السلآم عليكم ورحمه الله
الشهر عليكم مبارك جميع ^_^

المهم انا راح ادخل بالموضوع دايركت عزيزاتي الموضوع الي راح اطرحه هنا لنتناقش فيه و ان شاء الله البعض يستفيد والبعض الاخر يعطينا حل لهالمشكله الي احنا فيها وخصوصا (النساء)

مافيه مجلس او بيت خالي من الحش والتنتيف من الورا كلنا نشوف ونسمع
اول كنت كذا لما اشوف قدامي احد يحش اكمل معه واحيانا توصل للتطنز والاستهزاء والضحك هالكلام قبل سنتين تقريبا وبعد مااخلص حش تجيني زي الضيقه واتحسف ع الي قلته

المهم انا مو جالسه اتفاخر بالي قاعده اسويه لاا انا الحمدلله حاولت امنع نفسي وامنع الي قدامي لان صار لي موقف اتمنى ماحد يصير له
مره من المرات كالعاده جمعة بنات ومشتغلين حش وتنتيف وضحك تخيلو ان البنت الي جالسين نحش فيها كانت تسمعنا لها ساعه واحنا ما جبنا خبرها
دخلت عليناا وياليتها قامت تهاوش او تتكلم كل الي قالته الله يسامحكم وطلعت طبعا ماقدر كيف اشرح لكم كيف كان موقفنا البعض تحسف والبعض قام يستمر حش وضحك ولا همه

انا من اول ماكنت راضيه عن الي قاعده اسويه ابد بس زي ماتقولون مع الخيل ي شقرا
عقب هالموقف اتخذت قرار بيني وبين نفسي اني مااتكلم عن اي احد او استهزء فيه او احكي من وراه
بنات احنا نصلي ونصوم ونعبد الله بس بالاخير كل الي نسويه والحسنات الي نجمعها بحياتنا تروح للشخص الي نحش فيه وهو جالس بمكانه وفوق هذا مو من اخلاق المسلم الغيبه
يابنات انا مافتحت الموضوع عبث الا لاني شايفه المجتمع الي احنا فيه اغلبيته كذا حش وتنتيف هذا غير التكلم باعراض المسلمين وحتى لو كان صدق

قال تعالى: { ولا يغتب بعضكم بعضاً أيحب أحدكم أن يأكل لحم أخيه ميتاً فكرهتموه واتقوا الله إن الله تواب رحيم}

الي ابيه منكم كل وحده عندها حل او طريقه بحيث انها تقدر تمنع هالشي بنفسها او بالناس الي حولها واتمنى الكل يشارك

جزاك الله خير صادقة احنا نستهون باامور عظيمة

فعلاً اختي هالموضوع منتشر بيننا احنا البنات اكثر
والحل إننا نأخذ عهد على انفسنا واللي حولنا اننا مانتكلم في احد وان وحده تكلمت البقية يذكرونها بالعهد
ولازم دووم نتذكر أن السخرية من الناس ترجع لصاحبها ولو بعد حين
والاهم من هذا العقوبة اللي تلحق من يأذي الناس بلسانه

الله يعطيك العافية على الموضوع الهادف اختي
ويشغل السنتنا بذكره لا بذكر خلقه

الحل اللي تحش يكوى طرف لسانها وتحداها بعده تحش

هههههع ههع كوي مره وحده . . o_O

جزاك الله خير

عن أبي هريرة رضي الله عنه أن رسول الله صلى الله عليه وسلم قال: (أتدرون ما الغيبة ؟) قالوا: الله ورسوله أعلم. قال: (ذكرك أخاك بما يكره) قيل: أرأيت إن كان في أخي ما أقول؟ قال: (إن كان فيه ما تقول فقد اغتبته، وإن لم يكن فيه ما تقول فقد بهته). [رواه مسلم].

موضوع رائع
جزاك الله خير على التذكير.

مشكلة الغيبة أنها من حقوق الناس
وحقوق الناس ما يكفي فيها التوبة فقط
لازم الواحد يتحلل منهم ويطلب منهم السماح
فالواحد بدال ما يطارد الناس ويطلب منهم العفو،
يمسك لسانه ويكف اذاه عنهم ويريحهم ويريح نفسه.

شكرا لك على الموضوع