بسم الله الرحمن الرحيم


قبل آبدى في موضوعي بعطيكم تعريف بسيط عن نفسي ..
خريجة جامعه .. سعوديه ..عمري 25 سنه .. عاطله .. و اللهم لك الحمد ..

حلمي آن يكون في كل منطقه من مناطق المملكه ( نادي نسائي )
يفتح الساعه 8 صباحا إلى 1 الظهر
و من الساعه 3 العصر إلى 10 الليل
ما عدا الاربعاء والخميس و الجمعه و أيام العطل الصيفيه تكون مفتوحه إلى 12 آو 1 الليل ..

محتويات النادي /
- ساحات و حدائق كبيره ( تصلح ل الجلسات و السمرات و اللي يبون يسوون رياضه المشي )
- دورات تحفيظ القرآن الكريم و تجويده ..
- دورات تربويه مثل ( تأهيل البنات ل الزواج .. تأهيل المطلقات – كيفية تربية الطفل - كيف آتعامل مع المراهق )
- دورات نفسيه .. و عآد يا كثر النفسيات بسبة البطاله والحبسه في البيوت آآآه بس
- دورات تجميل .. الرسم .. الفوتوشوب .. الاعمال الفنيه ..الطبخ ..
- دورات صحيه .. حتى ما تجي البنت تألف لنفسها رجيم من عندها و يا أما تفشل و لا تجيب لنفسها مرض ..
ثم تتعب نفسيآ : (
- قاعه كبيره تلقى فيها ندوات و محاضرات دينيه و ممكن يستاجرونها بعض البنات آو المدارس إذا بغوا يحتفلون بتخرج طالبات آو يحتفلون باليوم الوطني آو آو ..
- كوفي شوب و و آماكن ل الجلوس و غرف يباع فيها كل مستلزمات المرأه ..



طيب هذي آمنيتي و حلمي اللي تمنيتها تتحقق من سنوآت ..

آحنا هنا في السعوديه حيآتنا مختلفه عن برى .. هالمشروع لو تطبق برى السعوديه ما رآح ينجح مثل نجاحه هنا في السعوديه ..
هنآ البنات آنفقعت تسبودهم من قعدة البيت و البنت تبي تطلع من البيت بأي وسيله .. مو مثل برى لو طفشت البنت ركبت سيارتها و آخذت لها فره في الشوارع .. بيكون النادي شي مو جديد عليها ..
بس هنا لما يفتح مثل هالنادي بتسجل و هي مغمضه عيونها.. ما صدقت تطلع و تقابل زميلاتها ..
و هنآ .. نكون فتحنا متنفس ل البنت و بشي مفيد .. بتلاقون البنات سجلوا في تحفيظ القران و بيكثرون حافظين القران كامل ..
بقول لكم على شغله ..آكثر البنات راح يسجلون بس عشان يستانسون و يقابلون زميلاتهم .. لكن مع الوقت وكثرة حضور الندوات و المحاضرات و تحفيظ القران .. آكيد رآح تتأثر و بيأثر على تفكيرها و يتفتح مخها و تفكر ب تفكير صح و ب تتقرب من ربي آكثر ..
غير كذا ..
بنكون كشفنا عن مواهب البنت المدفونه .. حتى هي راح تنصدم من نفسها..
و ممكن تستفيد من هالدورات .. و بتكّون لها مصدر دخل ..
مثلا كوافير آو تطبخ وتبيع آو مصممه فساتين آو آو .. بنخفف من البطاله والله ..

بتقولون فيه نوادي في السعوديه .. و آقول لكم مو متكامل بنفس فكرتي .. و هذي النوادي اللي موجوده ما راح توصل ل الأهداف اللي آنا آبي آوصل لها ..

هالمشروع راح يساعد في توظيف المرآه .. لآنه بيحتاج موظفات في الإداره بيحتاج موظفات آمن و تفتيش ..
و حتى الغرف اللي قلت آنه يباع فيها كل مستلزمات المرأه .. هذي الغرف بيجي بنات يستاجرونه ..
مثلا آنا عندي راس مال بسيط جدا .. بستآجر وحده من هالغرف تقريبا ب 500 ريال في الشهر و بحط فيها بضاعتي ..
ممكن شنط و اكسسوارات وآبيع .. راح آدخل فلوس مو شوي في الشهر .. يفكني من الآنتظار الطويل ل وزارة الخدمه المدنيه بأنه يوظفني ..

آمممم طبعا التسجيل في هذا النادي يكون شهري .. تقريبا 50 آو 100 في الشهر
تروح البنت ل إدارة النادي و تسجل و يعطونها بطاقة دخول ..
كل ما جات تدخل النادي يكون فيه تفتيش .. تعرض البطاقه آولا ثم تفتيش إذا معها جوال كاميرا آو آو ..
آي شي ممنوع ..

آيه فيه شغله نسيتها .. حتى الشيبان بيدعون لنا .. بيوصلون نقليات بنات ..
و بيستفيدون ماديآ ..


آما النقطه اللي ما عرفت لها في هالمشروع .. لمين آعرض الفكره ..؟؟

ل التجار و لا ل الحكومه..

إذا ل التجار .. ف راح يستفيدون والله ..
يعني كل وحده بتسجل بتدفع 50 ريال آو 100 ريال في الشهر و عاد آنت آحسب كم اللي بيسجلون ..
اللي بيستاجرون منك الغرف .. كل غرفه ب 500 ريال في الشهر و عاد آحسب ..

القاعه الكبيره تبع المحاضرات .. لو آستؤجرت ل الحفلات التخرج و غيره .. خلنا نقول 5000 ريال في الليله ..

وااااااااو آنت الربحان .. يالله تحرك ههههههههه
بالنسبه ل الدورات التربويه و النفسيه و و و ..
آنا آشوف المراكز اللي في منطقتي يتصلون على المراكز الكبيره اللي بالرياض و الشرقيه و يطلبون منهم يتعاونون معهم و يرسلون لهم مدرسات .. يعني الأمور إيزي إذا بغيتوا ..

آما إذا كان فكرتي تعرض ل الحكومه ..
ف صدقوني بتخففون من نسبة البطاله و مستحقين حافز ..
بدل ما يكون كل سنه عدد المسجلات تتعدى مئآآآآت الآلوف .. بينخفضون ..

نبي نطلع ..
نبي نقابل صديقاتنا إللي ما عاد شفناهم من تخرجنا ..
آبي آشوف مكان وسييييع وآركض أنا و صديقاتي نركض و نركض و نركض .. و ما يردنا إلا الجدار ..

نبي يومنا يكون فيه شي مفيد .. لي و لديني و لديرتي ..

فكرتي مو بس تعليييييييمي .. فكرتي ترفيهي بعد .. حدائق ساحات كوفي شوب بنات نتعرف عليهم نستانس و نستفيد ..

آبي هالنادي يصير البيت الثاني ل البنت السعوديه طالما آنو السواقه ممنوعه و الطلعه في الأماكن العامه مع صديقاتها ممنوعه ..




هل من مؤيد ؟؟

ميزانية المشروع ضخمة جدا

بس اقولك ادرسي موضوعك بشكل اكبر وقدمي ع هالقروض وربك يسهل

او احد يمولك من التجار

فكررة حلوة

فكره رووووووووووعه
وبالتوفيق لك

فكره جدااااارائعه وهادفه

الله يوفقك يارب,,قدمي على رياده أوبنك التسليف أوباب رزق جميل

الذي لاحظته من كلامك انك جالسه تعرضي الفكره بس
أعتقد ان هنا بالسعوديه كل شي معقد والنوادي الصحيه
عليها اشتراطات كثيره ودوخه ويعني التاجر العادي
صعب عليه يوجع راسه بكذا مشاريع

بس انا شفتها مطبقه بمركز الأمير سلمان بالرياض

يا بنتي انتي تتكلمي عن مشروع تكاليفه لا تقل عن 20 مليون !!!

بغض النظر عن الملايين ولكن عندنا البلديه وهيئة الامر بالمعروف من اجل الموافقه على مثل هذا المشروع يكون الواحد انفقعت مرارته .. ولكن بصراحه افضل ماعجبني بالموضوع هو تأهيل الفتيات للزواج .. ( اي والله )

انا ارى ان من يستطيع اخذ تصاريح لافتتاح بركه سباحه على مستوى راقي وتكون نسائيه فقط .. والله مو ذهب وبس الا الماس

آشكركم جميعآ على ردودكم الطيبه ..

آنا آعرض فكره فقط .. آنا شخصيتي مآسكه طريق و التجآره مآسكه الطريق المعآكس ..



آخوي الوآآلي ..
ويييييييين 20 مليون
هذآ اللي يبيني آفطس مكآني ..

حسستني آني آتكلم عن مدينه جآمعيه

لاا .. هو نآدي عآدي .. تكلفته مثل تكلفة آي نآدي ثآني ..


آللحين الإستراحات تبع الزوآجات .. كم تكلف آصحآبها ..!!
هذي مثلهآ ..

و فيه نوآدي في الريآض .. مستحيل آنها كلفت آكثر من مليون ..
خلونا نبالغ و نقول مليون و نصف ..
آذكر الغرف اللي كآنت للأجآر فيهآ .. كآنت كلها خشب .. يقآل يعني يقلدون بيوت الآجآنب ..


بس مآ فيهآ لا دورات تعليميه ولا شي ..
ما غير آشتري فشار و عصير و آروح آتمشى في حديقة النآدي ..

اهلا اختي
فكرة جميلة

ولكن المشكلة في التراخيص


اتمنى لك التوفيق

مشروعك حلو بس مثل ماقال الاخ الوايلي المشروع تكلفته ضخمه هذا نادي ياحلوة مو شي بسيط ومثل ماتقولين تبينه نادي متكامل يعني يبي له فلوووووس واااااجد

وبعدين الاسعار الي قلتي عنها اشوفها مرره قليله يعني الي بيغامر ويدفع يبي مردود مادي يعوض الي خسرة بس تقولين 50او100اشتراك ماتكفي برايي