الجزء الخامس: في البحرين وما ادراك ما البحرين
بعد الحادث بيوم اتصل علي م.ع.ع.ح قالي انت جبت اوراقك الرسمية كاملة من اثباتات وشهادات و....قاطعته قائلا: حتى جواز السفر معي....قال لي طيب اجيك الساعة 1.30 ظهرا.....قلت له وش نسوي في عز القايلة....قالي قايلتنا تخلص قبل قايلتكم (عندهم يصلون الظهر الساعة 12 تقريبا....والمغرب يصلونه قبلنا بساعة الا ربع تقريبا....شكلي بصوم في الشرقية السنة هذي)
قلت له اوكي....
جاني في الوقت اللي حدده ....واول ما طلعت...نظر لي بخبث وقال لي جوازك معك....رديت عليه بخبث....ايه معي....ثم ضحكنا سوياً....
تغدينا ....وبعدين اتجهنا لجسر الملك فهد
طبعا انا سلكت المسار المخصص لي كدبلوماسي....الا ان النشبة اللي معي خرب علي البرسيج بتاعي
....وكل خمس دقايق نوقف...ونمر على شباك وندفع رسوم...وناخذ اوراق....ونحط اوراق ...وشغلانه طويلة عريضة....كأني بطلع كرت عايلة جديد...
المهم بعد ما دوخونا....طلعنا على جسر الملك فهد ....وحنا ماشيين جنب البحر حسيت بدوخة....والمدعو م.ع.ع.ح يقرب من الحاجز ....لا...وفوق كذا يقولي ننزل نتفرج....قلت له يابن الحلال تنازلت عن وظيفة طيار
عشاني ادوخ اذا طالعت من فوق....وانت الحين تبغى تهبل بي....مشى م.ع.ع.ح وخاطره مو طيب.... وصلنا للبحرين
ودخلنا لمجمع السيف وصلنا هناك بعد صلاة العصر...دخلنا المجمع وصلينا العصر....بعد ما انتهينا من الصلاة طلعنا نتفرج في السينما....اول مرة اشوف تلفزيون بهالكبر....دخلت انا والمدعو م.ع.ع.ح جلسنا في اخر الصالة....كأننا في فصل دراسي...وبعد خمس دقايق بدا الفلم...وانا على بالي ان الممثلين بيجون ويسلمون علينا زي المسرحيات المصرية..وبدا الفلم...مدري وش اسمه....كل اللي فيه اجانب....ويتكلمون انجليزي ....وكان الصوت مرتفع جدا....لدرجة اني كل شوي اطلع اكلم برا....وارجع مرة ثانية ....وكل ما يدق جوالي اسمع صياح وسب من المشاهدين....الين وحدة قامت واعطت م.ع.ع.ح شلوت تحسب ان جواله دق
....وتقوم هوشة...بين م.ع.ع.ح وواحد بحريني....قمت افارع خصوصا وان ما حد انتبه لهم...وبعدين لو انضرب م.ع.ع.ح كيف ارجع للخبر...ما أدل الطريق....
المهم...دق جوالي للمرة العشرون بعد الالف...واقوم ادور على الريموت....ابغى اوطي الصوت عشان اقدر اكلم....وتقوم علي وحدة بحرينية وتهزء فيني ..تقول لي جليييييييييييييييييييييل الحيا مع اني ماسويت شي..وانا ساكت ....ما ابغى امد يدي على حرمة....وفي نفس الوقت متعافية.....يعني بحركة المرفق توديني في خبر كان.....سحبني المدعو م.ع.ع.ح وأسمعني كلام لايليق بي....وهددته ان عاود تجريحي مرة اخرى سأكتب عنه في اكبر المنتديات العالمية....وبعد ان تماديت في تهديده اومأ لي بأن كل تبن تراك ازعجتنا....
خفضت رأسي بعد ان قام بطل الفلم بتوجيه تهديد شديد اللهجة لي وهددني بنقل غمار المعكرة الى داخل صالة السينما ...وهدد ايضا بأن يعتقلني ويأخذني كأسير الى ان ينتهي الفلم....نظرت الى م.ع.ع.ح ولمحت علامات الفرح باديه على محياة مما قاله بطل الفلم....وانه سيعود الى الخبر وحيداً بدوني....فهمت الاشارات اللي كانت بينه وبين بطل الفلم....ومما زاد شكوكي ان بطل الفلم حينما يقتل أي شخص ...كان يرمقني بنظرة....(كأنه يقول اعقل والا اذبحك مثله).....
كنت اتجاهل مايقوم به هذا البطل الوهمي...خصوصا وان صيحات الجماهير (اقصد صيحات المشاهدين) تعلو بين الفينة والاخرى....وكنت ارد عليه بنظرة استحقار....
وبعد مشهد دامٍ ....نظر الي البطل وهو في قمة الغضب....فضحكت ضحكة اقرب ماتكون الى القهقه منها الى الضحكة....حينها اوقف البطل احداث الفلم قائلا : stop
وترجل من شاشة السينما واخذ مكبر الصوت وهو يتكلم بالانجليزية ويشير الي بكلتا يديه ....ثم اجهش يبكي.......
لم افهم ماتفوه به هذا البطل الوهمي....ولكني فمهت من احد المشاهدين بأن بطل الفلم لا يرحب بي كمشاهد....ولن يكمل الفلم الا اذا رحلت...وقال ايضا....بأن اللي جالس وراي كان يبي يلطش الجوال....
ازداد غيظي من بطل الفلم وقمت له واخذت مكبر الصوت....ثم قلت له....: ياصديق ليش مافي شيل نفر حرامي....نظر الي ...وهو لايكاد يظهر أي علامة لقبول ما قلته له...فأومأت له بأني سأحضر العجرة معي.....حينها نظر لي قائلا: no….i cannot believe....
قلت له: وراك شابك كان في نوت.....
شوي الا والرجال انهبل....كأن في جني دخل فيه....وطلع من باب السينما.....
والناس تطالع فيني اللي يسب واللي يلعن فيني....خربت عليهم الفلم...اسمع م.ع.ع.ح يقول بصوت عالي...من فين طلع لنا الجرذ هاذا....(كله كوم والالف اللي بين الهاء والذال كوم)
بعد برهات قليلة المخرج يطالع لي من الشاشة...يقول لي : كم....
قلت له : اثنين....انا وم.ع.ع.ح..قالي ..اقولك come يعني تعال....مو how muchقلت له طيب
المهم دار بيني وبينه هالحوار.....طبعا الحوار مترجم للي مايعرف انجليزي.....
المخرج:look ya father of young (شوف يابو الشباب)
انا: oh…my god….even you have father of young (يــــالله ...حتى انتم عندكم ابو الشباب)
المخرج:listen to and do crossing me or I will hit you (اسمعني ولا تقاطعني والا ترا بأفرشك)
انا: you hit me…..give a lot (انت تفرشني...كثر منها)
المخرج:the champion leaving the film(البطل غادر الفلم...)
انا: let him go to sixty problem….i know very he is from paper (خليه يروح في ستين داهية.....انا اعلم جيدا بأنه بطل من ورق)
المخرج
e need you (نحن نحتاجك)
انا: yes my brother…you need who??say it again !!!!! (نعم ياخوية!!!!!تبغى مين؟؟؟؟قولها مرة ثانية)
المخرج: please help me…..i cannot do any thing without you(تكفي ساعدني انا لا استطيع ان افعل أي شي بدونك)
انا
y eyes in the love…..i say……drive it without be dust(ياعيني على الحب....اقول....سقها ولا تغبر)
بكي المخرج....وناشد اهل القلوب الرحيمة ان يتدخلوا لحل المشكلة.....وبعد اخذ ورد قررت ان اشارك في بطولة الفلم...وانه يعطيني 8000 ريال مقابل اني اقوم بدور البطل...
ولكني اشترطت ان يرافقني م.ع.ع.ح في بطولة الفلم....
وافق المخرج على مضض.....المخرج طلع بنطلون من الكيس اللي معه ورماه لي وقالي البسه.....وم.ع.ع.ح خلاه السواق الخاص بي....
مسكت المخرج...قلت له شوف....اما اني انا اللي اسوق البي ام دبليو....والا ماابغى امثل معاكم....
قالي ياخي السيناريو يقول انك تاخذ الجمس وتفجره في مقر العصابة بعدين يجي م.ع.ع.ح ينقذك بالبي ام دبليو
قلت له ياخي هذا غشيم ما يعرف يسوق.....تصدق....صدم بنا قدام مركز المرور....والحين تبغاه ينقذني....ياشيخ اذا ماسلمني لرئيس العصابة شنبي هذا
جلست احاول في المخرج يخليني اسوق البي ام دبليو ...والا حتى يعطيني دوره...لكنه رفض.....
المهم كان المشهد عبارة عن جمس يقتحم عزبة لعصابة ترويج مخدارت...ويكون م.ع.ع.ح ينتظرني في اللفة....
شوي واسمع المخرج يقول 3....2.....1.....اكششششششششششششششن....
واجي انا دااااااااااعس بالجمس ويوم قربت من باب العزبة...الا ويطلع لي م.ع.ع.ح بالبي ام دبليو....واحاول اتفاداه....طباااااااااااااااااااااع
......في شنطة البي ام
....وينزل م.ع.ع.ح يعرج....ويطالع فيني ويقول لي : هيا بنا ننحاش....لقد العصابة في الداخل...مسكته مع اذنه واقوله : أي عصابة واي عزبة....منت سامع المخرج يقول اسطب (stop)....خل العصابة بعدين ....وخلنا نشوف حل في البلوة اللي حطيتنا فيها....
المهم جانا المخرج...وسوا لنا قلق....جاب المرور وسووا كرووكي للحادث حطو الخطأ علي....العسكري يقول اني كنت في غير وعيي (يعني كنت سكران) قلت له طيب المخرج قالي اسكر....قال العسكري سدد المخالفة بعدين يصير خير....
المهم المشهد الثاني كنت ابقتحم العزبة بعد ما فشلت في تفجيرها....وم.ع.ع.ح اول ما يشوفني نزلت بالحبل من السطح .....يطلق الرصاص بشكل عشوائي عشان يخوف العصابة...
وادخل انا من السطح ....كنت ماسك بالحبل....
وانزل شوية شوية...اول ماشافني م.ع.ع.ح اطلق النار بشكل عشوائي وتجي رصاصة في الحبل....واطيح على ظهري....والعصابة حطت رجلها....
بعد ماطحت على ظهري اغمي علي ...صحيت بعد خمس دقايق....التفت لم.ع.ع.ح لقيته قاعد يحشى الرشاش اللي معه بالرصاص على باله بيقتل مهربين المخدرات...ويقول لي : لا بأس عليك.....خذ هذا السلاح ودعنا نخلص البشرية من هؤلاء الاشرار ....اخذت الرشاش منه وانا اقول له: هيا بنا سويا لنقتلهم ونقدمهم للعدالة....دخلنا من تحت طاولة ونشوف رجل واحد....م.ع.ع.ح يقول لي : اطخه....؟؟؟قلت له: لله ياولد العم....والله ما يطخه غيري انا....وانسدح ....واطخه ....والرجال يقعد يصييح....وتجي الاف بي أي وتشيله وتوديه المستشفى....
المهم جانا المخرج واخذ الاسلحه والملابس ومفاتيح الجمس والبي ام دبليو...وقال لنا توكلوا على الله....انتهى الفلم
ويمسكنا ويحذف بنا على شاشة السينما....وكل واحد على كرسيه ولا كلمة.....
احسن شي في السينما ان الانوار مطفية....يعني ماحد انتبه لنا...واول ما طلعنا ...اشوف الكاميرات...والصحفيين....واطلع انا وم.ع.ع.ح اول ناس....ويسئلني الصحفي مارايك في الفلم: قلت له حقيقة الفلم كان رائع جدا وكان يحتوي على عدة لمسات فنية ....وبالرغم من الازعاج الا انه حاز على رضا العديد من المشاهدين.....
بعد ما انهيت التصريح طلعنا للسيارة....شويه الا ابوي متصل علي:
ابوية : وينك....؟
انا: انا في الجبيل راقد عند خويي....
ابوية: عند خويك ياكذاب......توني شايفك في التلفزيون....في البحرين يالداشر...
انا: اللي كان يتكلم عن الفلم .....وقال انه حاز على رضا المشاهدين؟؟؟
ابوية: ايووووووة...
انا : لا مو انا....هذا واحد يشبهني....يمكن ابراهيم اخوية في البحرين....والا يمكن اللقاء قديم ومسجل.....
شوي م.ع.ع.ح يقولي عند دينار بحريني عشان نشتري شريحة جوال....
ابوي سمع م.ع.ع.ح....وقعد يتحلف لي وفجأة انقطع الخط....
انا اكلت معي وشربت....يعني مسكت على الدينار ...وبحريني كمان...يعني كان يقدر يحولها لريال سعودي ويقول عندك عشرة ريال....
المهم مسكت م.ع.ع.ح وضربت راسه في الدركسون ....وشوي الا اغمي عليه.....وينسدح على كرسي السواق....
وانا اقعد بها...ما اعرف ولا شي في البحرين...واحاول اصحي فيه ...مافي امل يصحى...وكل مايمر علي واحد اسأله : ما تعرف طريق يودينا للخبر....خويي مغمي عليه...ومن حظي ما طبيت الا في خواجات...المشكلة انهم مايعرفون انجلايزي....واطب في واحد هندي..قلت له ياصديق ماتعرف الطريق اللي جينا له من الخبر الى هنا....قال الهندي مافي معلوم.....شوي ...الا جاني الفرج....صحي المدعو م.ع.ع.ح....طالع فيني وقال لي : وش سوينا في الفلم؟؟ قلت له: فيه وحدة صورتنا ...والظاهر انها نشرتها في التلفزيون...تبي سبق صحفي....وفي ناس كثير صورونا.......شوي الا وجهه انقلب....قلت له وشفيك....قال قلت لأبوي بروح عند عمي في الدمام وهو مايدري اني فيذا....قلت له افاااا حتى انت بكاش (بكاش يعني كذاب عند اهل جدة)....ويوم قام الا ابوه متصل عليه.....وينك يالداشر.....ماتقولي انك رايح لعمك في الدمام؟؟؟ يوم سمعت ابوه يهاوشه قربت من الجوال وقلت له يام.ع.ع.ح ماعندك دينار بحريني لأن لي ساعة وانا ادور صرف في مجمع السيف بالبحرين....شوي الا الرجال يطالع فيني وعيونه بتطلع....قالي ابوي سمعك....قلت له احمد ربك انها جات على دينار بحريني والا كنت بقوله دولار بريطاني عشان انكبك عنده من جد,,,,,شوي الا الرجال يطالع فيني ووجهه صار كنه قوطي صلصلة ويقول لي : الخزي والعار لك يالدبلوماسي ....الخزي والعار لك يالدبلوماسي...يوم قال هالكلمة مادريت بنفسي الا وانا واقف فوق السيارة وانط عليه بالكوع زي الحانوتي
[IMG]http://www.*****.net/images/news/200601301836197.jpg[/IMG]
لما تهاوش مع اخوه كين عشان الحانوتي كل يوم يودي خواته للمدرسة وكين ماغير يسربت في الشوارع ولا يجي الا بعد صلاة الفجر....
البقية في الحلقة القادمة
02-04-2008, 03:02 PM
العرض العادي
