السلام عليكم
بعطيكم تفاصيل مقابلتي اليوم
ذهبت مباشرة للمدرسة العاشرة، دون المرور على إدارة التعليم، وهذا ولله الحمد مما إستفدناه من خواتنا هنا اللي راحوا قبلنا.
المدرسة نظام أرامكو القديم، اللي ساحتها مفتوح سقفها وليست كالجديدة مغلقة.
قريت موضوع وحدة من الخوات هنا تنصح بإننا نروح من الساعة 3 العصر حتى لو موعدك 6.
لكني ما أنصح أحد يروح المدرسة قبل 3ونص، لأني رحت من الساعة 3 وجلسنا ننتظر في ساحة المدرسة ثلث ساعة تقريبا على ما جو الموظفات ودورو مفتاح الغرفة اللي نعبي فيها أوراقنا وفتحوها.
والبنات ثلاث أرباعهم قاعدين بعباياتهم، اللي شالت شيلتها واللي خلتها على رأسها، المهم تكشفين وجهك.
طبعا لا مسرح ولاشي من اللي قالوه الخوات هنا، دخلنا غرفة مستطيلة فيها طاولات إجتماع وفرقونا اللي موعدهم الساعة أربع على اليمين واللي خمس على اليسار.
وحاطين في آخر الطاولة كرتون فيه قوارير ماء وعصير كراتين فوق بعضها، وقالوا اللي تبي ماء تروح تأخذ لها قارورة من الكرتون.
ووزعوا علينا خمسة أوراق في مغلف نايلو، وبدأت وحدة منهم تشرح لنا بصوت عالي شلون نعبي كل ورقة.
الورقة الأولى نموذج التوظيف، والثانية والثالثة بس تحطين اسمك وهم يعبونه بمطابقة الأوراق والبيانات، والرابعة تكتبين خبراتك العملية السابقة، والخامسة تكتبين اسم 16 رغبة، وهددتنا اللي تشرح إننا لو تركنا مربع واحد ما عبيناه
مدخلة البيانات راح ترمي الملف، كأننا طالبات إبتدائي مو معلمات أجيال.
من حسن الحظ إني جبت معي ورقة طبعت فيها ترتيب المدن حسب بعدها من الدمام، ورتبتها على هذا الأساس.
طبعا كل وحدة تجيب معها قلم أزرق جاف، لأنه ممنوع الحبر السايل وأي لون ثاني.
واللي جابوا بطاقة العائلة وبطاقة الأحوال، قالوا أفضل نأخذ بطاقة الأحوال، لأنك بتعبين في الأوراق مكان وتاريخ صدورها.
الموهم...عقب ما عبينا الأوراق، سلمناها ووقعنا وررقة، فختمت عليها الموظفة ورجعتها لنا، وقالوا لنا روحوا طابقوا شهاداتكم. في الغرفة رقم 12، وعطتنا ورقة نصف حجم الa4 فيها إستفتاء عن مستوى معاملتهم في الإستقبال والمطابقة والمقابلة، من جيد لإمتياز، وبدون اسمك، وقالوا حطيه عند غرفة الكشف الطبي.
رحنا نطابق قالوا إنتظروا عندنا إجتماع، إنتظرنا تقريبا ربع ساعة، خلونا نوقف بالدور في ساحة المدرسة، بعدين دخلونا بالخمسة وأكثر على غرفة مربعة، فيها حوالي عشرين موظفة قاعدين على طاولات مدرسية مصفوفة كأنها فصل دراسي، وكل وحدة قدامها طاولة مدرسية وكرسي عشان تقعدين قبالها.
سلمت عليها وجلست، وطلبت مني بطاقة الأحوال طابقتها مع الصور وختمت بختم أحمر صورة طبق الأصل.
وكررت الأمر مع شهادتي الجامعية، وبقية شهادات الدورات اللي جبتها. ورجعت لي الأصول.
لم تسألني أبدا عن السجل الأكاديمي. مع أنه عندي.
ولم تسألني عن ورقة حسن السير والسلوك ولا غيره.
وكل أصل جبت معه 3 صور وجبت ملف علاقي واحد حطوا فيه الأوراق.
بعدها قالت لي روحي لغرفة مقابلة القسم الإنجليزي....
وذهبت للمقابلة اللي إنتظارها طير النوم من عيني
التكملة في العدد القادم