السلام عليكم ورحمة الله وبركاته

اخواني .. اخواتي / اسعد الله جميع اوقاتكم بالخير والمسرات

الحقيقه كما يقال (( الشكوى لغير الله مذله )) ولكن ابي اقول (( فضفضه )) .

ساعرفكم بنفسي اولاً

المنطقه : الرياض

العمر : 28 سنه

الحاله الاجتماعيه : متزوج وأب لطفلين الله يحفظهم لي

....................



سأبدا قصتي : (( وسامحوني بالاطاله ))

تقدمت للعمل في شركه في منطقة الرياض عام 1429

وكان هناك اعلان واتصلت بهم وعملت مقابله والحمد لله توفقت وقبلوني عندهم

على وظيفة (( سكرتير ))

جاء وقت توقيع العقد

الراتب الاساسي : 2500 ريال

بدل سكن : 500

بدل مواصلات : 500

الاجمالي : 3500

حمدت ربي وقلت نعمه 3500 تسسد الحاجه وأقل شي تغنيني عن جلسة البيت

داومت اول يوم وكانت فتره العمل طويله شوي

من الساعه 8 الصباح حتى الساعه 5 العصر

الحقيقه لا اظلمهم فيه بريك مدته 45 دقيقه الساعه 1 الظهر ونرجع الساعه 1:45

ولكن انا مكان سكني بعيد حييل عن مقر الشركه ولا اقدر اروح للبيت وارجع للشركه


في بداية دوامي بأول يوم تفاجئت بأن طبيعة العمل ليسس سكرتير .

سألت مديري الاجنبي قلت المفروض السكرتير يكون عمله كذا وكذا وكذا

قال انتظر يومين وثلاث ونحولك لعملك اللي اتفقنا عليه ومدري شنو

سكت انا وقلت اوكي اللي تشوفه اهم شي اني اعمل حسب اتفاقيتنا

ثاني يوم اعطاني اوراق خاصه فيه (( طلب زياره عائليه لوالدته )) قال ابغاك تسوي طلب من موقع الوزاره وتطبعها وتاخذ (( 25 ريال )) وتصدقها من الغرفه التجاريه . . !

انا الحقيقه مدري وش السالفه قلت انا الان معقب او سكرتير . . ؟

قال تقدر تخدمني في هالشي او انا اقفل مكتبي واترك اعمالي واسويها . . ؟

انا بصراحه قلت مابي ياخذ عني فكره سيئه واخذت اوراقه وسويت له طلب الزياره وطبعتها واخذتها للغرفه التجاريه وصدقتها ورجعتها له

المهم ما اطيل عليكم اكتشفت ان وظيفتي مو سكرتير لا وظيفتي ( معقب )

قلت طيب معقب معقب وش المشكله اهم شي اداوم

بعد تقريبا 5 شهور جاء واحد سعودي بالشركه وسالني قال انت جديد قلت لي 5 شهور قال الله يعينك وصار يضحك وحسيت بداخله كلام كثييييييير

المهم قلت انت مين . .؟

قال انا شخص توظفت هنا وجلست 5 سنوات ولكن للاسف هالـ 5 سنوات ندمت اني قضيتها بهالشركه .

انا بصراحه لا اخفيكم قلت شكل الرجال مقدم على الوظيفه ويبي يخليني اتركها يجي فيها

(( وسوس لي الشيطان )) ههههههه

واستمريت معهم على وظيفة معقب وبسيارتي الخاصه اخلص معاملات الشركه

وجلست تقريبا سنتين نفس الراتب ماتغير 3500 والدوام كرف قليله بحقه شغل مو طبيعي

طبعا خلال هالسنتين يعطوني معاملات اللي اعرفه انه تخصص شخص يقال له (( محصل )) مو (( معقب )) يعني فلوس ومستحقات ماليه للشركه

بعد سنتين اكتشفت اني اعمل على ثلاث وظائف (( مدخل بيانات + محصل + معقب )) والسكرتير الي سجلت عندهم ما عملت بهالوظيفه ابدا

المهم بعد سنتين تعبت نفسيا وصار استغلال غير طبيعي من الاجانب بأنها اجراءتهم الخاصه

طلبت زيادة راتب وزودوني 500 ريال

وصار الراتب الاساسي : 2500

بدل السكن :750

بدل المواصلات : 750

الاجمالي : 4000 ريال

واعطوني مهمه جديده الا وهي الموارد البشريه

وصرت اعمل كالتالي : معقب + محصل + مدخل بيانات وكاتب + موارد بشريه

والراتب 4 الاف ريال

المفروض انهم يوظفون 4 موظفين يعني غيري 3 موظفين

بسس مايبون يدفعون راتب زياده يكرفوني انا لين اتفل العافيه براتب 4 الاف

المهم جلسست تقريبا سنه بعد الزياده وطلبت زياده ثانيه ورفضوا وسكت

الحقيقه تكلمت معهم بهالموضوع قلت انا اعمل على 4 وظائف والراتب 4 الاف

للمعلوميه جميع الاجانب اقل واحد فيهم راتبه 7500 ريال

وانا يالسعودي ابن البلد واللي مشغلين بالاربع وظائف 4 الاف ليشش الظلم

المهم قبل فتره تقريبا شهرين طلبت زياده او انني اعمل على وظيفه وحده فقط

رفضوا وقالوا انت تعمل اي عمل نطلبه منك وصار فيه اساءه من مدير الشركه الاجنبي

وحصل بيني وبينه مشاده كلاميه وقلت انا تحملت اخطاء الشركه وصلحت اخطاء مسستحيل تنصلح

والله ياعالم اني اكلم معارفي واكلم ناس يتوسطون بالوزارات عشان الشركه تخلص معاملاتها

يعني لو واحد ثاني يتعامل بالنظام وغير النظام وبواسطه مالي شغل

بس انا اعمل بضضضضضضمير واعتبر هالشركه كانها لي واخر شي يعاملوني كذا


للمعلوميه 3 مرات اصدم بسيارتي والله وثم والله كلها بمجال العمل ييعني اخلص لهم المعاملات

ولا عمرهم قالوا ندفع لك نص قيمة الاصلاح

واصلحها من راتبي واتسلف واخذ ديون عشان بس اصلحها


المهم اخر شي تركت الوظيفه لاني بصراحه تعبت نفسيا معامله سيئه ولا اخذ مقابل مادي لشغلي وللعمل الشاق الي اسويه

والحين انا ابحث عن عمل وجالس بالبيت وعسى الله يرزقني ويعوضني خيير


هذي قصصصتي من اولها لأخرها ودعواتكم لي بأني اجد عمل مناسب

واسسف جدا جدا على الاطاله

وعليكم السلام والرحمه

حياك الله يامتفائل

قريت قصتك من اولها الين اخرها

سبحان الله انت نفس وضعي

اشتغلت في شركه وظيفتي ( مدخل بيانات )

و نيتي وطيبتي الزايده صرت اراجع اوراق الشركه في وزاره العمل والتامينات الاجتماعيه وووو ..الخ

وعلى سيارتي الخاصه وكل الشغل الي اسويه لهم ما استفدت منه شئ لاني شخص اسكت واستحي

طبعا والراتب 3000 مخصوم منها 270 ريال للتامينات الي ينزل بالصرافه 2730 ريال !!

داومت ثلاث اشهر وشفت اني صرت معقب ومدخل بيانات ومكروف من الساعه 8 الى 5 العصر

فصلت من الشركه انا وواحد من زملائي حفظا لكرامتنا لانهم يحبون استغلال السعودي باي طريقه

وحاليا ابحث عن عمل يحفظ لي حقي وكرامتي

ونصيحه لاتصير ساكت اذا احد جاب لك شغله مهب شغلتك الرسميه

الله يوفقك ويرزقك عاجلا غير اجل

حسبي الله ونعم الوكيل

خيرا تعمل شرا تلقى

ما اقول الا الله يعينك

ويرزقك بوظيفة احسن منها يارب

الحين قول لهم ما بتزود راتبي خلاص وظيفتي سكرتير
اذا صار ماصار قول لهم بشتكي عليكم في مكتب العمل
خليك بس سكرتير
بالتوفيق لك

بصراحه ما عرفتوا للاجانب

انا غير ... اي مدير اجنبي يبيني اسوي شغل مو شغلي اقولهم بصوت مرتفع المعقب ياخذ كذا
كم تبون تدفعون له << يعني اكاسر بالمبلغ لهم

وفكوا نفسكم بالهابجم وبلاويهم

ررررررررررررفع

اخي متفائل
شكواك وصلت الينا

ومما لا فائدة فيه الحديث عن قول لو أنك عملت كذا
أو لو انك عملت كذا
او قول إذهب واشتكي عليهم
فهذه بنظري توجيهات لا تفيد

أنت عملت لديهم عدة سنوات
لم أستطيع تحديدها من خلال حديثك
ولكني فهمت انها سنوات كافية
المهم الان ما هو الذي في يديك بعد هذه السنوات
ماذا لديك من خبرة
من مهارات
من اشياء في مجالات العمل لم تكن تعرفها
واصبحت الان تعرفها بعد عملك في هذه الشركة
كل ما لديك إذهب وسجله في سيرتك الذاتية
وايضا ان كان لديك مبلغ بسيط من المال
حتى تأخذ بعض الدورات الاضافية التي تعزز موقفك عند البحث عن وظيفة
ابدأ من الان واصنع سيرتك الذاتية من جديد
وأضف اليها ما حققته خلال عملك مع هذه الشركة

هي قد تكون تجربة سيئة
ولكن بالتأكيد يوجد ميزات انت حصلت عليها
وارى جانب ايجابي
كونك تعمل عن اربعة موظفين
فهذا يعني انه لديك قدر لا بأس به من الخبرة الاضافية الان
أضف هذه الخبرات في سيرتك الذاتية بشكل منطقي وغير مبالغ فيه
وبإذن الله سوف تجد قبول من شركات اخرى أفضل وأرقى
ولا تضيع وقتك في الحديث عن السابق
الحياة ما زالت امامك انت لديك 28 سنة
بالتوفيق
...

اشكركم جميعاً على تفاعلكم

الذي حصل معي اليوم هو :

ذهبت للشركه لأخذ مستحقاتي وانهاء خدماتي بشكل رسمي

ولكنهم رفضوا استقالتي وقالوا تعمل كما كنت بالسابق

تفاوضت معهم بالراتب وقلت اعمل كما كنت ولكن اعطوني مقابل على هذا التعب

ولكنهم رفضوا اقالتي ورفضوا زيادة راتبي

وانا الان مظطر لتقديم شكوى على وزارة العمل

صدقوني ماتهون علي الاربع سنين الي عشتها معهم ولكن اجبروني على ذلك

تحدث معي المدير وقال الان سنصبح بالنطاق الاحمر اذا استقلت من عندنا

واذا اضفنا سعودي سوف ننتظر 3 اشهر و15 يوم كي يضاف الى القائمه سعودي

يعني باختصار يبوني اجلس معهم لمدة 3 شهور و15 يوم وبعدين يقولون امسك الباب

ابي الحل الان .. ؟

قريت قصتك الله يعينك اخوي

بس اخوي بغيت اسالك تقول اشتغلت معقب معهم وتسوي اوراقهم بالله كيف شفت وظيفه التعقيب بالدوائر الحكوميه لنه عرضت علي الان

هلا فيك حارس امن

شغلة التعقيب مو كل واحد يقدر عليها

متعببببببببببه حييل وبنفس الوقت ممتعه

انا عن نفسسي اعمل اي عمل واستمتع فيه

بس الاهم اني اسوي ششي ذاك اليوم وانتج

هي تحتاج رجل لبق ولديه تركيز عالي ولديه ذكاء

حتى لاتقع بشخص مثل مايقولون بالعاميه ( يصرفك )

لان الله يهديهم اغلب الوزارات مايتفاهم معك واذا شاف ماعندك خبره بالمعامله صرفك

بس يبي لك تقرا افكاره وتعرف ترد عليه وتعرف تتحاور معه حتى يحسب لك الف حساب

وتقدر تخلص المعامله بسهوله ولا ترجع للشركه وتقول ماقدرت اسوي هالشغله

انا ولله الحمد خلال شغلي بالشركه مامر يوم ورجعت بمعامله حتى لو صعبه

لما ارجع بالمعامله احس بداخلي فششل وانا اكره شي اسمه فششل

دائما اتحدى الصعاب واسوي المسستحيل بس ما استسلم وافششل بشي معين

لذلك التعقيب حلوو ويبي لك لباقه بالكلام وسرعة تصرف ومعرفه تامه بالدوائر

وشوف الشغله لما تحبها راح تبدع فيها بسس اذا انت رجل تكره الزحمه والانتظار

انصحك لا تروح للتعقيب لان يومك كله بيروح انتظار وزحمات طرريق

وعسسى الله يوفقك