بسم الله الرحمن الرحيم
السلام عليكم ورحمة الله وبركاتــــه .ْ~|

طبعا انا تخرجت من الثانويه سنه 1431 . والحمدالله التحقت بـ الكليه التقنيه درست فيها سمسترين . . فجآه قالوا في شركة قويه تبي موظفين . رحت وسويت مقابله ولا لي اي عزيمه للعمل ---> لاني لازلت ادرس ..
ورايح لهم بدون ماحلق ولا مرتب نفسي ..

بعد مانتهينا من المقابله حنا طبعا 5 اشخاص ..

وحنا راجعين من مدينة الجمال والرطوبه الى مدينة الاحساء والنخيل ...

دق جوالي وقالوا تعال يافلان عشان توقع العقد . انا شوي ارتبكت وقمت ودقيت ع الوالد واخوي الكبير . وقالوا روح توكل على الله ...
اشتغلت بالخبر 6 شهور واشتغلت بالدمام 11 شهر . والباقي كملته بالاحساء ..
لدرجه اني مرتاح كل الراحه ..
تخيلوا اني بعض الاوقات اروح الدوام مشي من قرب المكان اللي اشتغل فيه ..

جآء مشرف مسك الفرع اللي انا فيه .. وجلس كل يوم يطلع لك قرارات صارمه ..
وتهديد بالانذار وغيره .
طبعا المشرف عندنا دوامه يكون من الساعه 9 ص الى الساعه 12 م
ويرجع الساعه 8 م الى الساعه 11 م

طبعا دوام المساء مستحيل هو يداوم .. وحنا اللي نقوم بالعمل اللي يقوم فيه .
يعني متعاونين معاه ..

بس اي غلطه منك يالموظف اعتبر ان ايميل الانذار وصل لك ..
طبعا في بكل نهايه دوام تقفيل حسابات ... ----> احس اني شوي واقول وين اشتغل

هو طبعا مايحسب المبالغ بشكل يومي ...

فـ يجيك بعد 3 ايام او 4 ايام .. والله يافلان عليك مبلغ نقص .. مثلا 150 ريال
وحنا ماشاء الله علينا ان شاء الله يابو فلان سم ...
حسينا صراحه ان الشغله قامت تزيد يعني بالشهر تدفع مايقارب الـ 700 ريال ..
انا طبعا قلت للجماعه اللي معي .. خلونآ نتآكد نشوف المبالغ اللي تجي علينا بالنقص
صحيحه او لا ..
فصار كل موظف بكل نهايه دوام يحسب فلووووسه . ويعطيها الموظفين اللي معه عشان يحسبون المبالغ ..
واذا طلعت صحيحه يحطونه بالمكتب عشان المشرف يجي بكره ويستلمها ..
انا صرت احط مبالغ زايده من جيبي .. يعني صآر مجموعي كله 1000 ريال
اقوم احط من جيبي مبلغ وقدره

واسجل المبالغ اللي حطيتها مع التاريخ .. بعد 3 شهور من طريقتنا اللي سويناها .
جاء وقال للموظفين عليكم نقص .. جاء لي وقالي عليك نقص مبلغ 125 ريال
والمبالغ الزايده اللي حطيتها مفروض ترجع لي او تكون موجوده عنده بس تكون لي لاي نقص مستقبلا ..
المبالغ اللي عندي زايده 222 ريال ..
قلت له بعد ماطفح الكيل .. ماني دافع واساسا انا عندي مبلغ زايد 222 ريال
اخصم من المبلع وحط الباقي عندك لاي نقص مستقبلا ..
---> هنا طبعا انكشف على حقيقته ..
وبدآ يلعب لعبته ..
رفع فيني انذار اني اتهجم عليه ولا ادفع المبالغ الناقصه ..
رفعت فيه انذار للشركه مرفق بخطاب توضيحي مع الشهود الموجودين وهم 5 موظفين
ان المبالغ الزايده ماترجع ..
اختصر لكم الموضوووع --> لاني تعبت

صار اجتمآع في مبنى الشركه بالخبر ..
واللي اجتمعوا معي يعرفون المشرف عز المعرفه . لانه يقوم باعمالهم
بعدها بيوم رحت اداوم عشان دامي يبدآ المساء ..
قال المششرف الله لا يوفقه .. تعال يافلان ..
رحت له .. قال امسك وقع على الورقه ..
اطالع الورقه واشوف انها فصل .. والسبب مايلي ..
- عدم الثقه بالمشرف . ---> لابوكم لابو مشرفكم النصاب

واقوم وامسك المشرف واعطيه ذاك الكف اللي حت كم ضرس له .
وقلت له ترى حنا من بلد وحده . وانت سويت كذا عشان مصلحتك .
بس والله راح تشوفها في اهلك .. ---> متزوج هو طبعا
وانا والله اني جالس آبني لي شقه بالبيت عشان اتزوج وافتك من العزوبيه ..
واهلي آجلوآ الزواج .. وهذا اللي منقهر منه ..

والحين جالس بمحل جوالات حق عمي استلم 1000 ريال
بعد ماكان راتبي يوصل الـ 5000 ريال ..
حسبي الله عليك وياجعلني اشوف هالظلم كله فيك ولا في زوجتك ولا في بنتك ...

قطع الاعناق ولا قطع الارزآآآآق ...

حسبي الله على كل مسؤول ظالم ...
كانت حياتي سعيده .. وش يسدد هالجمعيات وش يسدد اقساط السياره
من وين بكمل بني .. ياجعل ابني قبررك ان شاء الله ..


الهي حبيبي آرني قدرتك في هذا الشخص . واجعله عبرة وعضه لكل ظالم ...


اذا تبون جوال جالكسي note > عندي بالمحل حياكم ...

وبكره عندي مقابله .. دعواتكم ...


آعيش الحياه كمآ آحب .....
ان الله هو الرزاق ..
سآعيش وانا اعلم ان رزقي ليس بيد البشر ..
انه بيد الله سبحانه وتعالى ...~

لا حول ولا قوة الا بالله
اكبر مصيبة في العمل اذا كان المشرف او المدير متكبر وطاغي وما يخاف الله
لك الله
وهذا المشرف حسابه عسير في الدنيا قبل الاخرة
احلى شيء بقصتك هو الكف الي عطيته هالمشرف النذل الخسيس
والله يوفقك بالجوالات
ويرزقكم بوظيفة احسن من الي راحت وتيسر امورك وامورنا وامور جميع المسلمين

ماشاء الله عليك عندك سرد دقيق لما حدث لك في الشركة ينفع يكون حلقة رقم 11من طاش 111

أخي العزيز الله يوفقك ويسهل دربك ويعوضك خير ... لكن لا اتفق معك بترك العمل من أول مطبة وحفرة وضعها لك المشرف فلربما قصده تطفيشك من العمل خوفاً من أن يصبح في يوم من الأيام على هامش الشركة وانت المشرف و,,, الخ
في النهاية ربح الجولة وخسرتها وإن شاء الله ماتخسر الجولات القادمة وتتعلم من الجولة السابقة الخاسرة ...
بالتوفيق

حسبي الله عليهم

ناس ماتخاف الله

الرزق على الله وانا اخوك وسع صدرك

وعليك بالاستغفار

الله يوفقك

حكايه وقصه يمكن ان تحكيها الي مكتب العمل

حسبي الله عليهم

قصتك عجيبه

وتصرفك السريع هذا خطأ

فيه اكثر من حل وطريقه انك تحافظ على عملك قبل ماتصير هالمشاكل كلها

مثلا تطلب نقل لفرع ثاني وتفتك من هذا المشرف حتى لو هالفرع بعيد عنك بس تفتك منه

وغيرها من الحلول الكثيرة

فيه حلول تقدر تضبط فيها المشرف نفسه

مثلا مثلا تطلع معاه طلعات للمطعم او للاستراحة مثلا وتلعبون كرة وطائرة وسباحه

واذا كثرت من هذه الطلعات صدقني راح تختلف طريقة تعامله معك << لازم لازم

وغيرها من الحلول الكثيرة جدا غير اللي قلتها لك

انا يوم كنت شغال في بنك كنا نطلع مع نائب مدير القسم اللي كنت شغال فيه

تخيل .... نائب المدير .... يعني اذا المدير غاب والا اجازه يصير هو مكانه مدير القسم

كنت انا واخوياي الشباب مضبطينه طلعات مطاعم استراحات مولات

=====

انا كانت حكمتي يوم كنت في القطاع الخاص ( اذا لك عند الكلب حاجه قوله ياسيدي )

====

لازم مشرفك تضبطه تحطه في جيبك

تكسب ثقته حتى لو انه نذل وجزمه

تمسكن لحد ماتتمكن << استحمل لين تكون مشرف

انا كنت شغال موظف مكده في البنك البريطاني المعفن واستحملت لين صرت مشرف بعد سنتين ونص فقط

بعدين ارتحت وصرت ملك

وصاروا الموظفين يحاولون يضبطوني هههههههههههههههههههههه

بس الحمد لله كنت اصلا مريحهم ومبسوطين

بعض الاحيان تنازل < وهذه يبيلها شرح طويل اذا تبي

==========

شوف دامك في القطاع الخاص فأنت دائما في خطر

القطاع الخاص قطاع شيطاني << انا اسميه كذا

الله يوفقك
انا انشغلت أعد كم مرة قلت "طبعا" ههههههههههه

حسبي الله ونعم الوكيل فيهم

عشان كذا اكره الوظائف المدنيه

وافضل الوظائف العسكرية

على الاقل يكون في امان وظيفي

لكن الشركات تحط يدك على قلبك بأي لحظه يطردونك بأي سبب من الا سباب

مالت عليهم وعلى اشكالهم الله لا يوفق كل ظالم

والله يوفقك ويسهل امورك ويرزقك بوظيفه والذرية الصالحه