السلام عليكم ورحمة الله وبركاته ,,

هذا الموضوع لي ولكم ولكل الاشخاص المقدمين والمقبلين على الدورة وبـ أشرحلكم بالتفصيل الممل وش صار معاي ومع المتقدمين اللي كانوا معانا في يوم الاثنين بتاريخ 09-10-1433 هـ

طبعآ انا من سكان جدة ووصلت الرياض الساعة 5 الفجر صباح الاثنين بالضبط ووقفت السيارة وانتظرت نص ساعة ونزلت سئلت اللي في البوابة قالي الطابور في البوابة الخلفية وعلى طول شغلت السيارة ورحت للبوابة الخلفية الا واشوف طابور طويل صافين سرا ,, نزلت وصفيت معاهم ومعاي ملفي

اول ما وصلت كان فيه رئيس رقباء (شخص جدآ حبوب ) شنب قصير اسمه محمد الشامخي
ينادي الاسماء ويحضر الموجودين ,, واللي ينادي اسمه يرفع صوته عالي ويقول ( حااااضر ) ويصف بطابور الموجودين وكان يقول لازم ياشباب بطاقة الاحوال الشخصية الجديدة او الرخصة الجديدة

المهم من الساعة 5 ونص وهم يحضرون لين الساعة 6 و10 دقايق تقريبا ثم جاء الرائد وقال خلاص خليهم يدخلون
وصارو يدخلونا من البوابة : وهنا في البوابة كان فيه تفتيش ممنوع تدخل بدخان وولاعة بس مفتاحك وجوالك
العدد التقريبي للي كانوا موجودين مابين الـ90 الى 140

ولمن دخلنا ركبنا الباص عشان يودونا للقاعة وحشرونا مع بعض في الباص 55 شخص كاننا رايحين لحرب
وجلسوا يمزحون معانا في الباص ويعطونا نصايح ووصلونا لين النادي ونزلنا

دخلونا بمصلى ورتبونا على شكل صفوف وبدو يسحبونا صف صف لفوق داخل القاعة

ولمن تدخل القاعة ترتب ملفك واوراقك وتدخل على لجنة تدقيق الاوراق اللي هم افراد
التدقيق على البطاقة الجديدة ضرورية وان تاريخ ميلادك مو اكبر من 1404 شهر 7 يوم 1

لان فيه واحد طردوه قدامنا مواليد 1403 ,, بالحرف الواحد قاله الرائد خذ ملفك وتوكل على الله

ولازم معك نموذج طلب التقديم الورقتين ضرورية اللي هي في الرابطين هاذي

هذا الاول باسم : اعلان نتائج القبول المبدئي

http://www.moi.gov.sa/wps/portal/spe...yQkdWQjYzMDAw/


وهذا الرابط كمان الاهم باسم : استعلام وطباعة طلبات التوظيف

http://www.moi.gov.sa/wps/portal/spe...PMFVFNzQyMDAw/

تاخذهم معاك

واذا دققوا على اوراقك وكل شي تمام تدخل بنفس الصالة وتنتظر بصراحة لطعونا لطعة وسخة من 6 ونص تقريبا الى 8 حوالي ساعة وشوي لان اللجنة الطبية تاخرت علينا

المهم وزعوا علينا موية وجاء العقيد (شخص محترم ) وقال اللي شعره طويل اطردوه < وهومدري يستهبل ولالا
وكان في واحد شعره خفيف مو محلق وقاله ليه ماحلقت , قاله الطالب شعري ما بيعوق الجهاز لاني طويل
قاله كم طولك ؟ قاله 176
قاله اوقف اشوف ,, ووقف وتاكد
الزبدة : لاتحطوا نفسكم بموقفه وتعرضون نفسكم للخطر ممكن تنطردون لاتفه سبب تشوفونه

المهم جآت اللجنة ودخلوا يرتبون نفسهم وصارو يسحبوننا صف صف وقالوا كل واحد يرفع سرواله لين ركبته
ودخلونا على دكتور العظام اول شي يشيك على اليد والساق والارجل وبعدها تروح لطابور الميزان
يقيسون طولك ووزنك بنفس الجهاز فيه 3 اجهزه كلهم متشددين وما يتساهلون ولاحد يترجاهم لان ماينفع معهم

صارتلي سالفة هنا لمن جاء دوري وانا طالع الميزان وشاف وزني سليم قال ارفع راسك ونزل رجولك عشان ياخذ الطول وانا طولي بصراحة 171 كم مره بقيسه بس يوم طلعت بالجهاز طلعله طولي 168.8 وكتبها بالورقة وقال روح للدكتور

رحت للدكتور وكان في واحد قدامي وقلت في نفسي بقله تكفى مشيها لكن الحمدلله حظي حلو واسمعه يقول للي قدامي انت غير لائق لان طولك 169.7

وقلبتها بنفسي على طول قلت ماني مترجيه بدخل بعينه مدام النظام كذا
قال انت فلان : قلت ايه
قال انت غير لائق لان طولك 168.8 : قلتله لا ياحبيبي طولي 171 وانا امس قايس بالمستشفى اكيد فيه غلط
قال ياخوي هذا جهاز عالمي : قلتله ابد انا متاكد من طولي
قال اجل بروح اقيسك بنفسي :: قلتله ياليت
ويجي معاي للدكتور اللي قاسني : وقال وخر بقيس الرجال
وقال يالله اطلع الحين : والله واطلع بالجهاز وقال هذا طولك الطبيعي ؟
حسيت بالموضوع فيه شي قلتله لا وارفع نفسي بالقوة واشد ظهري بدون صدري عشان لاينتبه علي واحاول ارفع برجولي شوي وادعي يارب

شوي اسمع يقول ايه كذا بان طولك الحين صرت 170 بالضبط والله واحس بشهقة بنفسي من الفرحة وقلت الحمدلله عديت فيها

وقال روح وغير الورقة عشان فيها غلط ورحت مع الجندي يعبيلي ورقة من جديد وارجع للدكتور يوقع عليها وقال انت لائق قلت الحمدلله قال روح ورى اجلس في طابور المقبولين عشان تختبر نظر

وجلسنا ورى يدخلونا بالدور على حق النظر واختبرنا نظر بصراحة يدققون ومتشددين عليهم
لكن لمن تدخل القاعة وتشيك على العظام وانت راجع لطابور الميزان اقنص اللوحة وحاول تحفظ حقت النظر

المهم خلك ذيب واحفظها بنفسك لانهم مايرحمون ,, كتب درجتي بالورقة وقال روح للظابط

ورحتله وقع على الورقة وقال موعدك السبت الجاي ان شاء الله المقابلة الشخصية وسلم ملفك للافراد اللي في الطاولة اللي برى وخذ كرت مراجعة

ورحتله وعطيته ملفي : فك الورقة حقت البيانات من الملف وحطها بالطاولة وقال اكتب رقمك وتخصصك
كتبتها واعطيته الورقة وانا واقف مثل السبيكه انتظر
قلتله وبعدين ؟ قال خلاص توكل على الله
قلتله ليه ؟ ومتى المقابلة < وانا استهبل بس ابي اعرف ليه مابيعطيني الكرت الاخضر حقق المراجعة

قال ياخوووي انت غير لائق :: يالله توكل على الله
نشفت بمكاني وقلتله ليه طيب ؟ وش السبب وانا مجتاز كل شي
الا والرائد اللي جنبه قال وش فيه ؟ قاله غير لائق ويبي يجي المقابلة الشخصيه
قاله الرائد هات الورقة اشوف : اعطاه ورقتي وشافها الرائد وقال للفرد
هذا لائق كيف تقول مو لائق قال معليش تلخبطت
والله وانا اطير فيه قلتله كيف تلخبطت وانت وقفت دمي تقول تلخبطت
قال معليش يابن الحلال

استغفر الله بس المهم يخلونك تعض الارض وانت ناشف واخذت الكرت الحمدلله والمقابلة يوم السبت الساعة 5 ونص الفجر

وبكذا انا انتهيت من هالقصة اللي اتمنى تكون تفديكم جميعآ ودعواتكم لي ولاخواني بالتوفيق


ملاحظات :
* الحضور كلهم كانوا بملابس رياضية وبعضهم مخالفين جو بجزمه وانتم بكرامه
وخلوهم يفسخونها

*واللي لابس كاب فسخوه وزعقوا عليه

* واللي يهايط بياكل تبن << لازم تحترم نفسك وتمشيهم مسايسة

* انا بصراحة بطاقتي ماهي جديدة وكانو بيطردوني بس رخصتي جديدة وقلتلهم والله اني مقدم على الجديدة وللحين انتظرها وانا صادق
قالوا لازم تجيبها السبت

* بصراحة ناس كثير انطردو بسبب الطول والوزن والنظر
بس اللي نحيف اعتقد اعطوهم مهلة للاسبوع الجاي
وياشباب اللي نحيف يحاول يكثر من اكل الدهنيات مثل زبدة الفول السوداني والشوكلاته بانواعها
وادفس من النعمة قبل لا تروحلهم كل 5 موزات اقل شي واقدحها بلتر حليب وكثر موية وروحلهم

لان فيه ناس , الله لا يبلانا مثل المسواك ردوهم

* فيه ناس تاخرت عن الموعد وبالقوة دخلوهم بعد مشاورات كانوا بينطردون جو على الساعة 7 تقريبا وتوسطلهم الرئيس رقباء عند الرائد عشان يدخلون ولا تعرضون نفسكم لـ هالاشياءء

وبسلامتكم واعذروني لو نسيت شي ,, واي استفسار انا حاضر ان شاء الله

واللي مايدل العنوان انا كمان ان شاء الله حاضر << مع اني مو من سكان الرياض ولا ادل شي لكن الله يخلي عمو قوقل ايرث

بالتوفيق للجميع فالي وفالكم القبول ان شاء الله .. ودعواتكم

ماشاء عليك حطموك تحطيم ومع ذلك واصلت وأصريت على حقك

الله يوفقك ويجعلها من نصيبك

بس النظر أشرح لنا شوي وش صار فيه

آلحححمد الله سهلها لك الله .,
عقبل تحديد الدورهـ والتعين آن شاء الله

الله يوووووووووووووفقك ياصديقي اجل انت معي بالمقابله يوم السبت ان شاء الله

انا نفس نظامك بس موعدي اليوم وشهادتي تقنيه

ياشباب بقولكم طريقه بالنسبه للنظر انت لمى تجي عند المصري علشان يفحص عيونك قبل لايقولك اقعد ع الكرسي

حاول تحفظ الحروف خاصه الي تحت لانها صغيره حيل وبعيد بالموت تشوفها حاول تحفظها وتركز

وموفقين ياعيال

دعوواتكم يوم السبت

بالتوفيق

اخوي بالنسبة لسطر الاخير اذا ماجبت كم حرف منها يمشيها والعدسات لو البسها بيكشفوني

بيض الله وجيهكم ي الوحووووشش والله ماقصرتو قسسسم بالله
موعدي السبت وان شاء الله اعدي على خيير ياارب
الله يوفقكم يااااااارب
هاذي الاخبار والعلوم اللي طيب الخاطرر قسسم بالله
ارتحت قسسم بالله عقبال ماقول وش صار لي وعقبالنا بالقبول النهائي والتخرج من الدورةةة