السلام عليكم
انا من سكان المحافظه من سبع سنوات بحكم عمل الوالد .. واعرف الديره زين

واي استفسار او معلومه تبغاها عزيزي المعين اطرحها هنا وراح اجاوبك بعون الله
مبدئيا الدوادمي راح تعجبك كثير كثير

محافظه عسل بماتعنيه الكلمه كل شي تبغاه موجود
الاجارات رخيصه او متوسطه
الاحياء اكثرها حلوه وطابع العيش هنا مليئ بالود والكرم والعادات الزينه .. والكلام يشمل الاغلبيه العظمى وليس الكل الكل

تبي ملاعب وراعي كوره . ملاعب مزروعه تصل ثمانيه وانديه رياضيه خاصه ومراكز لياقه وتخفيف وزن
تبي اسواق حلوه ومحلات راقيه موجود واولها زاد واليحيى ..
تبي مطاعم فيه هرفي وفيه كودو وفيه الدجاج المتميز
وفيه مطاعم اخرى اذا انت راعي كبسات موب صاحيه .. اولها الوشم ثم الرياض ثم فروج ثم الرياش ثم ثم ثم لين تدوخ
ولها مطار موجود رحلات نهايه وبدايه الاسبوع ورحله بنص الاسبوع

تبي مراكز خدمه طلابيه ومكتبات موجود وكثير .. تبي احياء حلوه كثير واولها .. سيرتي ثم حي الاماره الجديد ثم حي الدخل الجديد بالقرب من الدفاع المدني بالدخل ثم حي ثليبه وهي منطقه استراحات تبعد اثنين او ثلاثه كيلو عن الدوادمي وراحه وناسه وبراد ودكه وفله

تبي سكن شباب وغرف شف فوق بنك البلاد كثير من شباب كليات الدوادمي هناك وكذالك العماير اللي جنب البلاد
وفيه الرومانسيه للشقق المفروشه وريدا .. عماير كبار وشقق يوميه اذا انت جاي تسوي مقابله ولا بتريح يومين
وفيه العايضي هذا مرتب جدا .. اذا بتاخذ يوم ولا يومين لا تتعداه
وترى الاسعار للاجار اليوم ممتاز من ميه الى ميتين غرفه وصاله وحمام الله يكرمك
وقبل كذا كله .. اللي بيسدح الرقم هنا ولا خاص يبشر من يستقبله ويبشر بالسعد كله

وبالنسبه ل اهلها بين العتبان وحظر الدوادمي
وطبعا العتبان يشكلون ثمانين بالميه .. وسبعه انعام فيهم..
ماشفت منهم الا كل خير وجود .*

وعلى فكره
ترى اداره التعليم منسوبيها جدا متعاونيين ويحبون المساعده والفزعه
واولهم مدير الاداره عبدالرحمن الرومي .. وثانيهم جمال العتيبي مدير الاشراف وكذالك صالح الحمادي العتيبي ا
وكذالك لسبيعي نسيت اسمه
ولا انسى مدير مدرستي سابقا الاستاذ عبدالله عبيد العصيمي مشرف الان كذالك
وقائمه طويله غالبيتها كوادر ممتازه ومتعاونه جدا جدا ويحبون يكونون عون لك اذا جديد وتبحث عن اي مساعده

على فكره للي يبغى وصف ادارة التعليم
وانت داخخل الدوادمي من جهة الشرق جاي من الرياض
تتعدى. اربع اشارات واول دوار تلقى الاداره قدامه جنب الدوار يسار

طيب واحد اقل شي
علشان احس ان الموضوع استفاد منه احد وجهته الوازره للدوادمي

شكل الدوادمي ما احد تعين فيها

يعطيك الف الف عافيه اخوي ماقصرت بيض الله وجهك بس عندي سؤال محيرني يالطيب وودي تجاوبني. اذا تقدر تجيب لي المسافه والوقت مابين الجمش وحديجه وتقبل. الله صيامك وقيامك

وشرايك في اهل حديجه بصفه
عامه

الله يوفقك ياخوي فهد ويرحم من جابك من جد ما أدري أيش أقول الله يبيض وجهك , من جد نحتاج لهذا التجمع المبارك الله يوفقنا وياكم لكل خير , أتمنى يا أخوي فهد تقول لنا اش الأمكان الأفضل ع أساس ندخل الرغبات في موقع الإدارة لأني ما أعرف عن الدوادمي أي شئ لأني من سكان الطائف أتمنى تساعدنا ولك الأجر والثناء
( أتمنى الرغبات تكون الأقرب للطائف ) .

بالنسبه للاخ ميه فل

راح اتاكد من المسافه
رغم انها كلها حول بعض وحديجه هجره صغيره
لكن بحيب لك المسافه بالسانتي هههه شوي بسدح لك الرد

بالنسبه للاخ الله ييسرها
اسمع واخخذ الراي مني

حط الدوادمي نفسها والله اضمن لك ترتاح وتستانس اذا تجي بالدوادمي
ثم الشعراء. حوالي 28كيلو.. ممتازه جدا وفله ودوام ع راحتك
ثم بعدها حط مصده 10كيلو وهجره صغيره رغم ان ثانويتها لك عليها .. طلابها فيهم شقاوه
والحزيميه خمسه كيلو بس كثار الطلاب ويمكن ماترتاح فيها
ثم الحفيره وعرجاء كل وحده 30 تقريبا ولا اعلم عن مدارسها كيف
اما الجوش نصيحتي لك ابعد .. المدارس والديار والهجر ماتساعد
واهلها طيبين بس بعيده ومدارس وامكانيات دمار
البعد تقريبا سبعين اقل شي
وميه ابعد شي

الله يعطيك العافية أخوي فهد , طيب اش رأيك في البجادية