بسم الله الرحمن الرحيم

السلام عليكم ورحمة الله وبركاته

اخواني انا خريج هذا الفصل وقد حصلت لي مشكلة اعاقت استلامي وثيقتي والمشكلة هي :

انا طالب في الجامعة اكملت جميع المواد بنجاح والحمد لله وقد حصلت لي مشكلة مع عضو هيئة تدريس في الجامعة وهي أنه في الاختبار الدوري اختبرنا في موعد خارج موعد المحاضرة وجيت للاختبار متاخر ودخلت الاختبار وحليت وباقيلي سؤال واحد وانتهي الوقت والدكتور رفض يعطيني وقت عشان احل السؤال مع العلم اني اعرف الاجابة . الحاصل الدكتور اطفا نور القاعة واجبرني علي تسليم الورقة وبالفعل سلمتها له ولكن تحسبت عليه بصوت مرتفع وصار نقاش بيني وبينه على الوقت وانه ظلمني. انتهت المشكلة، بعدها بسبوعين اختبرنا اختبار نهائي بعد الاختبار بثلاثة ايام حط لي 80 من 100 انا رحت له المكتب ودخلت على الدكتور وقال لي انا اعطيتك 80 وطالبت بمراجعة اوراقي وقال بعد الاجتماع وهو زعلان بعد الاجتماع قفل باب المكتب رافض يكلمني بعدها بثلاثة ساعات سحب الدرجه وهي 80 وحط لم يكتمل وبعدين رفع عليه شكوى لوكيل الكلية وهي اني تلفظت عليه واقتحمت مكتبه وهو في اجتماع !

الان انا في حيرة من امري انا ناجح في المادة ولكن الدكتور رافض يضيف الدرجة والوثيقة ما اقدر استلمها الا بعد ما ينزل الدرجة ووكيل الكلية يقول احنا في الصيف ولا فيه لجنة للتحقيق وبكذا بتأخر ترم او ترمين عشان ينتهي التحقيق و ينزل الدرجة ويمكن ما ينزلها.

يقولون ان فيه لوائح في الجامعة تخليك تعيد المادة مرة ثانية ؟

وش رايكم يا اخوان يا اهل الخبرة ايش الحل مع الدكتور هذا مع العلم ان الدكتور سيئ التعامل وشديد جدا ولا يقدر ولا يحترم الطلاب

ايش الحل في هالمشكلة انا عندي تقديمات على وظايف واخرني وانا الان في حيرة ما يعلمها الا الله.

احتاج واحد خبرة في الانظمة او في التعليم العالي يفيدني .


الله يجزاكم خير

الله يعنيك كان تحملته يجي من يفيدك

وعليكم السلام ورحمة الله وبركاتة ..

أول شي بعطيك النصيحة وأنت براحتك ..

تروح عند الدكتور وتعتذر منه وتتأسف مو عشانه يستاهل بس عشان تتخرج يا بعدي

أنا صارت لي نفس مشكلتك بس مع عامل أجنبي تلاقطت أنا وياه داخل الجامعة

والله لو ما تأسفت له كان مفصول من الجامعة , بس ما أقول أني ما خذت حقي برا

فـ أسسمع نصيحتي وتأسف منه ولو عطاك 60 من 100 لا تتكلم أهم شي تتخرج

وبما أنك خريج أن شاء الله ما يأثر في المعدل واجد بحكم أنك خلصت ساعات واجد


والله يوفق الجمممميع ..

كلام ادارة مالية صحيح

نصيحتي لك العن الشيطان واحتسب اجرك عند الله

رح للعميد او دكتور انت ترتاح له او تعرف انه بيحل لك الموضوع

بحيث يكون هو مصلح بينكم ..... انت اعترف انك غلطان

معليه استحمل..... واعتذر منه .... وعسى الله يسخره لك

وتمشي امورك ........يوم قريت موضوعك والله اني دعيت لك ان ربي يفكك منه

لانه والله شي يقهر


الله ييسر لك امرك ويوفقك ان شاء الله

ما احد يرضى لاحد الظلم والله

لا تنسى تدعي ربي يسخره لك

واعطنا اخبارك اش صار معك

الله يوفقكم وجعل والديكم في الجنة

كلامكم في محلة لكن الدكتور رافض يقابلني اصلا والموضوع تشعب وراح له اكثر من دكتور يتوسط لكن مافيه فايدة

يعني اعتذر او ما اعتذر ما ينفع .

انا طالب معدلي فوق 4 من 5 والدكتور ظالمني ولي الحق ولكن هو افترى عليه بشكواه .

اللي ودي اعرفه هو وش القوانين واللوائح .

وايش بيكون مصيري يعني اعيد المادة او تحجز الوثيقة سنة أو فصل من الجامعة .

مع أن شواه تافهه زي وجهه .

الله يوفقكم وجعل والديكم في الجنة

كلامكم في محلة لكن الدكتور رافض يقابلني اصلا والموضوع تشعب وراح له اكثر من دكتور يتوسط لكن مافيه فايدة

يعني اعتذر او ما اعتذر ما ينفع .

انا طالب معدلي فوق 4 من 5 والدكتور ظالمني ولي الحق ولكن هو افترى عليه بشكواه .

اللي ودي اعرفه هو وش القوانين واللوائح .

وايش بيكون مصيري يعني اعيد المادة او تحجز الوثيقة سنة أو فصل من الجامعة .

مع أن شواه تافهه زي وجهه .

ما ودي أخوفك لكن ترا والله مهب بعيدة يمسكونك الباب ..


حآول ي أخوي بي طريقة تقآبلة حتي لو تضطر تجيب أبوك أو عمك

الله المستعان

ياخي الواحد احيانا يسال نفسه الاشكال هذي كيف
تصير في مناصب زي ذا

عموما .... تعرف النشبه وش معناها ... يالحبيب
عندك ثلاثه ما تفكهم
العميد و وكيل الكليه ورئيس القسم
اللي موجود منهم خش عليه واعطه السالفه... اذا ما كان قد خبرته
واجلس في مكتبه مقابل وجهه...لان لازم واحد منهم يحل موضوعك ما ينفع
تبقى معلق كذا

اذكر واحد من الشباب سنه 2005 في جامعه الملك فيصل
صار له نفس اللي صار لك
بس الرجال نشب للعميد تخيل اسبوع يجلس في مكتبه
واذا خرج العميد
جلس عند السيكرتير
من 8 الى 2 طفش امه......في الاخير مشت اموره


اذا ممكن وش الجامعه اللي انت فيها

المثل يقول لصار لك مع ال....... حاجه قله ياسيدي


دور لك احد يعز ذا الدكتور وخليه يكلمه

او روح لعمادة الجامعه واشرح لهم السبب واذا طلبوا منك تعتذر له اعتذر

ذا مستقبلك لا تخسره بسب انسان

اكثر من قول ( حسبنا الله ونعم الوكيل

والله معك

الحل سلمك الله هو كالتالي وبإذن الله سينفع معك
1-أحفظ جميع الأوراق والتقارير التي كانت للمقرر من درجات وبحوث ومشاريع وصور من الموقع النتائج .
2-اذهب فوراً إلى مدير الجامعة مع خطاب تظلم (تذكر أن درجتك غيرت إلى رسوب بلا مبرر مادي ودليلي إجابتي , وفي حالة عدم إنصافي فإنني سأتظلم بالطعن في قرار الجامعة بترسيبي في مقرر ... من الجانب الموضوعي والشكلي أمام المحكمة الإدارية ) مع التفاهم الشفهي مع مدير الجامعة .
3-إذا لم ينفع ماسبق قدم دعوى أمام المحكمة الإدارية (ديوان المظالم) الموجودة في نفس مدينة الجامعة
وتقول في دعواك أطعن في قرار ترسيبي من قبل الجامعة ويمكنك أن تتواصل معي في هذا أو توكل محامي أنت بالخيار.

أخيراً جامعتنا فيها ظلم أعتقد لو وزع على المجرات لكفتهم ( خبث , إحتقار , كراهية , إستعلاء , حسد , سطحية , حقد , تدمير مستقبل الناس).