السلام عليكم وحمه الله وبركاته

قبل يومين نزلت موضوع لتجارة العطور ، وسامحوني نزلته دون التعمق بدراسة المشروع وكان فيه شوي لف ودوران مني ..

لأني والله شفت هنا حب للخير بشكل يشرح الصدر ، وقلت لازم أنزل أي مشروع يعجبني ..

عندي دفتر مليته دراسات < إرحمنا يا دراسات

صدق والله ، قعدت أدور طرق للكسب وطرق البيع ومثل كذا ..

بأقول لكم كل إلي في قلبي ، وبأكشف المستور .. وأبيكم تسامحوني وتلحللوني الله يوفقكم ..

الموضوع السابق نزلته وقلت إن تجارة العطور يبيلها 3300 ريال أي 33 ريال للعطر الواحد ..

أنا كنت أبي عمولة لي وهي 300 ريال ، على أساس أشتري 100 عطر بـ30 ريال للحبة وأبيعه بـ 33 ريال

ما أدري كيف غررت نفسي على الترزق بهذا الأسلوب ! < سامحوني ..

كنت أبي أعتذر كلام كذا وبس ، لكن طول يومي أدور على طريقة ، ولقيت تاجرة تبيع قطاعي الحبة بـ 30 ريال ..

وأجتهد وأتواصلت معها .. وقلت أبي أشتري 100 حبة ، بكم تطلع علي الحسبة ..

قالت ويشهد علي الله 2500 ريال / يعني العطر الواحد بـ25 ريال ..

وبالنسبة للعطور ومواصفاتها .. هي كالتالي :

ـــــــــــــــــــــــــ
(إقتباس لكلام التاجره : يتوفر لدينا عطور ماركات عالمية فرنسية بأسعار خرافية ونشحن لجميع المناطق

((( الماركات صناعة فرنسية طبق الاصل في الشكل والكتابة و التغليف وبنسبة 99% الرائحه ولكن ليست هي الأصل )))

ثباتها يتراوح بين ساعة الى 5 ساعة )

ـــــــــــــــــــــــــ
(طبعا لازم إلي يبيع مقلد يبلغ الزبون إنه مقلد درجة أولى + الزبون أكيد بيدري من دون ما تقول له لأن الأصلي سعره 400 وإنت طالع أو أسعار كذا )

أنا ما بكون وسيط ، إلي يبي يشتري يتواصل معها بنفسه .. طبعا لها موقع ع النت ..

ولأن الروابط ممنوعه ، إكتبوا بقوقل "جنى للعطور" وهو أول رابط ..

بتشوف إن العطر الواحد بـ30 ريال ، بتلقى فوق على اليسار مكتوب [إتصل بنا]

إضغط عليها / بتجيك إستمارة :

الإسم : <هنا إكتب إسمك>

البريد الإلكتروني : <هنا إكتب إيميلك>

الرسالة : < هنا إكتب إنك تبي 100 عطر بقيمة 2500 ريال وقول لها موافقة ؟ أكيد بتقول طيب >
* ملاحظة : إكتب إلي تبيه المهم إنك توضح إنك تبي 100 عطر وقول لها أبي خصم عليها .

أخيرا أبي أعلمكم طرق للبيع يا أحباب ..

(الطرق إلي كتبتها بالدفتر )

الطريقة 1 :

{لبيع القطاعي}
ومعناه البيع مفرد وليس كل الـ 100 عطر مرة واحدة ..

دراسة بسيطة ..

- 25 ريال قيمة العطر عند شرائك له

- 50ريال قمية بيعك للعطر الواحد
< تقدر تبيعه حتى 100 ريال لكن على حسب موقعك ^_*>

- متوسط بيعك في اليوم الواحد على أقل تقدير 10 عطور

- تحتاج لإسترداد راس المال بيع 50 عبوة عطر
< 50 عطر × 50 ريال = 2500 ريال إسترجاع راس المال>

- مكسبك سيكون في بيعك للـ50 عطر المتبقي
< 50 عطر × 50 ريال = 2500 ريال مكسب>

- ملخص : إشتريت 100 عبوة عطر بقيمة 25 ريال للعطر الواحد وبعت 100 عطر بقيمة 50 ريال للعطر الواحد يعني كسبت 2500 ريال < فتح مخخكم معاي شوي ههه .


* ملاحظة : بيعها عند المول (السوق) موقع كويس + شد حيلك وشوف لك مكان وتذكر كل ما كان موقعك ممتاز كل ما بعت بسعر غالي ^_* ..

الطريقة 2 :

{ البيع جملة }
يعني تبيع الـ100 عطر دفعه واحدة ..

- تشتري 100 عطر بقيمة 25 ريال للعطر الواحد ..

- تبيع 100 عطر بقيمة 26 ريال للعطر الواحد .. < مثلا

مكسبك 100 ريال بس .. لكن وش مميزات السالفه ؟

المميزات :

- شغلك من البيت (النت) بس ..

- الطريقة ممتازة للبنات لأنهم ما يقدروا يطلعوا ويبيعوها ..

- تقدر تبيع حتى 29 ريال للعطر الواحد < لكن الله يعينك لين ما تلقى من يشتري >

الطريقة :

تشتري ال100 عبوة عطر / وتروح لمواقع التسوق الإلكترونية أمثلة :
(موقع سوق / موقع حراج / الأقسام التسويقية في المنتديات / إلخ ..)

وتكتب التالي : (مثال)

السادة أعضاء و زوار موقع < فلان الفلاني > المحترم

السلام عليكم ورحمة الله وبركاته


يتوفر لدي عطور ماركات عالمية فرنسية بأسعار خرافية وأشحن لجميع المناطق

((( الماركات صناعة فرنسية طبق الاصل في الشكل والكتابة و التغليف وبنسبة 99% الرائحه ولكن ليست هي الأصل )))

ثباتها يتراوح بين ساعة الى 5 ساعة

ــــــــــــــــــــــــــــــــــــــــــــــــــ ــــــــــــــــــــ

وتنتظر رزقك يجيك ..


أتمنى إني كنت خفيف وواضح معكم وعليكم ..
وسامحوني على الحركة إلي مالها داعي بموضوعي السابق ..
وأتمنى من الله التوفيق لكم والرزق الحلال ..
أخوكم ومحبكم / معاذ القحطاني .
الموضوع من كتابتي أنا ومن تأليفي أنا ومن تعبي أنا وإلا آخره حلال عليكم ..

ملاحظة 1 : للأمانة مو متأكد أنا كلمت تاجر ولا تاجره o_O !

ملاحظة 2 : توجد تقريبا جميع أنواع العطور الفرنسية # ، تقدر تسأل في موقع التاجر/ة ..

الله يوفقك يارب
وشكرا لامانتك وضميرك وكل شي نزلته بموضوعك

ياليت تنزل صور للعطور الي اشتريتها
وطريقه التوصيل

الله يوفقك يارب

^
ويآكك ي رب ، والله يرزقك بالزوج الصالح الحنون يا رب !
+ ويرزقكك بالمال الحلال (:

يارجل انا اعطيك عطور اصليه وبالروائح اللي تبغاها وبتركيز قوي بــ 30 ريال

والعطور اللي اعطيك اياها تباع بــ 180 وطالع وقبل لا تشتري ادلك على المحلات اللي تاخذ مني ورح وشف اسعارها فيها


شغله ثانيه انت تقدر تصنع العطور اللي تبغاها وبالتركيز اللي تبغاه وبالمبلغ اللي تبغاه

^
1- أنا قلت بـ25 ريال ، وصدقني إلي تقول إنه عندك ، هو إلي أنا دلتهم عليه ..
2- أدري الله يعافيك .. ومشكور

ونيس انا ما اقلد الماركات الفرنسيه .. انا اعطيك نفس الرائحه 100 % بتركيز وثبات يومين الى 3 ولاكن بكرتون وزجاجه غير .. اصلا مايجوز تقلدها .. هذا يسمى غش ولو عرفوا الوزاره ترى فيها غرامات .. العطور اللي تسمى فرنسيه تراها تجي من دبي ومن الصين مضروبه وانت ماتقدر تستخدمها لنفسك وشلون تبيعها للناس


اذا تبغى تشتغل في العطور والعود والمفارش او اي شئ تبغى تشتغل فيه ... اشتغل بجوده الناس ترى ماهم اغبياء تراهم يعرفون الاصلي والملقد ..

انا اول مابديت في العطور جبت من الصين والله لها عندي شهور ما انباعت .. وعندي منها كميات كبيره .. كل مايسألني احد يقول اصلي اقوله لا .. يقول فمان الله .. خذ شكل وتصميم لاكن ثبات وتركيز اي كلام

اذا تبغاها تعال والله لا اعطيك براس مالها . وفوقها دعوه اذا فكيتني منها

انا بديت اصنع عطور ومفارش وبخور بجوده .. وحط على الجوده 100 خط الزيوت كلها فرنسيه واسبانيه وتميزت بإضافات من الصندل والجاوه وورود من افريقيا .. وبعدها الحمد لله بفضل من الله وكرمه والله اني ابيع كامل الكميه ما كملت 3 ايام .

واللي يشتري مني شركات كبيره لها اسمها في السوق .. مكسب قليل لاكن طلب كبير وشئ يستاهل .

وانت تقدر تصنع بنفسك مايحتاج تروح لأحد خذ الزيوت اللي عليها طلب واهتم في تصنيع المنتج وشوف الفرق من اول شهر ..

عالم العطور عالم كبير واذا تبغى تنجح تميّز فيه .

بالتوفيق للجميع