السلام عليكم ورحمه الله وبركاته

انا بنت جامعيه انتساب اخر سنه ليا تخصص اداره عامه
عندي وقت فراغ كبير وقلت استغلو وكمان عشان ابني مستقبلي من بدري حتى من قبل ماتخرج عشان بعدها ممكن اترقى بشهادتي
او ع الاقل يكون عندي خبره عن العمل وكذا


و قبل كم يوم كتبت موضوع في قسم الاستفسارات عن وظايف المصانع ووالبائعات

وكنت محتاره ايش اتوظف < من كثر الوظايف بس معروف في المصانع مليان وظايف بالهبل

وكنت اسمع رواتب عاليه ب 3000 وفوق مقارنه بالشغل يقولو سهل

استشرت واستخرت

واليوم الصباح رحت لهم

اول شي رحت لوزين طبعا كلو حريم في حريم مافي ولا رجال
طلعت الدور الثاني ودخلت غرفه وجات اللي تسوي القهوه والشاهي <لاحظو
ادتني ورقه قالت عبيها الورقه عباره عن اختبار نفسي زي اللي في النت تحب اللون الاخضر ولا الاحمر تحلم بكوابيس ولا احلام سعيده كيف تجلس كيف تمشي
واقدر اشتغل في ازعاج ولا لا احب العمل التعاوني ولا لا وكذا
وكمان كان في جزء منها اعبي فيه بياناتي اسمي ورقم الهويه وايش ابغى وظيفه
في خيار الوظيفه احترت ايش احط لاني ماقابلت احد(ولا كنت اعرف ايش الوظايف المتوفره)
وكان قدامي في مكتب رحت للي قاعده عليه شكلها مشرفه وسألتها عن الوظايف
قالت خط انتاج قلت لها طيب ابغى مشرفه او اداريه قالتلي لا لازم تكوني بالكاريوس وانجليزي ممتاز لان حتتعاملي مع اجانب مايعرفو عربي وتوكلت على الله وكتبت خط انتاج
الراتب 1600 تقريبا الدوام 6 ونص ساعات , ونص ساعه بريك
اخذت الورقه مني وقالت نتصل عليك


وبعدها رحت لمصنع الجمجوم
دخلت على المشرفه
طبعا هيه شهادتها ثانوي ولسى تكمل جامعه
زيي زيها قلتلها انا طيب كمان ابغى مشرفه قالت لا مانبغى حاليا
قلتلها طيب لو اشتغل خط انتاج مؤقت ولما تتوفر اداريه او مشرفه ممكن تحطيني فيها
قالت لا ماقدر
مع انهم حيفتحو مصنع جديد بعد شهر على حسب كلامها بس برضو مارضيت
وقالتلي اذا مو محتاجتها كثير انصحك ماتشتغلي فيها وبكل الطرق تحاول تكرهني في الوظيفه
وقالتلي فين حتطبقي قلت هنا قالت ياسلام كلنا حنطبق هنا لصحبتها بطريقه < كذا
هههههههه
بصراحه تضايقت من اسلوبها وكأنها ماتبغاني اكون موجوده عشان ماجي مكانها يوما ما
بس كلو حياخذ رزقو
والشغل 10 ساعات مع مواصلات اذا تبغي
الراتب 2750 اذا تبغي مواصلات ينخصم 300
دوام يوم الخميس من 7 الى 1 الظهر


بعدو رحت محمود سعيد حق العطورات

مارضي الامن يدخلني لان التقديم عند الرجال
اخذ اوراقي ووصلها لشؤون الموظفين بنفسو وقالي خط انتاج وحيتصلو عليك
وبقيه التفاصيل مايعرفها


بعدو رحت مصنع البسكوت ماحصلت المديره لانها طلعت للمصنع الثاني
لكن المشرفه قالت حاخذك جوله على المصنع عشان تشوفي كيف الشغل لحد ماتجي المديره
المصنع في كذا رجال كل واحد واقف عند الاله اللي هو مسؤول عنها
الرجال جنسيتهم اجانب هنود او باكستانيين وكذا
المصنع معدوم مكسر حر مزعج وكان في فرن لازم تشتغلي عليه بس طبعا مو من اول مره لا شويه شويه لحد ماتدربي
والمصنع مافيه ولا حسنه وحده الله يعين البنات والله يوفقهم
دوامهم اعتقد 8 ساعات الراتب مافتكر في شفتين تختاري ياصباح يامساء نسيت التفاصيل لانو ماعجبني ماهتميت



بعدو رحت لمصنع محمود سعيد حق القزاز








البنات يشتغلو في زي الحوش لكن متغطي من فوق ومرميه كراتين كثير
وقزاز كثير موجود وقاعدين يعبو في الكراتين
وفي هنود وبنقاله كمان اعتقد يعبو المنظر جدا متعب ليه كذا واحنا في السعوديه
المفروض هذولا البنات ينحطو فوق الراس ينحطو في مكان كويس والله تقطع قلبي وزعلت وحزنت ان في بلدنا زي كذا
دخلت عند المديره بس انا ماعجبني الوضع وقلت اشوف وارجعلكم اول ثلاث شهور 1700 تقريبا المهم تحت 2000 وبعد الثلاث شهور 3000 اتوقع بعدها يطردونا ههههه


بعدها رحت مصنع البيك

دخلت عند المديره وقالتلي في جوله يوم الربوع تعالي الساعه 7 وتخرجي 1 الظهر تشوفي لو عجبك قدمي اوراقك وحنقبلك لو ماعجبك بكيفك
سألتني ايش شهادتي وقالتلي ايش سويتي بعد الثانوي قلتلها قاعده اكمل في الجامعه
وكمان قالتلي اديني رقمك واسمك واديتها
الوظيفه شرحتها ليا :وظيفتين يا اني اختار تنظيف الربيان وتقشيرو وتقطيعو من الى
يا اختار اشيك على الدجاج المسحب فيلو عظم ولا لا <طبعا اول ماجا في بالي الريحه بس ماسألت


الوظيفه خط انتاج مهما كانت شهادتك < هيه قالتلي كذا وتترقي ب كفاءتك واخلاصك للعمل
واخلاقك وتعاملك
وكانت ذوق عكس المشرفات اللي قبل استغفرالله كأني حاخذ راتبهم ولا وظيفتهم والله تعاملهم غريب ونظراتهم اغرب وكل وحده تقولي انصحك لاتتوظفي فيها





ملاحظاتي من ناحيه العاملات ..
والله حرام حرام حرام بنات شباب سعوديات يشتغلو في هذي الوظايف دخلت مصانع اشكال وانواع واطلع بسرعه ماقدر اتحمل المنظر كأنها احواش والاحواش اكشخ وانظف وافضل وارتب
ماقولكم انا ابغى مكتب فارهه وابغى وابغى وابغى لا والله لو ابغى هذي الاشياء ماكنت دورت في مصانع بس المفروض المكان انساني شويه مالقيت كلمه تعبر باكثر من كذا خاصه مصنع البسكويت ومصنع الزجاج محمود سعيد اتوقع هذا خارج خارطه المصانع
المشرفات تعاملهم سيء



ويوم الربوع اقولكم تجربتي بإذن الله .. في البيك

ننتظر على احر من الجمر وتجربتك رائعه انتي اروع لانك نقلتيها لنا اتمنى اسوي زيك واشوف مصانع ا رياض

بنت نجمه تسلمي وقومي وروحي لهم من الصباح لانك ماحتخلصي الا الظهر
وبالتوفيق