انا جيتهم يوم الخميس طبعاً .. أول ما جيت من الساعة 5:30 وقعدت اضبط الملف لأني كنت جايب الاخضر .. ثم دخلنا على المسرح والطعت ساعة وربع بعد ما سجلت ورقه التقرير الطبي .. ثم جاء دوري فالمقابلة ودخلت على لجنة رقم 2 اللي فيه والله طيب .. دخلت سلمت ثم ردوا السلام وقال انتظر دقيقه الى ان نناديك .. ثم انتظرت وناداني وسلمت مره ثاني وردوا .. قال كم رقمك وعطيته البطاقة .. ثم قال خذ الورقة اللي جمبك واقراها وقريتها الحمدلله .. ثم قال تكلم عن بر الوالدين قلت (( انه يرضي الله - ويرضي الوالدين - ويفتح ابواب الرحمة )) بس وسكت .. ثم قال انت ادبي صح قلت ايه ثم قال اكتب اي بيت شعر يطري على بالك على السبورة .. ثم قعدت اعفط مخي الى ان تذكرت بيت وكتبت (( وأجمل منك لم ترء قط عيني ، كأنك خلقت كما تشاء )) وقال انت تحب ..؟؟ قلت لا هذا بيت حسان بن ثابت فالرسول .. وقال طيب انت تحب ..؟؟ قلت احب امي وابوي .. قم قال انت تشرب قلت وش تقصد قالت تشرب قلت اشرب موية ولا شي ثاني .. قال انت وين راح فكرك .. قلت يمكن قصدك كحول .. طبعاً طول الحديث كان مع الظابط والدكتور والله ما شفت وجهه مدري ليه .. طبعاً المقابلة ما خلت من الابتسامة ..!

ثم رحنا للكشف وعطونى مثل حق المرضى بس لونه اصفر تنزل كل ملابسك عدا السناوي يطلع ظهرك من وراء ثم راحت قست الطول والوزن ودخلت على طول على الدكتور عيادة 2 وقال انسدح وقال افتح فمك .. وفتحت فمي كله وقال بس اسنانك وصكرتها ثم شاف العدة مع اني احسه كذاب ماغير معط السروال ثم قال وقف وطالعني ثم قال لف .. ثم قال خلاص وطلعت رحت البيت ..!


العصر وصلت وهم يصلون فالمسجد .. وثم دخلنا المسرح وقعدوا يبربرون على الاختبار التحريري .. سهل جداً 4 اسئله انقليزي والباقي فيزيا ورياضيات سهله جداً غليان الماء وزايد وناقص وتاريخ الملك خالد .. وهكذا ..!

ثم ودونا على الصالة الرياضية على شكل صفوف وفيه 10 مدربين مع انهم كلهم عساكر وتفوخ الصبح الأ واحد ثم عطانا بشم (( ضغط )) و (( ضغط بطن )) على صفارة اللي يحسب الحمدلله عديتها بـسهوله سهله جداً ممكن توقف قبل الصفارة او ممكن تكمل اذا كنت مخبع .. ثم يمشونا الى المضمار حول الملعب .. وعطون جري 400 متر لفتين يغني 800 متر .. والحمدلله مشيتتها بكل سهوله لأني متعود امشي اكثر من 5 الى 10 كيلو يومياً فالنادي (( تايكوندو )) ثم يقولون اذلفوا بيوتكم وتعالوا اليوم الثاني
(( بالنسبة لنا حنا يوم السبت يعني بكرة الفجر نصلي عندهم ونمشي للمستشفى وما نطلع الى على الساعة 1 - 2 الظهر .. يعني تجيبون معكم مبلغ بسيط حق الفطور )) الحين نومه الى ان تصفق فـ ـراسي القومه (( واذا رجعت بنوم واقف بعد ))
<< ادعوا لنا بالتوفيق ..
الله يوفقكم جميعاً .......!!!

بالتوفيق ,,,

كم كان رقمك ؟

سلام عليكم ورحممه الله وبركاته


ربي يوفقك يا بعدي

ههههههههههههههههههههههههههههههههههه

والله ياخي طقطقة فالمقاااابلة الشخصية

ودي استلكع معهم بس اخاف انجلد ثم انكرش

بس سؤال انت خريج ثانوي او جامعة ؟

الله يجزاك خير

ووافنا بالجديد

وبالنسبه لضغط وتمرين البطن

كم بالضبط المطلوب ؟؟؟

الله يوفقك ويكتب لك القبول

اخوي انت جامعي او ثانوي ؟

لاهنت يا سنافي والله يوفقك فيها باذن الله قبول نهائي

طبعاً توني راجع من الكشف الطبي النهائي ..
أول شي .. وصلنا عندهم قبل الاذان بشوي ثم قعدنا عند البوابة الى ان اذن ثم دخلونا المسجد وصلينا

بعد الصلاة .. صفينا طابور براء المسجد ثم مشينا الى ان وصلنا قبال باب صغير وخلونا نجلس فالشارع ثم بدئوا يحظرون (( للمعلومة " الاثبات وبطاقة المراجعة اهم شي مع اننا ما استخدمناهم ابد لكن العسكر ملزمين علينا ))
وتحذير فيه عسكري مهايطي (( اسمر )) على طول بيقولكم تراني ضحيت امس بأربعه احسن لكم اسكتوا (( كذااااب ما عنده ما عند جدتي ))
(( تخذير اذا نادوا اسمك لازم ترفع صوتك (( حااااظر - نعم )) ولا بتمسك الباب الزبدة اذا نادا اسمك قل حاظر بصوت عالي لأنهم منفسين وبيون يمسكون عليكم ممسك ورح عند المفتش يفتشك ثم يعطيك سواره تلبسها بيدك اليسار ويجلسونكم داخل صاله الى ان تجي الباصات وياخذونكم بالدور على الباصات (( كل باص فيه كراسي ثلاثه يجلسون على اليمين واثنين على اليسار )) الباص ما فيه عسكري يعني طقطقوا على كيف كيفكم ممكن المشوار كله ساعه ألا ربع

كلية الملك خالد العسكرية .. على طول بيوقفونكم طابور عن المستوصف كل واحد حسب مجموعته على السواره ثم يحضرونكم ويعطونكم أوراق فيه اربع ارقام و صوركم بالشماغ ثم يجلسونكم الى ان يجي دوركم عند

أول عيادة (( انف - حنجرة - اذن )) يفحصها ثم تروحون على عيادة (( الاسنان )) يشوفها مسوسه ولا لا ثم على
عيادة (( السموم )) .. تدخلون على حمامات ويعطونكم علبه بلاستيك (( بيفتشكم الدكتور ويقولكم لا تسكرون باب الحمام لكن ما عليكم منه انا سكرته وقفلته بعد )) ثم تبول (( وأنتوا بكرامة )) داخل العلبة (( لازم بول اصفر ولا غامق )) اما البول الشفاف ما يمشي يقولك مظروب رح غير زيت ههههههههههه (( واحد من اللي معنا سوا كذا الى ان افطر ثم طلع كويس )) ثم تدخلون على غرفة وتحطون العلبة على الطاولة وتبصمون فوقها ثم تروح تبصم على ورقه ثاني .. ثم تروحون على
فحص (( الدم )) يطلع ابره طول راسك هههههه امزح ابره طولها 5 ملي ويسحب دم على 5 زجاجات .. ثم تروحون على الاحم احم مدري وش اسمها يمكن
عيادة (( اثبات الرجولة )) هههههههه أول شي يخلونكم تفصخون كل شي عدا السناوي وتدخلون 5 أو 6 على غرفة وتوقفون قبال دكتور ويقول سوو كذا وسوو كذا تركعون ثم تتربعون ثم تدخلون على غرفة قبالها واحد واحد ثم يقولكم طالع هنا ثم ينزل سروالك (( موب كله بس مسافة يده يمسك المسافة ويقول كح (( كحكح لين تقول بس )) ثم يمسك (( العضو الذكري )) ويقول كح ثم يمسك العده (( الخصوه )) ويقول كح ثم يقول لف تعطيه ظهرك ويمسك اسفل ظهرك ويقول كح ثم تروحون على
عيادة (( العيون )) تدخلون واحد واحد يطلع دفتر فيه ارقام حجري (( عمى الالوان )) هذا رابط بالصبط مثله
https://www.btalah.com/eyetest/
ثم يقول اجلس على كرسي ويختبر ضعف النظر يقول سكر العين اليسار بيدك والعكس طبعاً انا عندي ضعف نظر جبت العين اليسار كلها صح لكن اليمين فيه اخطاء ..! ثم تروحون على
عيادة (( الباطنية )) تدخل وتفصخ البلوزة بس وتنسدح على سرير ويسألك عن كل الامراض والعمليات انت سويتها ولا لا .. ثم يجيب ذاك اللي يحطه في اذنه ونهايته على صدرك ثم يقول لف راسك يسار وتنفس بقوه ثم يقول اقعد و ولف راسك يسار وتنفس بقوه ثم يقول اللي بعد ثم تروحون على
عيادة (( النفسية )) يسألكم اسأله مثلاً انا سألني (( كم عمرك - كم نسبتك )) وعطاني ورقه قال اقراها في نفسك ثم جاوبني قريته السؤال كان (( اذكر سببين من اسباب اخراج الزكاة..؟؟؟ )) قلت واجبه وركن من اركان الاسلام ومكفره للذنوب .. ثم قال انت في صرع ولا مس ولا شي أو تقرأ عند شيخ قلت لا قال احد من العائلة قلت فيه بعضهم قال ليش قلت بعضهم سحر وعشق وحسد .. وبعض الاسئلة اللي عطاها غيري (( عد من 20 الى 1 )) انتبه تخربط وتعد من 1 الى 20 .. أو سؤال انت تسوق عند رخصه وليه تسوق .. وهكذا ..

كذا انتهيتم ثم تقدرون تفطرون طبعاً انا ماافطرت لأن العسكري يقول لا تقومون من مكانكم هو بيمركم معه عربيه وحاط فيها كل شي .. بس البنقالي تأخر ما مرني قمت اروح اشتري طلع مخلص كل شي .. يعني (( من أول ما تشوف العربية تندف الحق وراه لوز وقفك العسكري طنش امه ..
طبعاً تحذير فيه خصم درجات على (( كثرة الكلام - تحط ترجل على رجل " ترفع رجلك عن الارض " )) طبعاً اذا طلعتوا وحاقدين على عسكري خصم عليكم (( اذا مشى الباص طلوا مع الدريشه وسب في ابو من جاب ابوه )) ما يقدر يسوي شي ..ههههههههههههه !
ترجعون بالباصات على الحرس الملكي طبعاً بتستانسون بتنفتح لكم البوابة احم احم (( للأسف وفر وناستك لأنك بتنزل قبل تدخل البوابة )) هههههههههههههههههههههه
تخذير : ممنوع احضار (( الجوال - قبعة - قلم )) لأنك لو احضرته بيحطونه فـ كرتون ويقولون تعال خذه الظهر .. يعني لا تجيب غير ببطاقة الأحوال وبطاقة المراجعة وفلوس فطورك .. الششكوكه بـ ريالين والعصير الربيع بـ ريالين والموية ابو نص بـ ريال .. والشاهي بـ ريالين وشاهي بالحليب ثلاثه ريال .. يعني انت جاي في صندقه فاخره صامولي حق اسبوعين فايته وبيض مااستوى وللأسف انا مالحق على اي منهم لأنه من لذتها تخلص بسرعه ..!!

ثم كل واحد ينقلع بيته اللي يرقد واللي يتغدا واللي يستحمى ههههههه واللي ياكل جرجير وهكذا



هذا كل شي صار لي وأسأل الله التوفيق لي ولكم اجمعين للي فيه خيرنا ومقدر لنا .. اي استفسار اي سؤال انا فالخدمة ..