15-08-2012, 05:17 PM
|
عضو متواصل
|
|
تاريخ التسجيل: Feb 2008
المشاركات: 50
معدل تقييم المستوى: 209248
|
|
|
عااااااااااااااااااجل ! اريــد حل
السلام عليكم ورحمة الله وبركاته
أما بعد فإنه ( وأول شي ) أبقوله : عسى الله يرزق الكل منكم باللي في صدره ، يدريبه الرب أنا مدري به !
ثاني شي : أنا بنت ما أعرف أكتب مواضيع وشوفي على قدي والصدق الصدق تعبت من كثر ما أفر بذا المنتدى وأفررررر وأفرررر أدور لي جواب ولا لقيت فإن قصَرت بالعرض إسمحولي ، وإن ما بان لكم شي (لا هنتوا ) اسألوني !!
ثالث شي : ترى الود ودي الآن لو أكسر هالجهاز وأروح لمنهو عنده حاجتي ما أكتب لكم يعني ( وأنا مدري هل من ورى كلامي لكم فود أو لا ) ! ـ ( لكن هو منهو اللي عنده حاجتي ) بعد الله مانا عارفه بهالوقت اللي ما ينعرف به شي ( يا صرت منت ولد كبكبلي وقلي !! ) لذلك أنا قررت وبعد ما شاورت نفسي واجــد إني أكتب لكم اللي بكتبه الحين خاصه وإن اللي حولي يا سألتهم مثلي ما يعلمون ويدرون !
المووووهيم ولأجل ما تطول السالفه !
أنا تخصصي بـِالوكسا لريوس ( كيمياء ) تقديري كان ممتاز إلا شوي يعني بالعربي جيد جداً مرتفع ، تربوي ! .. طبعاً تنيت التعيين وتنيت التعيين ( لكن عمي أصمخ ما درابي ! ) الزبده ما حصلي التعيين فقلت يا بنت كملي دراستس أغدي اللي ما جا اليوم يجي باتسر !
وكملت بالعلوم الاجتماعيه الماستر لأني مابي أكمل بالكيمياء والطموح أني أكمل بعد دكتوراة بالعلوم الاجتماعيه ( قدام إن شاء الله ) !! ـ المهم الحمد لله حصلت على الماستر وبدرجة ارضت الله وارضتني ، طبعاً شهادتي ذي ما تهيَا إني اتوظف من وراه أبد ( ومن الأخير ) ما زادتني هالشهاده شيَن يُذكر لأنو وفي الأول والأخير : ما معي واسطة والحمد لله !! ـ ولأن اللي ما معوه واسطة وعشان ما ينهبل بهالديرة المفروض أنوه يدرس ما يوووووقف ويدرررس ويدررررس لين الله يدبره قررت إني أجرب حظي وأقدم ع الإبتعاث ووللأسف إني انقبلت مبدئي والمفروض إني الحين اكمل أوراقي عشان مرحلة التدقيق لكني وأصدقكم القول أنا ما ودي أطلع برا بل ودي أقضب أرضي وأكمل دراستي بعدين ليش !
لأن أهلي بعوزي بصراحه ( وكلمتن تستحي منها بدها !!! ) ظروفي الحين ما تواتي إني أكمل الدراسة أبد ، صحيح أنا ( تسبدي تفرك ) على البعثه لكن الشكوى لله : يا لد الله العبد وهو ما بينه وبين حاجته إلا الشي البسيط ماله إلا الصبر عسى آخرة صبره خير وسهالات !!
المعلوووووم يا أهل هالمنتدى وأخص منكم بالذكر السلف الصالح ( أهل جدارة ) الناصحين !!
أنا أبي أعرف وش اللي يرفع عدد نقاطي ! ـ ومتى أنا بكون مستحقة للوظيفه بحسب علمكم بعد علم الله لأني والله خايفه اغدي مثل معايد القريتيني ـ لا فزت في بعثه ولا لحقتني جداره 
أخيراً
أنا أتمنى من اللي قرى ما كتبت أعلاه أن ( يدعيلي ) في نفسه لعل منكم من يحبه الله ولهُ من الله ما ليس لي ، ثم إن كان عنده من نصيحه أن يتفضل وينصحني بها لعل أختكم الغافله (me) أن تنتفع بما تكتبونه آمين ، وإن ما كان عنده من نصيحه فلا ينقد / تنقد علي وبس ، هذا واستغفر الله لي ولكم والسلام !
التعديل الأخير تم بواسطة мℓєєτ ; 16-08-2012 الساعة 01:13 AM
|
العرض العادي
