ياناس انا عندي فهم خاطي عن الحياة وهذي ضرتني فبي وظيفتي وجامعتي ودراستي ابا اعطيكم كل يوم مشكلة وانتم حلوها بس ابا اجابة حقيقية ليست عاطفة او مجاملة او غيرة

جيب ما عندك ياشيخ و أبشر بعزك من يحاول يحلها لك بحول الله
مهنا أحد خالي من المفاهيم المغلوطه لكن نتعلم و نفهم

انا مزوح وودي امزح واسولف وافلها بس القا من الناس الاستهانة واصير عندهم صفر على الشمال وما يتعاملون معي الا بالمزح اما الجد مايتكلمون معي بوقت الجد بجد يعني اخذيني مزح مامزح اما السوالف العادية مايسولفون

يا شيخ والله أن معدنك طيب و ماعليك من الغجر للي يستخفون بك بالله أسحب عليهم تراهم يقالهم يطقطقون عليك بوقت فضاوتهم عشانك مزوح بالله لا تعطيهم مرادهم و حطهم صفر على شمالك و حط لهم حد وش ذا لا تخليهم يتمادون لا تحتك بهم ابد
خلك رسمي مره لا تكلمهم إلا السلام و صلى الله و بارك ..
يا قهري بس من نوعية الغجر اللي ما بوجيههم حياء من الله ولا من الناس

ترى شف أعدك أخوي الصغير بالله أسحب عليهم و خلك حول الوالد إن تسان يبي منك شغل لا تقصر معه و الوالده نفس الشي ..
انشغل بشي دور يمين يسار يا دراسه أو تطوع بالصيف
أنت عقلك كبير و هذولا عقولهم زي حبة الفصفص خلك أرقى وأسمى من أن تحتك بهالأشكال
أنا ما أجاملك أقول الحق عطهم العين الحمراء خلهم يهجدون ويحسبون لك حساب بمجالس الرجاجيل ..

مشكورة ياام عقاب على تفاعلك

طيب ابغثك يااام عقاب الحين الواحد يكتسب احترامة بافعالة ولا قدرة كذا يعني لو يسوي فعول اللي تخلية محترم

شف و أنا أختك الطيب بهالزمن راح مع الطيبين الله يرحمهم
و قدرك الله تعيش بزمن وحوش إن ما كنت قوي بالحق و إلا أكلوك
عاد اللي يشوفهم يقالهم كاملين مكملين - و الكامل وجه الله - بهم من العذاريب ما ينكس رووسهم
لكن الواحد لا قابل الردي يترفع عنه ويعتبره مريض و عقله لك عليه ..

بأفعالك مع الرجاجيل بمجالسهم توزن الكلمه قبل ماتطلع من لسانك بسمعة أهلك و طيب مجلسهم تخلي اللي ما يثمنك يتحسف على اليوم اللي أذاك فيه بلسانه و أخلاقه ..

نصيحه مني لا عاد تماشي قليلين المروه خلك مع شباب ينحطون على الجرح ويبرى شف شباب الحلقات اللي بالمساجد حتى لو ماتعرفهم حاول تحتك بهم منها تكسب دين ودنيا يقدرون المزح بحدود ومافي أي أذيه و صحبه طيبه أزين من صحبة هالأشكال اللي مامنها فايده ..

و شف من ضحك على أحد صدقن الله بيبتليه و يعافي اللي يضحكون عليه ..
يعني واحد طيب مره و الناس اللي حوله حتى لو قرابته يضحكون عليه يقولون عنه صّحيح صدقن الله بيعافي هالصّحيح و يبتليهم من يضحك عليهم في المجالس ..

والله مهنا غثى وأنا أختك الله يسعدك يارب

هذا الليب افكر فيه امشي مع هلا الخير مشكورة

أبعطيك تجربه مريت به قبل سنوات طويله ..
كنت خجوله و الدمعه على طريف من أدناة شي حتى لو أحد يجدع علي كلمة أو يحرجن أصيح موقفي جداً غبي عند الناس ..
حصل موقف بين أختي و زوجة أخوي و أكلته أنا لأن أختي مسافره و حصل سوء تفاهم بيني و بين سندي بهالدنيا أخوي و أكتب لك و العبره بعيني الأن
عشان زوجته و أنا يشهد ربي أمشي جنب الحيط مالي بالمشاكل و مكر الحريم
هاشن أخوي و أوجع قلبي بكلمة فرح زوجته علي وهي تبتسم مشت الأيام و السنين وأمي تهوشن وشوله تصيحين بتقسيتس الدنيا و صدقت أمي صرت حقي أخذه ما أسكت و أخذت حقي من زوجة أخوي و من أخوي بأفعالي خليت راسها ينزل إذا شافتني بالمجالس حتى الأن تعزمن و تسلم علي ..

اللي سويته صفر على الشمال ما كأنها موجوده بهالدنيا تجي عند أهلي أكرمها و كلمة ورد غطاها
بس ..
المواجيب أوجبها لكن التجاهل خلاها تعرف أن الله حق و أخوي الله لا يخلين منه وهذاه أكبر من بسنين يكرمني لا شافن و يهلي ويرحب بي ..

الخلاصه أن التطنيش جاب حل لبعض الناس و الحمدلله حسيت مرتاحه كثير ..