهى انترنت ونزلت رد في قسم الوظايف......
بعد خمس دقايق اتصل علي سلوم
دق علي قال لي كيف حالك ياحبيبي ؟
قلت له: اعوذ بالله....وش حبيبي هذي ؟؟؟؟ تبغى تدفعني للحرام....انا توني عقدت قراني ومافي داعي للف والدوران....زوجتي الوحيدة في قلبي...ومافي موقف شاغر عشان تسفط فيه...ولو تبلط المحيط الاطلسي ما راح تنال مرادك....قبح الله الغباء....اخلص علي تراني حايس نص ساعة ما ني عارف بيت خويي.....
قال لي : ياخي حرام عليك ليش القسوة ....ليش الجفا....ليش العنف....ليش ما تاخذ ملفي معك وتقدمه طالما مايحتاج اجي....
قلت له: طيب ارسله لي .....بس خلني اشوف فاكس يستقبل....وبالمرة بلغ العضو (............)وعطه رقم جوالي.....قال تم...
بعد برهات متعددة من الزمن لقيت فندق ...أخذت رقم الفاكس....ورسلته لحبيبنا سلوم.....ورسلته لـ (..............) قلت له بكرة اروح استلم الاوراق من الفندق.....
واليوم الثاني كانت المفاجأة......
حساب الفاكس طلع 64 ريال في اليوم الاول.....و102 في اليوم الثاني.....و 38 ريال في اليوم الثالث.....
رقم الفاكس انتشر انتشار النار في محطة بنزين
.....اخذت الاوراق ....ورحت لفندق الظهران.....ضيعت المدخل وطبيت في قصر واحد واصل...الظاهر انه امير....والمشكلة ان مافيه طريق واحد هو المدخل والمخرج....يعني اذا دخلت ....تديور والا تدق ريوس وتطلع....
وانا داخل شفت المكان ما يخارج.....جيت بدق ريوس ....الا اسمع واحد ينادي علي بمكبر الصوت ويقول:: ياراعي البيجو
سلم نفسك....
طنشته قلت يمكن يقصد خويي.....رجعت ريوس بسرعة والا اسمع طلقات رشاش في الهوا.....
شوية الا جاني واحد مسكني وبطحني على الارض......مشكلة والله الواحد ينبطح في ديرة ما هي ديرته....كنت خايف لا يجي واحد يصورني بلوتوث ويرسلها لعمي...بعدين مايوافق علي لأني انسان خربان.....
[IMG]http://www.al-maistro.com/myt/*****/2/skraaan.jpg[/IMG]
بالله من يرضى يزوج بنته واحد مبطوح....وفي ديرة ماهي ديرته....وانا مبطوح كنت حاط الملفات على وجهي خايف من كاميرات المراقبة....الضابط اللي في المباحث مسكني وحط يدي ورا ظهري وشال الملفات اللي كنت مغطي فيها وجهي....ويوم شافني ....اصابه الذهول.....طلع خوينا اللي كان لابس شماغ في المطار ......سقطت دموعه من الاسى والحزن....سألته لماذا تبكي يا أخا العرب....فقال لي: اعمل في المباحث برتبة نقيب....ومن يوم باشرت العمل لم استطع ان اقبض على أي مطلوبين للعدالة...جميع من اقبض عليه هم متخلفين عقليا...او مشتبه فيهم فقط....اي بعد التحقيق يطلق سراحهم...وخلال ثلاثة ايام قبضت عليك ثلاثة مرات...كل مرة على حدة....وشكلك لا يوحي بأنك مطلوب امنيا....
نظرت اليه وانا اربت بيدي (وهي مكلبشة ) على كتفيه قائلا: اشكرك ياخي ....هذا من طيب اصلك....
فقال لي: اعتقد انك لست من هذه الديرة....اليس ذلك صحيحا....
قلت له: نعم انهو صحيحا.....هلا فكيت قيدي ....ووضعت الملفات على وجهي...
فقال لي : حسنا حسنا...
قلت له: بسرعة بسرعة....
فك القيود (*****شات) من يدي وطلعت على فندق الظهران سييييييييدة وعطيتهم الملفات.....وعدت ادراجي لشقة خويي.....
بعد صلاة العصر اتصل علي المدعو م.ع.ع.ح وقال لي اجيك الحين عشان نتمشى قلت له اوكي.....
البقية في الحلقة القادمة
31-03-2008, 03:14 AM
، تكفى تهز الجبال الصلافيح ، 
العرض العادي
