المشاركة الأصلية كتبت بواسطة منقا دوا

مافيه مثل حاسة الشم .. ولعلمك يا اخوي انا سافرت حدود 14 مرة اندونيسيا طبعا تماشي ونكي منقا دوا على اسم سلسلة مولات هناك خخخخ .. وفي كل مرة اجيب معاي شنط تقليد درجة اولى وساعات نفس الشي وعود ودهن عود بكميات مسموح بها في المطار بالدحلسه .. لكن إللي عجزت افهمه كيف تفرق العود الزين من الشين بدون استخدام الخشم ههههههه .. شفت برامج وفيديوهات عن العود بالهبل .. وزن العود وتحطه بماي والبقبقه حقته إذا حطيته عالجمر و لون الدخان و و و إلخ .. لكن كلها ما نفعتني وقت الله الله وقت إللي أطلع بوكي علشان ادفع !! مانفعني إلا حاسة الشم بس .. أشم وأنثر الكيلو قدامي وأشوف القطع هل كلها مثل بعض واتوكل على الله وأشتري .. انواع بالهبل وانا كنت آخذ 3 انواع من اندونيسيا اغلاهم ب 4 مليون روبية يعني حول 1500 ريال تزيد شوي تنقص شوي حسب سعر صرف الدولار والريال هناك .. والنوعين الثانية ارخص بكثير .. وصدقني كلها كانت تعجب اهلي على كثرهم ماحد نقدها .. ابو 1500 يقولون للمناسبات والرخيصة لتبخير البيت .. وتعرفت على بياعين عود هناك بالهبل وتعمقت لين صرت اطلع من المدن وروح مناطق فقيرة العود عندهم ارخص بكثير .. كل التجار الكبار هناك مسيطرين عليهم الصينيين اولا ثم شركة العربية للعود .. ويعرفون اوقات جيتهم بإنتظام والعربية للعود تخم إللي قدامها بكميات مهولة حتى الشين تاخذه وتسوي له عمليات كيميائية وتخليه مقبول وله سعره وله ناسه .. دخلت مرة بيت تاجر عود بيبان بيته والدرايش ثقول لخزنة تجوري ويوم دخلت شفت طعوس من العود انواع واشكال .. سالت خويي الاندونيسي كم تقريبا مبلغ إللي في الببيت ذا قال ماتقل عن 20 مليون ريال ...!! وبيجي مندوب العربية يقشها بعد يومين .. هذا كله كوم ودهن العيد في الملحق كوم ثاني .. اخذت منه 10 تولات تجي غرشة المنيوم ب 500 دولار يعني بحدود 1850 وبعتها هنا على قرايبي التولة ب 700 هههههه يعني 7 آلاف .. وكل من جربه يطلبني طلابه اجيب منه دايم .. ومثله يبيعه ابو يمن ب 1200 وفوق لانه يحطه بغرشة قزاز يازعم انها فخمة وهي ب 50 ريال ويمدحه ويحلف زور وبهتان ان مكسبه فيه 100 ريال بس !!! انا لا اقلهم طلعت علي التولة بحدود 190 تبونها ب 700 ولا بخليه لي .. يشمونه وينقون فلوسهم سريع لانهم يعرفون سعره عند ابو يمن ...

والله يافيها خير تجارة العود ودهن العود لدرجة إني افكر استقيل من وظيفة مرموقة وافتح مؤسسة استيراد وتصدير علشان العب عالثقيل .. وراس مالها تستأجر محل في سوق وتاثيث بسيط ومبخرة تفوح عند بابه وهاتك يارزق ..