16-08-2012, 01:05 PM
|
عضو متواصل
|
|
تاريخ التسجيل: Feb 2008
المشاركات: 50
معدل تقييم المستوى: 209248
|
|
اقتباس:
اللي عنده معلومات عن حفر الباطن لا يبخل علينا
|
الحفر وش تبي تعرف عن الحفر يا بلفيت وأنا اقولك !
عموماً الحفر ديرتن تهَول والله وكل ما به يجيب العافيه إن شاء الله !
ناسها عشرين وبسيطين مرة ، فيها السعودين وفيها البدون وإنت تبي تلقى الزين والشين " عاد إنت دورك تجَود بالطيب وتكنس على الخبيث بوقته " !
طبعاً هم يقولون لك بأن الحفر محافظة والحفر أنا ما أعتبرها محافظة خاصه من تالي لأنهم صاروا فعلاً يزبرقونها وتغيرت تغيرت الحفر مرة عن أول !
أول شوارعها يالله من فضلك ما تاصل المكان اللي إنت تبي تاصله إلا ومعفوستن تشخيصتك مع وجهك من شوارعهم اللي ماهي مزفلته ومردومة !
لكن الآن لا الطرق تغيرت وتسهلت وصار ما أزين منها والله لكنك ولو لقيت أحد يعكس الطريق هناك ترى عادي سو نفسك ما شفت وكمل طريقك 
أحلى شي بالحفر وتبي تلقى كلامي لو دوامك الساعه 6 ونص قم ست وربع تراك تبي تاصل بوقتك ! ــ يعني وقتك هناك مختصر مرة والأماكن قريبه ماهو بمثل هينا قم من قبل الست بساعه أو أكثر وزين إن وصلت بوقتك بعد !
اسوء ما بالحفر ولا أقول اسوء استغفر الله لكن ترى جو الحفر يروَع بالصيف ، بالصيف جو الحفر حار مرة وبالشتاء بعد باااااااااااااااارد مرة ! ـ ربيع مامن ربيع وهم يقوولون لك الحفر ديرة ربيع " يمكن عشان الفقع تلقاه حوله سموها ديرة ربيع وإلا الربيع مفارقه هي وعجاجه " !
طبعاً نجي لأهم شي المستشفيات والأماكن الترفيهيه بالنسبة للأماكن الترفيهيه ماهناش أماكن ترفيهيه هذه هي الحقيقة فيه ملاهي مدري مدينة ملاهي ( ملعوب على اللي يشوفه ويقوله مدينة العاب ) لأنه مهي بمدينة العاب لكنها تمشَي الحال إذا لك وغدان يا مشاري وبما أنك رجل فالإستراحات هناك تراه على قفا من يشيل ! .. ما تمشي 3 أمتار إلا وتبي تلقى استراحه عن يمينك أو يسارك وإن ما لقيته عن يمين ويسار تراك تبي تلقاه بوجهك يا دافع البلا !
فيه ممشى بعد حول الإمارة حلو إذاك من راعين المشي !
الأسواق كانت تنعد على الأصابع من أول بالحفر لكني رحت لها قبل فترة ولقيت تجار الحفر والله مدهرين بهالأسواق تقول ما عندهم إلا يبنون ويوسعون عسى رازقهم يرزقنا !!
بالنسبة للأسواق الغذائية بعد تراه على قفا من يشيل هناك " تبي تلقى سوق العزيزية عندهم كربون بنده عندنا " واسواقهم تقريباً حلوة !
مطاعمهم هناك واجد بعد بس حلوياتهم لذيذة جداً وأتعب وأنا اقول جداً والله ولابي أحلف إن حلوياتهم ألذ الحلويات بالمملكة بحسب ما دجت ورأيت !
المستفيات فيه مستفى خالد العام وفيه بعد كذا مستوصف أهلي " أذكر عندهم مستوصف نور خان " مرة حلوة خدمتهم ونظافتهم جيدة ( شوف عيني ما أحد قالي ترى ) !
فنادقها بعد كويسة وفيها شقق مفروشه إذاك ما تبي تسكن بشكل دائم ببيت تأجره وترى حتى ايجاراتهم بالنسبة للأجارات هينا أرخص بوووواجد !
الغلى مامن غلا بالحفر إن شاء الله وكل شي تبي تلقاه سهل وموفر قدامك بحول الله عسى ربي ييسر لكم ويرجعكم لدياركم سالمين غانمين
أكتب قولي هذا وأنا مابي إلا دعوة بظهر الغيب يسهل الله أموري المتعسره " فلا تحرم أختك الضعيَفة منها عسى نصيبك من الدعوة بالمثل والسلام "
|
العرض المتطور
