صباح / مساء الخيرات للجميع ..

اصبحنا و اصبح الملك لله ..

شوو اخباركم يا حلوين ..

ربي يعلم اشكثر ارتحت الكم و حبيتكم كاخوان و اخوات لي لم تلدهم امي ..

بقولكم قصتي و ابي انصاف بالشرع بغض النظر عن العادات و التقاليد , لان العادات هي اللي سببت لي ازمه ..

مع ان الشرع حافظ لي كامل حريتي في التصرف بشؤووني الخاصه .. و انا كبيره ماشيه بالـ 25 سنه و الحمدالله عاقله و اعرف الصح من الغلط ..

انا من عائله تعتبر من ذوي الدخل المحدود و مستوانا بسيط جدا متوسط الحال و الحمدلله على كل حال , الحمدالله نعيش في بيت ملك بسييييييييط و اثاثه ابسط منه ..

مافي احد يحب ياخذ مال من احد على اساس انها صدقه او زكاه لكن اسمعووووني للاخر ..

مشكلتي هي " امــــــــــــــــــــــــــــــــــــــــــــــــ ـــــــــي " ..

رجاء لا تقولون عقوق لان محد قايم بامي غيري و لحد مفكر فيها غيري و انا ما امنّ و هذا واجب علي رضيت و الا ما رضيت ..

لكن اسمعوني للاخر ترى دمعتي على خدي ..

امي حبيبتي يا خلف عيني والله احبك بس ماني صغيره خلاص يمه تكفين خليني احس اني مسؤوله ابي اعيش مثل غيري من بنات عمري ..

امي يالغاليه ليش انتي كذا معي انا بالذات ؟

لا تفكرونن اني اقدر اصارح امي بمثل كذا لاني مقدر و اخاف ..

احاول افهمها بس مااااااش يمه ماش ..

زمان يوم كان ابوي حي الله يرحمه كانوا الناس يحسدوننا على عيشتنا و حياتنا رغم بساطة الراتب و رغم ان ابوي كان عليه دين 800 الف .. و رغم ذلك كان معيشنا ملووووووووووووك و ما نحتاج شي ..

كان بيتنا ما يخلا من الضيوف و العزايم و الذبايح .. كان يتصدق و يعطي و لا عمره قال لاحد تكفى ..

مات ابوي الله يرحمه و قبل يموت بسنه مرينا بظروف ماديه صعبه جدا ..

و حسبنا الله و نعم الوكيل على من كان السبب ..

امي صارت هي وكيلتنا .. تخيلوا يا ناس احنا مو محتااااااااااااجين والله لكنها تقبل الصدقات من الناس و مين هالناس ؟ جماعتنا و اقاربنا ! و تفهم الناس اننا محتاجين و محد منحرج غيري انا ..

والله والله والله اني كرهت الطلعات و العزايم و الجماعه و كل الناس كرهتهم من جد ..

امي ما تعرف تتصرف امي ماخذه الوكاله و نصيبي ينزل من راتب ابوي على حسابها مع نصيبها سوى ..

لمن اقولها ابي فلوسي تقب علي و اهلي يقبون معها < طبعا خواتي كلهم متزوجات و موظفات و اخواني نفس الشي .. !!

تشوف انه مو من حقي اخذ الفلوس .. راسي مليان مشاريع و افكار و امي تعيقني اما بسخريه او بصرخة منها تخليني انسى الموضوع من اساسه .. ادري ان امي قلبها حنيّن و لكن ..!

كل ما اقولها شي تدعي او تصرخ .. والله اني صابره صبر الجبال ..

عندي مشاريع ابي اسوي شي يفيدني ما طلبت فضل من احد ابي بس فلووسي من كثرها اصلا !!

تخيلوا قبل سنه طلعت سياره لاخوي و نص المبلغ من فلوسي مااخذت رايي حتى !

و اذا قلت ابي فلوس انزل السوق قالت ليش وش تبين بالسوق .. ماانزل السوق الا مره او مرتين بالسنه ! لولا اني ادرس و الا كان ما شميت ريحة السوق .. و اذا اعطتني تعطيني 500 و تقول اشتري بها كل اللي ناقصك !

و اخوي والله انها مرت عليها فتره تعطيه 500 كل اسبوع و هو لا شغله و لا مشغله ..

تحاسبني على الشنطه يوم اشتريها تحاسبني على المصروف ..

سوت عمليه قبل كم شهر محد وقف معاها غيري تنومت معاها و يوم طلعت من العمليه و فاقت والله انها تصرخ علي و تدعي قدام الناس ! ليش يمه وش سويت ؟!!

رجعنا البيت قمت فيها و كلن تعذر بشغله الا انا و هذا واجبي لكن ما يصير حتى كلمة شكر ما القى !

انا الحين مابي شي ابي بس اسوي لي مشروع بسيط بفلووسي موو من عند احد مو من طلبت احد مو بفضل احد غير ربي سبحانه ..

كل ما قلتلها شي تقول تخرجي و توظفي و سوي براتبك اللي تبين .. طيب انا الحين عندي راتب وو !! يمه تكفين ..

عمي الله رحمه مات بنفس الفتره اللي مات بها ابوي الله يرحمهم جميع و عنده بنت بنفس سني و اسستغفر الله فاشله توها تكمل الثنوي و انا دخلت الجامعه باصعب تخصص بس عشان ارضي ابوي بقبره و احقق امنيته مني .. لانه مات قبل اتخرج من الثنوي بكم شهر فقط !

و زوجة عمي اهي خالتي والله يوم اشوف بنت عمي اني اغبطها .. تخيلوا حالتهم نففففففس حالتنا و هي اللي تتصرف و تمشي كل شي على كيفها .. بطاقة الصراف بيدها تشتري اللي تبي و على بالكم من راتبها ؟

لا راتبها تحفظه و تصرف راتب امها ما تخلي لها شي ..

..

ختاما عندي ملاحظتين ابيكم تدونونها :

1 / تدرون بعد ما مات ابوي الله يرحمه .. عمري وقتها 17 .. واحد من اقاربنا الله لا يوفقه استغفر الله .. اقترح على امي انها تملكني على اي احد كذا بس عشان اطلع من الكرت العايله لان النظام في السعوديه ان اللي يموت و ما في بطاقته غير زوجته يرجع لها راتبه كامل ..

اما ان كان في اشخاص بالكرت فيتقلص الراتب و يتقسم الباقي عليهم ..

ففكرة هذا الشخص الحقير انهم يملكون لي لاي شخص الين اطلع من البطاقه بعدين يطلقني و بس عشان الراتب و انا ما دريت بالسالفه الا قريب !! يعني لولا رحمة ربي و لطفه كان انا الحين ؟؟!! الله اعلم .

2 / امي تعاملني عادي مع شوية صراخ و دعاء بس يوم تشوف احد من اهلي تقلب علي بشكل مو طبيعي .. تبين لهم انها مظلومه و اني جالسه و هي تشتغل بالبيت و بس تدعي و تصارخ و تطلع فيني عيوب مدري من وين ..

المشكله انها دايم تقول لي اسرار على اخواني و تناقشني باوضاعهم و احفظ السر بس اذا شافتهم ! ما كنها تعرفني ؟

اختي ماادري شو اقول لك
بس الله يعينك ويصبرك
اكثرري من ا لاستغفار ونصيحة لك لاتشتكي لغير الله

وربــي ما ادري وش اقوول لكـ ..
لكن الله يعينك ويعين الجميع ..

حبيبتي ابنتي قراءت موضوعك واحزنني جدا شلت همك
وتذكرت نفسي واولادي وسالت نفسي مئة مرة عن تصرفاتي معهم راجعت كل شي
اولا واخيرا انت بنعمة كبيرة من الله لان الله من محبته لك يختبرك فاانت ببلاء واختبار وبماذا بااعظم امر بر الوالدين فااصبري وجاهدي وتحملي وسترين الفرج والراحة من الله على صبرك
يوجد ناس ابتلاهم الله باابنائهم فصبروا وباازواجهم فصبروا وانت بلائك ليس شديد فاامك الحمد لله تحبك وواضح هذا من استشارتك انت ومن اخبارك انت بلاسرار
ولكن عندما تترك المراءة وحيدة تربي ابناء تفكر بلمستقبل بدخل مادي محدود تتخبط احيانا وامك يعينها بذلك بعض اقربائك ممن يشيروا عليها باافكار غريبة ومنها تزويجك من اجل الراتب
يمكن ان امك واضعة احلامها كلها بااخاك لذلك هي تعطيه لترضي احساسها انه رب الاسرة الان وهو المسؤؤل وهو قبطان السفينة وهي تخاف عليها ان تغرق اذا غضب القبطان فترضيه
حاولي توفري قليل من المال اللي تحصلي عليه اضغطي نفسك واجمعي ثم ابداي مشروعك وببرك لها ربنا سيساعدك ويبارك لك فيها
واضح ان ظروف امك جعلتها عصبية مشاكلها انستها جانب الحنان فااصبح تفكيرها توفير الماديات فقط يمكن تفكر بدين الوالد رحمه الله او بتزويجكم او او او
يمكن انها تحاول ان تثير شفقة الناس عليك وعليها بلقسوة عليك امامهم فتظهر بمظهر الشديدة حتى يرحموك
جهل 000 حسن نية هي لاتقصد اعذريها
دائما راي واحد بااي مشكلة الحل سورة البقرة 000 سورة البقرة اقرائيها بلبيت 000 على ماء واسقي منه امك يقول الرسول صلى الله عليه وسلم اخذها بركة وعندما تحل البركة ينعم البيت بكل شي بلمال والاستقرار والراحة وتهدء الانفس
واهنيك ابنتي على صبرك ارجوك واصلي لاتضعفي فاانا ام وبنفس ظروف امك واتفهم تفكيرها وعصبيتها وتصرفاتها اسال الله ان يثبتنا

الله يحفظك وييسرامرك انتي والوالده ان شاءالله ربي يكرمك ويعوضك وانا مع كلام اختي متريشه وفقرانه

هلابكم جميع والله يسعدكم
متريشه اسعدك الله و كلامك مريح بس ترا ابوي يوم مات ماعليه و لا ريال دين سدد هالدين يوم كان حي و مع كذا ما قصر علينا

انا ماا عندي دخل غير راتب ابوي و ترا انا اصغر وحده بالعايلو كلهم كبار و موظفين الا انا حتي المكافاه مقطوعه عني ترا حنا ما علينا ديون الحين اصلا

و اصلا ابوي يوم مات كلنا كبار و كل اهلي مستقلين بحياتهم

[align=center]الصبر مفتاح الفرج

اصبري

ترى كل شخص لديه من المشاكل الأسرية

او بالأصح التعامل الأسري

يعني انا مثلاً

لدي اخوات لا يحترموني ولا يقدورني

حتى وحدة من اخواتي انا اكبر منها 10 سنوات

ومع ذلك لا تقدير ولا احترام

مع اني انا طيب معاهم

حتى مره من المرات جبت لها هدية ذهب

وماحصلنا غير عدم الأحترام والأمبالاة

بس مالنا غير الصبر وأحتساب الأجر

يعني ايش يسوي الواحد

في الأول والأخير هذولا ناسك وأهلك

ونتمنى ان نكون ممن وصفهم الله سبحان وتعالى بأنهم اصحاب الحظ العظيم

وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ

[/align]

أختي في الله
حاولي انك تتغاضين وتتسهلين امورك
وتفاءلي واصبري
الدنيا دار ابتلاء
ي رب يفرج همي وهمك وهموم المسلمين
الدعاء والاستغفار سلاح
دعواتك

صعب مرة اعطيك اقتراح او حل سواء بالمواجه او غيرة
لسبب انها امك وبكرة اذ صار لها شي بتبكين دم مالك الا الصبر والدعاء والاستغفار والاحتساب سوي خير وارميه في البحر واثبتي نفسك تخرجي وتوظفي ولاتبخلين عليها وعيشي حياتك ربي يسعدك ويفرج همك وهمي وكل من قال امين