المشاركة الأصلية كتبت بواسطة خريج ادارة صناعي

وعليكم السلام ورحمة الله اهلا فيك اخي الفاضل موظف الشركة
راح ارد عليك على شكل نقاط علشان ماتكون مشاركتي مثل ماتقول حضرتك انها لظلم الشركة او الاساءه لها بأي شكل من الاشكال

عن الدورات التدريبيه في اي شركة محترمه وقت المقابله الشخصيه يوضحون لك نوعية الدورات لو كانو يوفرون هالشيء ويوضحون لك مدة الدورة وكل شيء يخص الدورة بس في المقابلة اللي عندكم ماشفت الا رئيس تنفيذي يدخن على مكتب ويقول انتم تتوظفون عندي ماقال عندنا دورات واسلوب مميز
ما ادري مخبين الدورات والكلام عنها ليه ؟ مع ان وقت عرض العقد قال وقع اليوم وتعال بكرة داوم .. ايش الدورة اللي تنتهي بعد توقيع العقد ؟

عن خدمة حجاج بيوت الله اللي تتباهى فيها كنت تقدر تخدمهم وتتشرف بهالشيء بعيد عن التعاقد مع الشركة وراتبها .. كيف تتباهى بخدمة حجاج بيوت الله وانت تتقاضى راتب على هالشيء ؟ انت اجرك يكون مادي ومستوفى شهريا .. اما عن تشرفي بهالشيء الحمدلله ربي اعلم باللي اسويه والشركة ارسلت لهم رسالة من الجوال قلتلهم اعتذر عن توقيع العقد يعني ماوقعت وفصلت

استخدامك لكلمة استحقار الراتب علشان يكونون الاعضاء في صفك استخدام فشلت فيه انت وشركتك لأن توضيحي للراتب كان لتوضيح كلمة رواتب مغريه .. ما استحقرت الراتب بقد ماعظمتوه حضراتكم وخليتوه تحت بند المغري .. اذا 3900 مغري اجل ايش نقول عن ضعفه ؟

العمل المكتبي سبق وتشرفت واشتغلت في منظمات حكومية راقيه كان العمل المكتبي فيها اكبر من عرض قناة انترناشيونل جيوكرافيك وكوبين شاهي وكوب مويه ومناداة العامل علشان يصب القهوه لحضرة الرئيس التنفيذي .. اذا تشوف عملكم المكتبي صعب ومو سهل اجل انت منت مهيأ ولا 1% انك تشتغل في منظمات حكومية او خاصة راقيه لانك تستصعب تقليب قنوات التلفزيون وطلب الشاهي .. واكيد السعودي مايرضى يجي يشتغل سكرتير اذا كان الرئيس التنفيذي يطلب من السكرتير يطلب له كوب شاهي وكوب قهوه ودخان واللذي منو

عن اوقات العمل في الاجازة وانها اختياريه ما ادري اكذبك والا اكذب الرئيس التنفيذي ؟ لابد فيه واحد منكم ماصدق في هالنقطه لانه قال لو طلبناك وقت اجازتك نخليك تعوض في يوم ثاني يعني مافيه اوفر تايم ولا اي شيء .. تمنيت انك استفسرت من رئيسك قبل ماتندفع وترد بطريقة الدفاع عن الشركة والمحامي الالكتروني والاسلوب واحد بين انتم موظفين عندي في شركتي وبين تشتغلون بأجر وصلت فيكم الامور انكم تستعبدون الناس على هالراتب البسيط

عن الرئيس التنفيذي والتناقذ اللي حضرتك تحاول تثبته برضو تسرعت .. لان الواضح من المشاركة الاولى ان فيه تشديد وتخويف وتهديد من الرئيس التنفيذي وهذا يحسسك ان المنصب اللي انت مرشح له وزير السياحه مو مرشد سياحي وفي نفس الوقت يذلك براتبه اللي مايسوى على التشديد والتهديد اللي يقوله ..

عن تسجيلي في المنتدى شأن خاص فيني واعتقد انه واضح من المشاركة الاولى اني كتبت ردي للتوضيح والتعقيب على اعلانكم اللي ماصدقتو فيه ولا بنقطة وحده .. عكس حضرتك اللي شارك في المنتدى وتكفل وتحامل على نفسه علشان يظهر سيف الدفاع عن الشركة وعن موظفيها وزيادة تظليل الناس وتحميسهم للعمل مع الشركة

لاتعتذر عزيزي الاختلاف في الآراء لايفسد للود قضية .. بس تمنيتك بما انك تدعي حرصك على الشاب السعودي وتوظيفه تمنيتك تحرص على توضيح كافة الامور لهم بكل مصداقيه ومو عيب ان يكون فيه تعديل لأسلوبكم في الشركة وطريقة تعاملكم .. لان التعامل مطلوب قبل الراتب وقبل كل شيء