(( القصة كامله ))

المرحلة الاول 1
.................................................. .....
بسم الله الرحمن الرحيم
الحمدلله حمداً كثيراً
اليوم راح اقولكم وش القصة من والى...
تم فتح التقديم السجون لطلب 800 طالب
في اوخر شهر 3 وقدمنا وكان يوم الثلاثاء وارسلت ملفي يوم الخميس الظهر وتم الاتصال يوم الاحد الساعة6ونص المغرب
وقالي موعدك يوم الاحد الجاي الي هو 4/7
بعدها حجزت طيران والحمدلله حصلت على الخطوط280ريال وكانت رحلتي صباح الاحدالساعة 5 والحمدلله وصلت الرياض
ورحت طيران ناس وحجزت للعودة ب260
وبعدها على طول اخذت تكسي لخريص الي هو موقع السجون ب80 ريال وصلت السجون طلع الرائد جمعان المالكي وقال الي يسمع اسمه يجي ورحنا قسنا الطول وماقصر جمعان يحاول قدر المستطاع انه يطلع طولك الحقيقي
قلي تمغط وشد نفسك والحمدلله عدينا وبعدين اعطاني ملفي وقالي رح عند العسكري وبعدين رحت عند العسكري واخذ بطاقتي ولازم تكون جديدة عشان يشوف انك سجلت والا لا ، لان بعضهم ماسجل وارسل ملفه ، وبعدين ياخذ منك الصور الشخصية ويعطيك ورقة لوزارة التربية والتعليم وملف تعبيه وتختمه من العمدة والشرطة وكتب على الملف ان الموعد الجاي 5/7 يعني بعد شهر وبعدها طلعت واخذت تكسي للمطار ب50
ورجعت جدة ....



المرحلة الثانية 2
.................................................. ....
في اخر شهر 5 وبعد اقتراب الموعد
جاني اتصال في الصباح من السجون بتاجيل موعدي للاربعاء 5/29
وقالي انو راح تجلس في الرياض اسبوع
عشان الكشف وراح تسلم ملفك الاربعاء وتبدأ الكشف السبت والحمدلله وبعد تفكير عميق قررت اني اروح السبت لانو صعبة اجلس خميس وجمعة في الرياض بدون شي وكان قرار شجاع <<هههههه
وحجزت ليوم السبت 6/3 على ناس والحمدلله حصلنا لايت ب210 وكانت رحلتي الساعة 7 والحمدلله وصلنا الرياض وركبت تاكسي ب80 للسجون ورحت هناك وعطيته اسمي ودور بين الملفات وحصل ملفي وماتكلم ان موعدي الي كان الاربعاء وبعدها اعطاني ورقة للاحوال وقال هاذي تخلصها من مصدر بطاقتك واذا دقينا عليك بعدين عشان تجي لمستلزمات الدورة تجيبها وقالي رح بصم عند العسكري ورحت بصمت وقالي خلاص من بكره الى الاربعاء تروح مستشفئ قوئ الامن في الملز واعطاني ورقة صغيرة مكتوب فيها وصف المستشفى والحضور الساعة 9 وبالزي السعودي في المستشفى....



المرحلة الثالثة 3
.................................................. ....
الكشف الطبي اول يوم..(طول و وزن واشعة )
اخذت تكسي ب30 الساعة 8 و وصلت المستشفى 9 وبعد ربع ساعة نادى بالاسماء ودخلنا و وزعونا على الكراسي
وبعدينا جاء العسكري وقالنا انو اليوم عندكم (طول ووزن) واشعة (صدر وظهر) وبس
ومن بكره الحظور الساعة 7 وبالزي الرياضي
وطول فترة مراجعتك للمستشفى صمت جوالك ولا اشوفه في يدك ، وبعدها دخلنا لاخذ الطول والوزن وبعدين تروح للاشعة وبعدين اخذت تكسي ب30 وخلصنا من اليوم الاول...


الكشف الطبي ثاني يوم (بول ودم)
دخلنا و وزوعنا على الكراسي وقالنا العسكري
بعد شوي تدخلون عند الدكتورة وراح تعطيكم علبه ورقم وتروحون تعبون العلبة لنص وترجعونه للدكتورة وبعد ماتخلصون كلكم راح تدخلون عند الدكتورة مرة ثانية عشان تسحب منكم دم وبعدها من الباب ،
والحمدلله خلصنا من اليوم الثاني ...


الكشف الطبي ثالث يوم (العن يوم)
دخلنا الساعة 7 ولطعونا الين جاء دكتور الاذن والانف الساعة تسع وبعدين دخلنا كلنا ومشى الدكتور وكلنا عدينا الحمدلله
وبعد ساعة جاء دكتور التفصيخ هههه
وقالنا العسكري كل واحد يفصخ فنيلته في الغرفة ويرجع يجلس
وبعدها دخلنا عند الدكتور وتفصخ ويقولك قد سويت جراحه وترجع تلبس فنيلتك وتجلس
والحمدلله عدينا
وبعد تقريبا نص ساعة جاء دكتور العيون وفحصنا ، حتى لو اخطيت يعطيك محاولة ثانية وثالثة والحمدلله الكل تقريباً نجح ، وبعدين لطعونا الين اذن الظهر عشان دكتور الباطنيه ماجاء
وبعد ماجاء دكتور الباطنيه قالنا العسكري رح فصخ فنيلتك وارجع اجلس
وبعدها دخلنا على الدكتور ويحط السماعة على بطنك وصدرك وتروح تلبس فنيلتك وتمشي ...



الكشف الطبي اليوم الرابع والاخير😍
تحليل سموم (بول)
لطعه من 8اليييييييين 11 وبعدها طلع العسكري ومشينا على المستشفى من البوابة الامامية وبعدها ينادون بالاسماء وتاخذ علبه ويفتشك العسكري وتخش الحمام وتعبيها لنص وتمشي ...
.................................................. .

نقاط مهمة
اول شي الحمدلله حمداً كثيراً
الي شاف التقرير بيستغرب ليش انا حاط اسعار التكاسي والطيران
لان ودي اعلمكم كم كلفتني بالضبط وعشان تستفيدون
اول موعد رحت طيران ذهاب وعودة ب540
والمشوار من والى المطار130
المجموع 670

وثاني موعد رحت ذهاب وعودة طيران ب490
ومن المطار الى السجون ب80
ومن السجون الى جنوب الرياض 50
طبعاً كنت ساكن في جنوب الرياض عند واحد من جماعتنا
ومن جنوب الرياض الى المستشفى 30 والعكس 30
اربعه ايام كانت ب240
ومن جنوب الرياض الى المطار ب50
المجموع 860

مجموع الرحلتين 1530

وفي الختام
اتمنى للجميع التوفيق والسعادة في الدنيا وان يسعدنا الله جميعاً بالوظيفة ...
واعتذر للاطاله..

الحمد لله الله يعطيك العافيه بسيطه يارب لك الحمد


الله يوفق الجميع يارب ويفرح الاخوان بالاتصالات

الله يوفقكم ياشباب والله حمستونا للمواعيد والكشف الطبي والعلوم الزينة
ان شآء الله بكره يدقون علينا لان صراحة طولو انا اخاف انهم ماتصلو فيني عشان انا اللي سلمت ملفي مو البريد حسبي الله على البريد لو منتظره للحين ماوصل ملفي تتوقعون يتصلون ولا لا؟ والله تعبنا من التفكير
يآرب يتصلون علينا ابي اشوف باقي اخواني فرحانين ضامي وتبوكي فخر واحبك ياحايل وباقي الشباب اللي ينتظرون

^^^
ي رب