[align=center]السلام عليكم ورحمة الله وبركاته
أبي أقول لكم وش صار معاي أمس واليوم بمستشفى قوى الأمن بالرياض وبالتفصيل الممل
ياطويلين العمر أنا موعدي كان بتاريخ 28 / 10 / يعني أمس بديت الكشف الطبي
حضرت عندهم الساعة 6 حكم ولبقت السيارة بالمواقف وقعدت انتظر لين جت الساعه 7:30 تقريبا
وبدو ينادون بالأسماء, والله وما طلع اسمي من بين الأسماء, استغربت وكان معاي ناس من قطاعات ثانية, المهم انتظرت ربع ساعه قلت يمقن ينادون بالأسماء ولا فيه فايده, انتظرت شوي ألا هذا وكيل الرقيب من قطاع أمن المنشات, جاي يسحب رجوله, عرفت على طول انه مندوب القطاع, المهم رحت يم الرجال وكلمته, قال لي: وش اسمك ؟!!!
وكان معاه ورقه ماسكها بيده, قلت اسمي فلان بن فلان الفلاني !!
ويناظر للورقه شوي, ثم بعدين قال: عطني صورتين شخصية واكتب اسمك خلف الصورتين وعطني بطاقتك الشخصية وضف وجهك لا تجينا إلا الساعه 9:30
طبعا أمزح هو ماقال ضف وجهك, لكن الرجال كان يتكلم من طرف خشمه وكأنه يقول لي ضف وجهك لا تجينا غير الساعه 9: ونص !!
قلت له: يابن الحلال أنا موعدي الساعة 7 صباحا, قال انت توحي ولا ما توحي, قلت له: أوحي !!
قال اسمع الكلام ورح لا تجينا إلا 9 ونص, قلت والاثبات يبقى عندك , قال: إي نعم يبقى عندي ماني ماكله برجعه لك !!
قلت خير انشا الله
المهم عاد مالكم بالطويلة جيتهم على الموعد اللي قال لي الرجال الساعه 9 ونص بالضبط
ونادوا بأسمائنا ودخلت أنا, وكان العدد قليل جدا يمقن اللي معاي ما يتجاوزون 10 بالكثير من قطاع أمن المنشات !!
أول ما دخلنا عطونا ورقه مكتوب فيها أسئله تجيب عليه بعلامة ( صح ) سواء تحت كلمة نعم أو تحت كلمة لا !!
مثال على الأسئله ما يلي:
هل تعاني من أمراض وراثيه, هل زرت طبيبا نفسيا من قبل, هل أجريت عمليه جراحية, وهكذا, طبعا أنا كتبت فيها كلها لا !!
بعدين تنتظر سرى على الكراسي, ويدخلونكم غرفة ويقيسون الطول والوزن, وبعدين أشعه لظهر والبطن والصدر, وبعدين توكل على الله لبيت أهلك, وينبهون عليك بكرى تجي الساعه 7 حكم عند البوابة !!
المهم عاد من بكرى اللي هو اليوم الأحد الموافق 29/ 10 حضرت عندهم الساعة 6 و نص حكم عند البوابة, يوم جت الساعة 7 ونص, وهم ينادون بالأسماء ويطلع اسمي من بين الأسماء ويعطوني الورقة اللي أمس فيها كل المعلومات عني, وأناظر للأشعه ألا كاتبين فيها: أشعة ظهر بطن صدر سليم, ومختمين عليها وموقعين إني سليم ولله الحمد !!
بعدين يجلسونا على الكراسي, ويقول لنا العسكري كل واحد يطلع بطاقته الأحوال, وبعدين يفر علينا واحد واحد يقارن بين الصور, يشوف هل خشتك هي نفسها اللي بالصورة أو إنت واحد ثاني, طبعا هذا الإجراء منعا لتلاعب بالتحاليل الطبية بول ودم !!
المهم بعدين يدخلونا على غرفة ويعطونا علبة صغيرة نعبيها بول, وبعد ما نعبيها بول, ننتظر سرى ثاني مرة ويعطونا أرقام, وبعدين بالدور على حسب الأرقام ندخل ويسحبون من كل واحد عينة دم !!
وبعدين تضف وجهك لأهلك, وتجي بكرى الساعه 7 صباحا عند البوابة حتى تدخل المرحلة الأخيرة من الكشف الطبي وهي مرحلة العيادات, كشف الأسنان والنظر والجراحة ووووو إلخ , والمرحلة هذي بكرى إن شاء الله بسويها, ادعوا لي بالتوفيق, وصلى الله وسلم على نبينا محمد وعلى آله وصحبه وسلم, وغدا سنوافيكم بالمزيد من التفاصيل مراسلكم عبد الكريم سمارة تلفزيون المملكة العربية السعودية, مستشفى قوى الأمن الرياض [/align]

شباب فيه احد ارسلو رساله
بعد الكشف الطبي
انا ارسلو لي رساله بأعاده الفحص الطبي طبعا بعد ماخلصت كل شيء
هل الرساله معناتها فيني شيء لاقدر الله
علما ان كشفي بمكه ووقتها خلصناها بيوم واحد

لاء انشاء الله ماايطردونكك

وانششاء الله انكك اول المحظرين في الميدان < قل امين