اسعد الله أوقاتكم


أنا تخرجت من كلية التربية قبل 10 سنين ودورت وظايف مالقيت قالوا محتاجين حاسب رحت درست دورة ورجعت لهم قالوا ماينفع دورة خذي دبلوم ودرست دبلوم قالوا ماينفع دبلوم سنة ادرسي ابو سنتين ولا قدرت ادرس ابو سنتين لأني درست دبلوم سنة بـ 15000 ريال ومتسلفتها بعد ، تزوجت آدمي وقال ممنوع تتوظفين أنا باصرف عليك وضيعت من عمري 3 سنين معه وتطلقت منه ورجعت ابحث عن وظائف ولا لقيت ، بعد كم سنة دخلت اسمي في جدارة وفي حافز .. جدارة للحين ماوظفوني وحافز حضرت معرضهم حق لقاءات ولا وظفوني وإعانة حافز ماتشملني لأن في شغالة مستقدمينها اهلي باسمي عشان مطلقة ولا استفدت شي من هالشغالة ولا حد عوضني وبليز لا يجي احد هنا يقول انقلوا الشغالة بأسم احد لأن مافي احد .. طقة في راسي فكرة إنشاء مشروع وقدمت على المؤسسات اللي تدعم المشاريع الصغيرة ولا عطوني وجه بحجة أن مشروعي مو من اولوياتهم دعمه أو أن تكاليفه بدراسة الجدوى اضخم من إعانتهم .. كلمني اخوي اليوم مبتعث في أحد الدول الاجنبية قال مالك إلا تدرسين ماجستر وهو يتكلم ويتكلم وكذا وأنا قاعدة افكر فيما لو درست ماجستير إدارة اعمال مثلا على حسب إحتياج السوق الأن وحصلت عالشهادة وجيت بابحث عن وظيفة قالوا ماعاد نحتاج إدارة اعمال روحي ادرسي اختراع صورايخ
صدق بالله ترى قربت اصك الـ 34 وأنا ما انجزت شي بحياتي والله قهر ، دلوني وين اروح ابي ادرس ماجستير وترى تقديري يوم اتخرج جيد ونسبتي في الحضيض بس وربي طموحة وذكية وودي اسوي شي محد سواه بس مالقيت اللي يوجهني تعبت من المواقع وأنا اطوفها كل صباح تعبت من الصحف الالكترونية ومواقع التوظيف والروتين القاتل في البيت .. وين ممكن ادرس ماجستير بأقساط وإلا شي كذا على قد الحال .. ووين ممكن ادرس لغة انجليزية واطلع بلبل مدري ببغاء في الانجليزي على يد ناس صاحين غير نيوهورايزن والعالمية وطقتهم ابي شي زين ؟
بليز ساعدوني لو بس بكلمة حلوة وإلا دعوة طيبة تطلعني من الاكتئأب اللي أنا فيه