السلام عليكم
بعطيكم تفاصيل مقابلتي اليوم
ذهبت مباشرة للمدرسة العاشرة، دون المرور على إدارة التعليم، وهذا ولله الحمد مما إستفدناه من خواتنا هنا اللي راحوا قبلنا.
المدرسة نظام أرامكو القديم، اللي ساحتها مفتوح سقفها وليست كالجديدة مغلقة.
قريت موضوع وحدة من الخوات هنا تنصح بإننا نروح من الساعة 3 العصر حتى لو موعدك 6.
لكني ما أنصح أحد يروح المدرسة قبل 3ونص، لأني رحت من الساعة 3 وجلسنا ننتظر في ساحة المدرسة ثلث ساعة تقريبا على ما جو الموظفات ودورو مفتاح الغرفة اللي نعبي فيها أوراقنا وفتحوها.
والبنات ثلاث أرباعهم قاعدين بعباياتهم، اللي شالت شيلتها واللي خلتها على رأسها، المهم تكشفين وجهك.
طبعا لا مسرح ولاشي من اللي قالوه الخوات هنا، دخلنا غرفة مستطيلة فيها طاولات إجتماع وفرقونا اللي موعدهم الساعة أربع على اليمين واللي خمس على اليسار.
وحاطين في آخر الطاولة كرتون فيه قوارير ماء وعصير كراتين فوق بعضها، وقالوا اللي تبي ماء تروح تأخذ لها قارورة من الكرتون.
ووزعوا علينا خمسة أوراق في مغلف نايلو، وبدأت وحدة منهم تشرح لنا بصوت عالي شلون نعبي كل ورقة.
الورقة الأولى نموذج التوظيف، والثانية والثالثة بس تحطين اسمك وهم يعبونه بمطابقة الأوراق والبيانات، والرابعة تكتبين خبراتك العملية السابقة، والخامسة تكتبين اسم 16 رغبة، وهددتنا اللي تشرح إننا لو تركنا مربع واحد ما عبيناه
مدخلة البيانات راح ترمي الملف، كأننا طالبات إبتدائي مو معلمات أجيال.
من حسن الحظ إني جبت معي ورقة طبعت فيها ترتيب المدن حسب بعدها من الدمام، ورتبتها على هذا الأساس.
طبعا كل وحدة تجيب معها قلم أزرق جاف، لأنه ممنوع الحبر السايل وأي لون ثاني.
واللي جابوا بطاقة العائلة وبطاقة الأحوال، قالوا أفضل نأخذ بطاقة الأحوال، لأنك بتعبين في الأوراق مكان وتاريخ صدورها.
الموهم...عقب ما عبينا الأوراق، سلمناها ووقعنا وررقة، فختمت عليها الموظفة ورجعتها لنا، وقالوا لنا روحوا طابقوا شهاداتكم. في الغرفة رقم 12، وعطتنا ورقة نصف حجم الa4 فيها إستفتاء عن مستوى معاملتهم في الإستقبال والمطابقة والمقابلة، من جيد لإمتياز، وبدون اسمك، وقالوا حطيه عند غرفة الكشف الطبي.
رحنا نطابق قالوا إنتظروا عندنا إجتماع، إنتظرنا تقريبا ربع ساعة، خلونا نوقف بالدور في ساحة المدرسة، بعدين دخلونا بالخمسة وأكثر على غرفة مربعة، فيها حوالي عشرين موظفة قاعدين على طاولات مدرسية مصفوفة كأنها فصل دراسي، وكل وحدة قدامها طاولة مدرسية وكرسي عشان تقعدين قبالها.
سلمت عليها وجلست، وطلبت مني بطاقة الأحوال طابقتها مع الصور وختمت بختم أحمر صورة طبق الأصل.
وكررت الأمر مع شهادتي الجامعية، وبقية شهادات الدورات اللي جبتها. ورجعت لي الأصول.
لم تسألني أبدا عن السجل الأكاديمي. مع أنه عندي.
ولم تسألني عن ورقة حسن السير والسلوك ولا غيره.
وكل أصل جبت معه 3 صور وجبت ملف علاقي واحد حطوا فيه الأوراق.
بعدها قالت لي روحي لغرفة مقابلة القسم الإنجليزي....
وذهبت للمقابلة اللي إنتظارها طير النوم من عيني
التكملة في العدد القادم

غريبة

كيف تعبون الاوراق....وتكتبوا القرى

وانتوا ما طابقتوا شهاداتكم

اللي اعرفة انه في البداية لازمالاوراق كامله ....بعدها ...الكشف .....بعدين استكمال الاوراق

المشكله مافي الية موحدة لميع ادراةالتعليم

نكمل ..

طبعا أنا أول ما دخلت المدرسة قلت اللهم إدخلني مدخل صدق وإخرجني مخرج صدق وإجعل لي من لدنك سلطانا نصيرا
وقبل ما أجي المقابلة قرأت سورة البقرة، وإستغفرت ألف مرة وسبحت وهللت وحوقلت وتحسبت
وبعد ما جلست في الساحة أنتظر الموظفات يدخلون بعدنا، < حنا جايين مبكر كنه عرس نبي نحجز طاولات قدام.
قعدت أطالع وجيههم وأقول ياربي أي وحدة اللي بتقابل معي !!! ما طلعت ولا وحدة فيهم
وين وصلت؟ إيه عند غرفة المقابلة، طبعا الأبواب زجاجية، يعني تطالعين اللي داخل الغرفة قبل ما تدخلينها،
وأطالع غرفة المقابلة اللي خوفي منها يذكرني بخوفي من غرفة الفيران اللي كانوا يخوفونا فيها بالإبتدائي،
وألقى في الغرفة طاولتين وحدة في وجه الباب عليها موظفتين، والثانية على اليسار وعليها أيضا موظفتين.

طبعا أهم شي أوصي فيه خواتي هنا، الدخول مبتسمة والسلام بصوت مسموع على جميع الغرفة، لأنه يعطيهم إنطباع أولي عنك بثقة نفس عالية.
بعض الأخوات تدخل وهي خايفة وتنسى تسلم وتتردد خطواتها في المشي، وهذا أمر ماهو في صالحها.
والأفضل إنك من تدخلين المدرسة تكونين مبتسمة مع الجميع، وتبادرين بالسلام لوجه الله وليس لطلب دنيا.

طبعا من ندخل من الباب تأشر لنا المشرفة أي قسم، إذا تبعها قالت تعالي، وماشاء الله عليهم يعرفون أقسامنا من وجيهنا.
يوم جلست قدامها بدت يديني تنتفض شوي، فنزلتها تحت الطاولة، والحمدلله ما فيه كتابة إلا كتابة اسمي والتوقيع على ورقتين بالحضور.
طلبت مني بطاقة الأحوال، وبدأت تعبي منها ورقتي اللي معها اسمي وسجلي المدني.
سألتني متى متخرجة، طبعا منذو مبطي، فقلتها وأنا مبتسمة بثقة حتى لا تحط علي.
بعد الوظيفة رزق والرزق قسمة ونصيب من الله.
سألتني عن إستراتجيات التعليم، فقلت لها اللي أخذته من المنتديات بأنها لعب الأدوار والقبعات الست والتعليم التعاوني وغيرها، طلع إني لازم أقولها التعريف.
يعني مو هي الإجابة اللي تبيها، قلت لها شوفي < طبعا بالإنجليزي، أنا التدريس أدرس لعيال العايلة مخليني سبيل للكل. بس المناهج الحديثة مدري عنها.
قريت لك هالكلمتين من النت وقلتها وبصراحة مدري عنها، الكذب خيبة.
قالت لي هي نفسها ماتغيرت كثير بس المسميات
وسألتني وش الوسائل اللي استخدمها في التدريس، عاد الوسائل على خبري الفلاش كارد والفواكه والخضار إذا كان الدرس عنها، ثم أرجعها لثلاجة أمي، وقلت لها البوستر والباور بوينت.
وسألتني لو طالبة ممتازة جاوبت قبل ما تقومينها وش تسوين؟ هنا أنا حسيت إني خرتها شوي، قلت أحقرها.
وسألتني لو المديرة طلبت منك تمسك نشاط بالإضافة لحصص وش تسوين، قلت عادي ما يخالف< طبعا بالإنجليزي
ولو قالت لك زميلة بغيب كم اسبوع ننكن تاخذين حصصي، قلت عادي ما يخالف
قالت لو عندك موعد مستشفى وشلون تطلعين من المدرسة، قلت أعلم المديرة قبلها بيوم، قالت طيب لو تعبتي فجأة وبتروحين البيت، شلون تتركين فصلك، هي طبعا تقصد إني أوزع حصصي على زميلاتي، بس أنا وش يدريني، عن هالحتسي كله، هذه الإجابات يبي لها خبرة سابقة.
وسألتني عن الأخبار وش أهمها الحين، قلت سوريا <حافظة الدرس، قالت وش لازم نسوي لهم قلت ندعي لهم، ونساعدهم بالمال إذا فتحوا باب التبرع.
المقابلة كانت كلها بالإنجليزي، بعدين عطتني ورقة صغيرة عليها اسمي وموقعة عليها باسمها، وقالت لي خلاص الله يوفقك، وروحي مكتب الكشف الطبي.
قلت إنتهت المقابلة قالت إيه، أحسب بيسألوني في الدين مثل ما قالوا الخوات هنا، لكن لم يحصل شي من هذا.
وسألتها كيف مقابلتي، قالت إطمني.
ورحت للكشف الطبي، مكتب مرتبه عليه أوراق مصورة. كروكي مركز اللياقة، وورقة تحويل الراتب وخطاب طلب الفحص.
أشرت الموظفة على طاولة جانبية، وقالت حطوا الإستبيان هنا، اللي سجلنا فيه إنطباعنا عن عمل الموظفات.
أخذت مننا الورقة الصغيرة حقت المقابلة، وطلبت بطاقة الأحوال، ووقعتنا على ورقة في قائمة بأسمائنا،
بعدين قالت لي وين تبين تسوين الكشف الطبي، في مركز اللياقة بالدمام اللي يسوون فيه فحص العمالة المنزلية، ولا مركز صحي العقربية بالخبر؟
قلت مافيه خيارات ثانية، قالت لا.
قلت لها أبي الدمام أقرب لي، قالت لي أنصحك تروحين العقربية، لأنهم يطلعون لك الفحص أسرع من مركز اللياقة، قلت عطيني الورقة وأنا أشوف ظروفي وين أروح،
قالت لي ما يصلح لازم أكتب هنا على الورقة إنها موجهة لمدير اللياقة أو مدير المركز الصحي، إخترت العقربية، وبصمتني على الورقة، وعطتني ورقة الراتب وورقة الفحص المطلوب.
وقالت حتى يوم 14 من هذا الشهر، اللي تخلص تجيب فحصها هنا الدوام من 4 إلى 9 مساءا، وبعد يوم 14 نروح للشئون التعليمة من 9 صباحا حتى 1 ظهرا. على ما أظن مو متأكدة من ساعات دوامهم.

ماشاء الله تبارك الله

عقبالي يارب وعقبال اللي لسى ماخلصوا

انا مثلك انجلش

الله يقر عيونك بالتعيين القريب لبيتك ومن يقرا

غريبه بحايل ماعطونا ورقة الراتب
ممكن اختي تصورينا لنا وتنزلينها
وش تسوين فيها هذي الورقه
تعبينها ولا هم يعنونها ولا تتحول للبنك
ومشكوره