بسم الله الرحمن الرحيم


السلام عليكم ورحمة الله وبركاته


ياخواني وخواتي


انتم كل من قال كلمه سلبيه عن حافز


قمتو عليه طيب اوكي نفرض انسان يبي يخرب سمعة الجهه هذي


هل من الممكن ان نصدق كل مايقال طيب خلونا ننظر للامور الاجابيه في الامر


قبل ماكنا نستلم ريال واحد والله ندور المصروف من الوالد والوالده


الان 2000 ريال وانت نايم تحت مكيف ومرتاح


هالالفين لو توفر كل شهر 1000 ريال بجيبك كان جا اخر السنه معك 12 الف ريال


تسوي فيها مشروع ينفعك ويدخل عليك دخل شهري يوصل الى 5000 ريال



ابسط مشروع سائق مدارس او كليات ومدرسات


بامكانك توفر مركبه بـ 12 الف ريال او اقل بكثير او بنصف المبلغ


يمكنك من شراء سياره خاصه لنقل الطالبات والمدرسات والممرضات << ابسط حل واسهل



انا ابي اتكلم لكم عن شخص


ابتداء مشروع بـ 4 الالف ريال الان في ذمتي يملك سوبر ماركب على مستوى عالي


ونصف مجمع يبلغ فوق الف متر مربع ومشاريع اخرى


والله ياجماعه خلال سنتين فقط وصل الى مستوى ماشاء الله تبارك الله


الدوله لو تبحث فيها عن طرق لتوفير المال تحصل كثير


ولكن فينا نزعة الخوف نريد شيء مضمون 100% او لا نريد


وش الفائده من خوفنا من الخساره


لابُد من الخساره لكي نجد الربح


انا اتكلم لكم شخصياً عني الايام القادمه راح اعمل اكثر من مشروع


وهذا بقيام في الدين البسيط وجمع مال من حافزز


لكي يكون راس مال ... المشروع الاول راح يدفعني للثاني والثاني الى الثالث


وسوف يتم حذف حافز مني بسبب السجل التجاري


ولكن حافز قدم لي خدمه ما قدمها لي احد ليش ننظر له بالسلبيات المذكوره



ياجماعه كل 7 ايام فقط ادخل على النت وحدث ماتضرك مقابل الفين ريال


اذكر نشتغل حراس امن سكرتيه 8 ساعات مقابل 1500 ريال


وش اللي صار في نفوووسنا نبي فلوس اوكي كلنا نبي فلوس


لكن مو حنا طاقين رجل على رجل شغلو انفسكم


خلو عنكم الخوره فـ الشوارع والتكبر عن الوظائف البسيطه

خلونا نطور من امكانياتنا وتكسب مالنا من عرق جبينا


ليش نحب نقول هات المجان ولا نحب اخذ رزقنا بتعبنا


طيب الحين الكل بيقول هذا ماعندها سالفه .. كل هالموضوع عشان هالكلام

الفاضي اوافقك الراي هو اذا كان فقط كلام راح يصير كلام فاضي

لكن اذا اندمج بالفعل راح تتغير نظرتكم


والله اكتب هالكلام لمحبتكم وتمني لكم الخير


وانا من مستفيدين حافز الان وحصلت معي امور كثيره


تخليني اكتب موضوع قد هذا عشر مرات كل محتواه سلبي من ناحية حافز


لكن الحق حق ... حافز ساعدنا من بعد الله على امور كثيره


واتمنى هالفين او الالف ريال بالقليل ماتستصغرونها وانتم جالسين


هذي منحه من الله اولاً ثم من الحكومه الرشيده



والملك عبد الله بن عبد العزيز ال سعود حفظه الله ورعاه


امر بصرف اعانه شهريه ولكن ماقال بدون شروط تصرف

والله ثم والله اذكر كنا نتمنى تكون الف ريال لكن الحمد لله اندبلت

وصارت الفين ريال وهذا من كرمه الله يطول في عمره بالخير


الدوله انظرو لها قبل سنوات وانظرو لها الان ياجماعة الخير


في تطورات كبيره حصلت


والله اكلم عامل مقيم في السعوديه وسالته عن وضع الطب عندهم


قالي والله ندفع دم قلبنا عشان علاج


وحنا بالمجان نحصل عليه ونقول لا الطب عندنا مو شي والخدمات ضعيفه



ياجماعة الله بالله عليكم وانا حلفتكم بالله تقدرون هالنعمه اللي حنا فيها


والله كلمة سعودي ... وربي وحده كافيه انك يكون لك نصيب فيها


الخير واجد لكن يبي لنا نتحرك ونشد الهمه ونسعى لغايتنا ماننتظر الغايه تجينا



اقول لكم كلماتي هذي وكلي امل ولو بواحد من الي قرو هالموضوع


يستفيد ويجرب ويشد الهمه وباذن الله نسال الله ان


يسددنا خطانا وان يوفقنا الى مايحب ويرضى


وان يغنينا في عطاها ولا يحدنا لمخلوق

فمان الله

الله يعطيك العافية على هالكلام وموفق ان شاء الله في مشاريعك ياخوي

الحمدلله ع النعمة والله يطول عمر ابو متعب ويحفظه لنا
بس ياخوي حافز عقدها شوي
ليش الخصم اذا ماحدثنا
واحنا الحين نحدث وماندري التحديث صح اوغلط
المفروض طلع واحد منهم وشرح لنا طريقة التحديث
مو كل شهر بنظام يثبتوا ع شي
وليش اللي عمره 35 مايستحق الاعانه
مثلهم مثلنا تخرجوا وعملوا اللي عليهم
والحمدلله اني سعودية ارفع راسك انت سعودي

انا عن نفسي سلبياته اكثر من ايجابياته
الملك امر بصرف الاعانة بس ماقال بشروط او قيود
حرام عليهم يعقدونها خلاص المفروض اللي مسجل بحافز مايحتاج تحديث كل اسبوع لان بعضهم ماعندهم نت بالعافية حصلوه وإلا معطين بيناتهم احد من اقاربهم وسجلهم .. زين الناس تمل كل مره اتصل عليهم حدثو بيناتي والله فشلة ’’’
وخاصة اهل القرى والناس اللي على قد حالها
بعدين هذا نظام جهة حكومية تعرف مين اللي توظف ومين اللي ماتوظف مو معقوله؟!! بس سبحان الله القائمين على هالبرنامج ناس يحسدون الغير والله حسيبهم
ووظايفهم صراحة مو مناسبة خاصة للبنات ليش تكون موظفة مبيعات حرام والله لو بناتهم مايرضون قدروا شوي وشوفو البيئة اللي تعيشها البنت السعودية مو كل الناس مثل بعض فيه ناس ماترضى بناتهم يطلعون للسوق لوحدهم وشلون عاد موظفة مبيعات ابد مااحد يرضاها لبنته او زوجته اصلا راح تكثر المشاكل ولا تقولون لها خصوصية بالمحل كذب مين تضمن اللي دخل عليها بالمحل تكون " مره " ممكن يكون" رجل" من اللي مايخافون ربهم
وبعد شي ثاني مو كل البنات صالحات فيه البعض الحين مشاكل البنات اكثر
وشي اخير حنا يوم نسجل البيانات قلنا لهم وش نبي وظايف مو على كيفهم يوظفونا ....

احنا محتاجين بعد نغير ثقافة مجتمعنا البالية عشان كل شي يمشي زين

لكن هذا صعب جدا ويبي له وقت

موضوعك جميل وماننسى قول الله تعالى ( ولئن شكرتم لأزيدنكم )
يعني الحمدلله هذي نقله قويه بالنسبة للعاطلين راتب شهري بغض النظر عن التحديث الاسبوعي او خصم منه هو له مساوئ وكل شي فيه الزين وفيه الشين
بس الموضوع مو طراره ولا شحاذه احنا اغنى دول الخليج بسبب النفط اللي رزقنا الله فيه قبل نتقدم ونتطور حرام ينحرمون منه ناس اعمارهم تعدت 35 سنه وهم يحملون شهادات ومؤهلات ويقبل فيه ناس معها ابتدائي والسبب انهم مايحبون الدراسه تقارن شخص درس جامعه اربع سنوات وماستر ودورات وتعطيه نفس مكافئة شخص معه ابتدائي ولا متوسط ولا ثانوي بسبب انه ماله رغبه يكمل تعليمه بغض النظر عن الظروف الصحيه والاجتماعيه
والله بنت عمي خريجة كلية التربية الاقتصادية وعمرها الحين 39 ولا توظفت ولا قبلها حافز مو تحطيم ؟؟؟
حافز فكرته كويسه بس محد طبقه على الوجه المطلوب كعادة كل البرامج عندنا

كلام جميل جدا الشباب ع الاقل يقدر يشتغل في اي مكان ماعنده مشكلة بعكس البنات

والحمد لله حافز اغنانا عن الناس
وطبعا هم لازم يضبطون قوانينه ويحكمونها عشان يستمر البرنامج بدون تعديلات لعدة سنوات الى مايشاء الله
وهذا مايمنع ان حافز جهد انساني معرض للخطأ والصواب

الله يعطيكم العافيه على ردوكم


ولكن كنا دائره ندور حول بعضنا مالنا نهايه


ولا في طريق مسدود


بخصوص مقارنة الابتدائي في الجامعي ... نقدر جهد الجامعي


لكن في امكانيات لدى بعض الغير المتعلمين تعليم كامل افضل واقوى من بعض المتعلميين والجامعيين


وبخصوص تعليق ان السياره اللي في 12 الف غير امانه

لا اخي الكريم يكون مستوى الامان فيها كويس لابس فيه


والامان من رب العالمين ...


وفي امر الاهانه ... ان بنات السعوديه ماتشتغل شغلات في البيوت


انا اشوف ان الاهانه العظمى هي الاستكبر عن محلل الله فيه


وفي خصوص بائعه في محل او شي اكييد ماراح يكون محل مفتوح

يعني حاله حال المشاغل النسائيه


لا يعني اني ارض في الوضع هذا ولكن لكل محتاج مؤمن بالله


امر يجبره على كسب الزرق بالحلال مهما كان مستوى الوظيفه

نحنُا لسنا مجبورين ان ننتظر قرار صادر ملكي او شي

نستطيع ان نكون انفسنا بانفسنا ...


الدوله لديها اهتمامات كبيره


وكل اهتمام يزيد عن اهتمام

رجل لايستطيع ان يجعل عيونه موجوده في كل مكان

لابد من مساعدين ومعاونين


اتمنى من الجميع ان يكونو من الشاكرين


لهذه النعمه التي انعم الله علينا فيها

انظرو الى حولنا الاخ يفقد اخه وامه وابوه


وحنا بفضل الله ثم فضل حكومتنا الرشيده ننام

نوم الراحه بهذا الامان


ماهي قيمة الاموال اذا ذهب الامان


ياشباب اذكرو الله وتعوذوه من كل شيطان رجيم

اتمنى من يضع موضوع فيه سوء فهم او خطاء بشان

اي شي اتمنى ان يتحلى بالصبر والاستشاره ممكن الخطاء يكون


من الشخص نفسه ولا نسمع اي كلام يقال عن اي شخص او جهه


الا في دليل وبراهين


اتمنى اني قد وصلت الفكره التي تدور في خاطري على الوجه المطلوب



بالتوفيق