بسم الله الرحمن الرحيم

السلام عليكم ورحمه وبركاته

اخواني واخواتي الكرام .. انا عندي مشكله او بالاصح هي مو مشكلتي ههي مشكلة امي لكن تتعلق فينا كلنا اكيد

وانا سجلت بهالمنتدى عشان آخذ رايكم ومشورتكم واي فكره تقدمونها لي واتمنى المساعده

ياأهل الخير .. والله سجلت بهالموقع لانه اعجبني اشكر القائمين عليه والاعضاء الكرام والله يوفقكم

ومنه ابعرض مشكلتي واعرف انكم ماراح تقصرون يالغوالي .. الحمدلله اللي هداني لهالموقع الرائع

امي الله يحفظها ويخليها لنا عليها ديون 10000ريال فقط

طبعا هذي الديون تسلفتها عشان اولادها عشان يعيشون مثل الناس ومايكون عليهم ناقص

لان ابوي بخيل وعلى كل شي يدقق ويحسب الله يسامحه بس .. هو على قيد الحياه وألحين عسكري متقاعد

واحنا عايشين لله الحمد والمنه بعماره صغيره وضيقه ملك مكونه من دورين لكن اللهم لك الحمد احنا راضين
دورلنا ودور فيها اخوي المتزوج وموظف حكومي كمان لكن هو ابوي مايسالون عنا ولايدرون وش ناقصنا
ومايبغون يدرون همهم انفسهم بس حسبي الله ونعم الوكيل بس


وامي الحين تعبانه .. تبغانا نروح زواجات مثل العالم وتبغانا نتزوج ؟!!
احنا يالبنات لا لنا حول ولاقوة الا بالله .. ونعمه ان اخوي مدخل هالنت البيت عشان اقدر اتواصل مع اهل الخير

والله معاناتنا مع امي صارت اكبر من معاناة الديون نفسها .. لان ألحين مسجله انا وأختي بحافز
لكن اول مايجي نصرفه على طووول لان في اشياء كثير تنقصنا .. البيت ينقصه اشياء كثيره
زياده على كذا امي تطلبها منا عشان تسدد ديونها .. صارت تهاوش فينا وتسبا وتقول كلام يجرح وماينقال

صارت تقول انتم بس عله على كبدي انتم كاسرين ظهري انتم همي انتم ماتقدرون تساعدوني
انتم بس جيتوا تزيدون علي الهم والكدر ..

وين نروح وش نسوي .. والله تركت آخر سنه من ثالث ثانوي ماكملتها اربع سنوات الى اليوم
عشان اجلس مع امي اساعدها بالبيت واجلس اشوف طلباتها واعطيها اللي يرضيها
وادور على وظيفه .. واللي يودينا هالمشواير والروحات التاكاسي .. اخوي دايم يقولنا مشغول
بعدين انا مو مكلف فيكم

وابوي دايم يقول تعبان والسياره خربانه او يقول ماعندي فلوس .. حتى ماعلمناه بحافز
لانه لو درى بيسحبه منا بيقول علي ديون واقساط .. لكن الحقيقه ان ابوي معه فلوس ويبخي علينا
ودايم يعطي الناس ويساعدهم ويشوف وش ناقصهم واهله مادرنا عنهم والله العظيم

امي تعبانه ألحين وقلبها يوجعها ويدينها طلعت فيها اورام وعندها الضغط وحالتنا مايعلم فيها الا الله
لكن اللهم لك الحمد تراجع بالمستشفى .. لكن يوم عن يوم تصير تكرهنا وماتطيق تشوفنا وتدعي وتصارخ فينا .. والله تعبت تعبنا كلنا من الهوضع لاسفر ولاطلعه ولاشي ادري ان امي تعبت نفسيتها
حتى انها دايم بالمشاكل مع ابوي اللي يختلقها ولايريحنا ابد .. لكن والله مراعينها وماقصرنا معها
بس تحط الحره فينا .. والله تعبنا .. انا وخواتي واثنين اخوان لسا يدرسون

على كلن اللهم لك الحمد على ماتعطي وتريد

بانتظار ردكم علي وجزاكم الله خير

الله يفرجها عليك يابنت الحلال ويسخر لكم اهل الخير ويوفقكم ويغير حالكم للأحسن ويعوظكم صبركم خير واتمنى من الجميع والي يحبون الخير بالوقوف مع اختنا الكريمه واكتساب اجرها والله يجزي كل من أحسن وساعد المحتاج وأسأل الله الكريم الرحيم أن يفرجها عليكم ويرزقكم ويحفظلكم امكم ويجي اليوم الي تعوظوها على صبرها .....

اختي والله لو أنتي منتي غريبة علي كان حضنتك وأنا أبكي وشوفي أختي في الله أكثري من الدعاء لكي ولأهلك قبل صلاة الفجر بنصف ساعة واكثري من الإستغفار وأي شيء تبينه أنا واخواني هنا وخواتي مايقصرون بإذن الله.

لاحول ولاقوة الابالله !

الله يهدي والدك و اخاك ويسخرهم لكم

اختي امك لاتكرهكم هي تمر بحالة ضغط عصبي قوي جدا ...!

وذلك من وضعها اولا وعدم اهتمام والدك وقلة حيلتها ثانيا !

وهذا سبب اساسي لمعاملتها لكم هكذا فـ اعذريها ...!

ووقوفك جانبها وتركك دراستك لأجلها لن يضيع عند رب العالمين ...!

وربما يكون سببا لفتح ابواب الخير لكِ في الدنيا قبل الأخره ...!

اعرف اختي ان الضغط الان سيكون على الشخص المهتم وهو ( انتي)

ولكن تماسكي واصبري من اجل اخواتك

امك الان بحاجتك اختي اكثر من اي وقت مضى !

والاورام الظاهره كما ذكرتي هي من ارتفاع الضغط ! انتبهي عليها اختي

ركزي الان على والدك وتكلمي معه باللين فحالة والدتك لاتسمح بالنقاش معها

ان قطرة اهتمام من والدك يمكن ان تحول امورا كثيره في حياتكم

وربي قادر ان يبدل حالكم من حال الى حال

اسأل الله ان يعوضك خيرا ويفرجها عليك ويشفي والدتك انه على كل شيء قدير

وعليكم السلام ورحمة الله بركاته

فرج ربي قريب واصبري واحستبي الأجر ان الله مع الصابرين

تقبلي مروري

اللي مافيه خير لاهله مافيه خير للناس
اعذريني اختي على هالكلمة لكن بجد اللي قريتة ينفرز كثير
لكن مالكم الا ربكم اللي بيفتحها بوجهكم ويمدكم بالخيرات حاسبو وتصبرو
وان شاء الله الامل في اخوانك اللي يدرسون عقبال ماينفعون امهم وينفعون خواتهم
والله يعافيك امك من كل شر ويطول بعمرها ويصبرهاا يارب

الله يبدل حالكم للاحسن اختي

ويرزقك من حيث لا تحتسبين

بس تاكدي ان في كثير ناس مثل حالتكم

وتقربي من الله وتصبري

ومابعد العسر الا يسرا

واضح انك مضغوطة نفسيا كثير وواضح انك على نياتك اكثر من اللازم. انتي عارفه انك بكلامك هذا ممكن تفتحين على نفسك ابواب مغلقه مواضيع مثل كذا تناقشينها مع ناس تثقين فيهم ميه بالميه والشي الغريب يجون بعدين ويقولون البنات عرضه للاستغلال انتبهي للنفسك وانا اخوك صحيح الانسان ينضغط احيانا بس خلي فيه شوي فرامل الدنيا فيها طيب وفيها خبيث

[align=center]لاحول ولا قوة الا بالله

الله يساعدك ويقوي قلبك انتي وامك واخواتك

كثري دعاء واستغفار
(لااله الا انت سبحانك اني كنت من الظالمين)
وان شاء الله اليوم قبل بكره تنحل اموررك ياحياتي[/align]