اتجــاه البوصلة
علموني ياجماعه .. جيت أبسأل واستشير
........................ مبتــدا والـراي منكـم .. يعتبـر عنـدي خبر
ماكتبت الشعر والله لجل اباقف بالاخير
...................... يااحضر بالصف الاول ياعسانــي ماحضـر
ماترجيت المدايح من كبير ومن صغـير
.................. ويش ابي بمدحٍ يجيني من ورى كتابـة شعــر
ماهو اكبر هم عندي لجل احدد له مصير
.................. ينتشر والا عسى انــه طــول عمره ماانتشـر
وماكتبته لجل ابغوي ريم واغريبه عبير
................. مـاورى طـرد العـذارى .. مجـد قـوم ولافخــر
ماشهر صيت المهلهل قولة انه كان زير
................ لين مات كليب واعلن حــرب ثــاره واشتهـــر
ولاكتبته لجل اخاوي شيخ واشحذ من امير
............... ينهــدر دمــي وامـوت .. ودم وجهــي ماانهــدر
نمدح اللي يتسحق المدح مانرجي نظير
..................... أو بمامعنى الحديث بـلا ضــرار ولاضـرر
لو يجور الوقت فينا .. مانفكر نستجير
..................... شيمةٍ منـا .. وفينا طبــع .. طبعــاً تعتبـــر
مصدر العز / اتجاه البوصله / طيب الفقير
.............. طيبة القلــب / اتســاع الصــدر / مـالٍ ماانذخــر
عزة النفس / احترام الذات / تقديرالقصير
................ خفة الروح / اختصار الهـرج / مجمـل ماذكـر
تعني انا غير طبعا لازم اكتب شي غير
.................... شـــي ماجابــه مظفــر لا ولا أحمــد مطـــر
يصعب الموقف ويسهل في نظرعين الكبير
......................جابو الــدر الثميـن وجبـت فـي كفـي بحــر
كان ماني عن رياض العز وربوعي سفير
.................. جعل شعري للذهـاب .. بلا إيـاب مـن السفـر
وكان ماني في سفارة دار ابومتعب جدير
............... جعلني ماقوم واقف ، من على الكرسي الحمـر
وكان ماني للخليج لسان باليوم العسير
.................. جعـل مالـي يــوم أسنــد لا حــزام .. ولاظهـــر
الوطن مجلس تعاون به قوافلنا تسير
........................ والحقـود يمـوت غل وتنفطــر كبــده فطــر
السعودي مع هل البحرين لاصاح النذير
................... والاماراتـي عمانــي .. والكويتــي مــع قطــر
إيه ياكثر القوافي .. لوبسريها كـــثير
................... مــار ابفهقهــا .. واجيكــم بالكــلام المختـصر
ياأولي الألباب ياهل العرف يالجمع الغفير
....................... ارشدونــي جعــل ربـــي .. مايوريكـم كــدر
علموني كيف ابحيا واشهق بليا زفير
................. علموني كيف أبطمـر سطــر واكتب فــي سطــر
هو يصير الكل يامر .. ؟ علموني هو يصير ؟
..................... أو يصير ان شيخ ربعه .. ياجماعه .. ينومر ؟
هو يصير الطير يكفخ بس يكفخ مايطير
..................... أو يصير ان كل طيـرٍ بالسمــا يلفــح صقـــر
هو يصير ان كل منهو قال راي يقول خير
................ أو يصير ان كل مهــدي يكــون مهــدي منتظــر
هو يصير الفيل يلعب باتجاهات الوزير
.................. أو يصير الشاه يمشي خطوتيـن ابــلا خطـــر
علموني كيف ياكل قلعتي جندي خفير
................... ولعبة الشطرنج تقهر .. من لعبهـا يابشــر
علموني قبل ماصل لآخر الشطر الأخير
.................. ضاميٍ .. والراي منكم .. ياهل الحكمه مطـر
علموني عن خطايه لجل اعاود واستخير
................... واشرحولي كيف مخطي لجل أدنق واعتذر
لشـاعر/خلف المشعان
21-04-2008, 04:43 AM
العرض الشجري
