السلام عليكم ورحمة الله وبركاتة

مكتب العمل جاب لي عقد نفسية من كثرة مراجعتهم بالأول كنت فاتح مغسلة ملابس ودبلو تسبدي لين وظفت سعودي وتأمينات وقروشة وغثى ما بعده غثى

ومن 6 شهور تقريبا نويت أفتح فرع لمغسلة الملابس وعملت جميع الأغطية الشرعية للمشروع وصلت لمكتب العمل ابي أستقدم العمالة

قالوا لازم سجل تجاري رحت وسويت سجل تجاري

جيتهم قالوا لازم اشتراك للغرفة التجارية للسجل الفرعي سويت اشتراك للفرعي

قالوا لازم تفتح ملف جديد بمكتب بالحاسب طيب عندي ملف من قبل للفرع الرئيسي قال لا كل واحد ملف بلحاله سويت الملف

اخر شيء قال أنت ما وظفت سعودي قلت موظف سعودي على الفرع الرئيسي قال لا وظف سعودي على الفرعي ولا ما هنا عمال ولا تجي الا أنت موظف سعودي !

اللي بعرفة اللحين أنا دخلت لموقع وزارة العمل ولقيت إنه البرنامج المُتبع عندهم نطاقات اذا كان نطاقك بمكتب العمل أخضر (من 9 عمال وتحت) يكفي توظيف سعودي واحد فقط والعمال اللي عندي 2 فلبينيين وغيره ماعندي غيرهم !!

وش السوات يااخوان أنا على حق ولا باطل

وهل اللي قاله الموظف لي بتوظيف سعودي على كل فرع صحيح ولا بس تطفيش وتعقيد..

والسعودي والله لو شغلة المغسلة تعجبة أوظف سعودي فعلاً وأخدمهم بكل ما أملك يعني اللي قاعد أسويه أنا وغيري من التجار المبتدئين كله تزوير في تزوير

اسف أدري بربرتي واجد بس أبي الحل