بسم الله الرحمن الرحيم
السلام عليكم ورحمة الله وبركاته

حبيت اصارحكم بشي في نفسي ويعلم الله ودي افضفض لكم وماارتاح الا في هالمنتدى لانه له فضل علي بعد الله سبحانه بتوظيفي واتمنى من الله انه يرزق كل عاطل وعاطله بوظيفه ويفرج هم كل مسلم يارب .

عن نفسي افكر في الزاوج ودي اتزوج واستر نفسي واستقر , مو مجرد كلام بكتبه وبس , عندي عزيمه وإراده تقدمت مرتين لأقربائي وماحصل نصيب وللأسف اكتشفت انه في شخص من أقربائي ورى هالموضوع يخرب اي شي لمصلحته يبغاني اتقدم لبناته بأي طريقه تدرون ليش طمعان فيني على باله اني عايش وتحتي كنز شايفيني فوووووق مطلعني السما دايم يسأل كم راتبك , في اي مرتبه , سيارتك كاش ولا اقساط , عندك اقساط بالبنك ,,,, اسأله بصراحه مالها داعي
وبيني وبينكم حالي ميسور الوالد متوفي وتحملة المسئوليه من بعده الله يرحمه عايشين انا والوالده واخوي الصغير والحمدلله .
قلت للوالده مابي من الأقارب شوفيلي من برا العائله قالت ابشر , لقينا بنات الحلال كثير ومالين البيوت لكن باقي عندنا العنصريه الزائده عن حدها اللي هي :
السمر اللي مثلي "والمشكله ان لوني اسمر فاتح" مايتزوجون من الناس اللي بشرتهم بيضا
والسبب مجهول وان وافقو غلو المهر الين يوصل 80 الف "هذا شخص اعرفه دفع مهر 80 الف"
حنا مافتكينا من العقار وغلا هالأسعار تجينا كمان المهور مولعه , فكرت اتزوج اجنبيه مقيمه في السعوديه ومن الشروط "اذا موظف حكومي يكون الراتب 3000 وادنى" يوم شفت هالشرط هونت.
الوالده الله يحفظها ويطول بعمرها اتصلت على بيت عندهم بنات قالت لها شوفي لي يوم اجي ازوركم فيه ومن هالكلام المهم ردت الأم الله يحيك بس انتظر بنتي المتزوجه تجي من الرياض مدري من وين واذا جات احدد لك موعد تجين فيه قالت الوالده طيب , أصلا الحرمه جاها خبر مدري من وين ماشاء الله عليها ان الوالده جايتهم زياره عشان تشوف بناتها واذا لقت البنت اللي يطيب خاطرها بتحدد معها موعد نجي نخطب رسمي ماشاء الله عليهم يالحريم الأخبار توصلهم من بدري, المهم وانتظرنا وانتظرنا ومالقينا رد غير ام البنت تتصل كل بعد يوم ولدك وين موظف , حكومي ولا شركه , وش معاه شهاده , في أي مرتبه , قلت للوالده لاتردين عليها ولا شي ماعاد باقي يقولو وانتي جايه جيبي معاك كشف حساب لولدك حق 6 أشهر .

( قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره.

بس الناس الحين ماعاد تبي لا دين ولا أخلاق يبغون يعرفون كم راتبك موظف حكومي ولا شركه الأخ اسمر ولا أبيض .
ما أقول غير حسبي الله ونعم الوكيل .
تدرون ياأخوان الحمدلله بعد فضل من الله قدرت اجمع مبلغ سيط حق الزواج , بس يوم شفت حال هالناس في غلا المهور والتعقيدات والعادات اللي مالها داعي اهون على سالفة الزواج , واحيانا اقول ابي اتزوج وافرح الوالده وانبسط والله احس في داخلي صراع بيني وبين نفسي .

آآآسف يا اخواني واخواتي وكل من زار هالصفحه على إطاله هالموضوع
ومابي منكم شي غير الدعاء من قلب صادق تكفون .

قال رَسُول اللَّهِ صَلَّى اللَّهُ عَلَيهِ وَسَلَّم :
" دعوة المرء المسلم لأخيه بظهر الغيب مستجابة
عند رأسه ملَك موَكّل
كلما دعا لأخيه بخير قال الملَك الموكل به: آمين
ولك بمثل " رواه مُسلِم

ولكم تحياتي