السلام عليكم ،،، مساء الخير

اول شي مبارك عليكم العشر الاواخر وكل عام وانتم بخير .. راح ادخل في الموضوع زي مانتم شايفين العنوان انا سلمكم الله مالي متخرج من الجامعة الا سنة والحمدلله عمري توني في أول المشوار ورزقني الله بوظيفة بشهادة الجامعة صح انها مو قد الطموحات لكن العوض ولا القطيعة مقارنة بوظيفتي القديمة بصراحة انا اشتغلت بشركة ايام الجامعة واستمريت فيها لين ما اتخرجت وما اخفيكم وقتها كان ضغوطات علي مابين البيت ومابين الدراسة ومابين العمل ولكن الحمدلله راحت بخيرها وشرها لكن بكل أمانة الوظيفة ماجمعت منها ولا ريال ولاطلعت فيها شي استفدت منه سواءً مشروع او سيارة جديدة أو اي شي كان كلها مصاريف لموتري ولا للبيت ولا مصاريفي الخاصة فيني خصوصاً وقتها ماكنت استلم مكافأة من الجامعة عموماً هذا موب عذر لي اكثر شي تحسفت عليه اني ماجمعت ولا فكرت في موضوع الجمع أو اساهم بفلوسي والشيء الوحيد اللي استفدته من وظيفتي فعلاً وحسيتها افادتني اني لمن انتقلت للشركة الجديدة بشهادة الجامعة فادتني وظيفتي القديمة من ناحية الخبرة وتسجيلي في التأمينات الإجتماعية ، عموماً مابي اطول عليكم ... انا الآن راح اتكلم عن وضعي .. الحمدلله انا مرتاح الآن بعد العمل الجديد وجاء في بالي مشاريع كثيرة لكن ما اخفيكم يدور في بالي مشروع اللموزين لأكثر من سبب :- ا


السبب الأول :اني شخص احب الحركة يعني ما احب جلسة البيت ودائم كل وقتي اكون طالع فقلت هذي النقطة راح تحببني في شغلة اللموزين .




السبب الثاني : موتري قديم اللي معي الحين وذبحني بصراحة خرابات مايمر شهر الا وحاطله ميزانية وما اخفيكم الحين بعد هالموضوع متجه للصناعية اصلح الموتر فأنا من غير ان شاء الله شاري شاري موتر جديد فقلت هذي فرصة اضرب عصفورين بحجر واحد طالما اني شاري شاري اشتري سيارة جديدة تنطبق عليها مواصفات اللموزين واقلب السيارة لموزين ناسبني الشغل ارتحت خير وبركة ماناسبني ماخسرت شيء احول الموتر عادي وبكذا ماخسرت شيء لاني في الأساس انا احتاج اموتر اروح واجي عليه جديد .



السبب الثالث : الحمد الله بيتنا فيه 4 رجال وانا خامسهم فكرت ان اللموزين ماراح يوقف بحاول قد ماقدر ان أخواني يشتغلون عليه مع اني انا اصغرهم بس هم مبدئياً زي اللي يقولون انت جرب وحنا نشوف وانا عندي احساس اني لو اشتغلت وشافوني اترزق من وراه راح يدعموني وممكن نتعمق ونتطور شوي في فكرة المشاوير الخاصة لكن هذي تحتاج وقت .




السبب الرابع : عندي رغبة قوية في البزنس يعني انا اليوم لو اشتغلت على لموزين ما احب يكون عندي مصدر دخل واحد لا ممكن انوع ممكن ابيع واشتري في النت اطلب بضاعات المقصد يكون عندي اكثر من دخل لكن الاساس هو اللموزين هو اللي راح اطور فيه واعطيه كل اهتماماتي وافكاري فيه




السبب الخامس : ميزة اللموزين انت وشغلك يعني اعتقد بنظري يوميتك ماتقل عن 30 ريال هذا اذا افترضنا ان الشخص اشتغل 3 ساعات وممكن هالـ 3 ساعات تكون رايحلك مشوار وتاخذ معك واحد على الطريق حجة وحاج ، يعني يوميته مفتوحة المقصد انك ماراح تيأس او تمل مو مثل بعض المحلات والمشاريع اللي تعتمد ع ان الزبون هو اللي يجيك فاللموزين انت بنفسك تبحث عن الزبون واكثر ماكثر الله الأسواق والشوارع في الرياض .




بصراحة انا وظيفتي مرتاح فيها وماراح اترك وظيفتي لكن حاب يكون عندي دخل إضافي مع ان الشركة القديمة اللي كنت اشتغل فيها طالبتني مسائي اشتغل معهم بس ماعندي رغبة للوظيفة لانها تربطني وعندي رغبة قوية في البزنس الخاص .

انا الآن قدمت على قرض في البنك وراح يعطوني 100 الف ،، 70 الف هذي راح تكون في مساهمة والحمدللة سبق وشاركت في مساهمات بمبالغ بسيطه وربحت من وراها اللهم لك الحمد .. و30ألف هذي مخصصها للسيارة وبازود عليها من عندي 20 ألف واشتري سيارة جديدة فيها .

والى الآن الكورة في ملعبي مابعد اتخذت قرار للقرض

مايحتاج أوصيكم على الردود بس انا وضحت لكم كل صغيرة وكبيرة عن ظروفي ووضعي اللي عنده أي شيء يسدحه ويقوله لايرده شي سواء من إيجابيات من سلبيات مشروع ثاني أي شي يخطر في بالك قله لاتخلي شي بالخاطر

وان شاء الله ان زبطت الأمور باعطي كل واحد دورة على الموتر الجديد << يقاله اسلوب اغراء


يعطيكم العافية ،،، اشوفكم على خير

الله يوفقك مشروع مربح بما انك طموح وببدايه عمرك

انا اعؤف واحد معرفه شخصيه راتبه بحدود7000 يقول والله مقد صرفت من الراتب ريال واحد من اهل الرياض هوو ويعمل معي بجده والان هو يبدا مشاوير من بعد المغرب إلى الساعه3الفجر يقول الحمد لله دخله من 300 إلى 350 يعني دخل فوق الممتاز

هاه عاد لاوصيك باخذ فره على الحاجه ههههههههه انا اول مارديت

الله يوفقك ويرزقك من حيث لاتحتسب

تحياتي اخوك /نايف السالمي

الفكره ممتازه ويعتمد ربحها على جهدك يعني تجتهد يزيد ربحك

وانصحك تآخذ سيآره هوندآي لانها رخيصه وحقت كرف شوف التكآسي كلها هونداي

مع المجتمع شوي متحسس من هالشغله للسعودي يعني تحصلهم يفضلون الاجنبي

لكن بنصحك نصيحه اذا شفت شغلك من ولابد مع السعوديين اقلب على الاجانب

انا اعرف ناس شغاله زي كذا تروح الشركات قبل مايخلص الدوام بنص ساعه وتحمل من هالاجانب وتوديهم الاسواق المطاعم ومطلعين ورق من هالشغله

وبعد لا فكرت تخرج من منطقتك يعني بتروح مشوار برا مر النقل وشيلك كم واحد للمنطقه اللي بتروحلها يعني تضرب عصفورين بحجر واحد

وبعد دامك شغال في شركه وانت طالع من الدوام خملك كم عامل من الشركه وصلهم على دربك وتطلع لك كم قرش

والله يوفقك ونشوفك اكبر تاجر مواصلات في المملكه

[align=right]

عسى الله يوفقك يالغالي،
ومن ناحية هالشغله أنا اشتغل فيها .. واذا انك بتشتغل وتضغط على نفسك أنا ما اضمن مثل ماتقول يوميتك 30 ريال .. اضمن لك 150 ريال اقل شيء، بس ب اجتهـادك
بس حط في بالك ماهو كل يوم تبي تشتغل بيجيك ايام بتلاقي التكسي واقف من أشغال من متطلبات بيت أشياء زي كذا يعني بيمر على التكسي أيام واقف أو ماتكده بس على العموم انت منت خسران شي
شاري شاري .. أشتر وجرب الشغله يمكن تفتح لك أبواب رزق ثانيــه
أنا من ناحيتي شغلت التكسي فتحت لي ابواب .. كانت تجيني وظايف من ناس يركبون معي بس أنا اشتغل التكسي في المطـار مسجله في المطار واشتغل فيه هنـاك
وعسى الله يوفقك أن شاء الله ويكتب لك ألخير بجميع دروبك [/align]

الله يوفقك , ترا الليموزين يدخل لك مصروفك اليومي اللي تحتاجه باذن الله يعني منها تستفيد فلوس ومنها تدل اماكن جديدة في منطقتك وتحوس الشوارع شارع شارع ههههههه اللله يوفقك

الله يرزقك من واسع فضله

اخي الكريم ماذا تقصد بالمساهمات ؟