ولد القصادي الله يجزاك خير

حبيت اعرف كم عدد المقبولين من تخصص علوم طبيه تقنية مختبرات


والتخصصات الصحيه وأكيد بيكون تعيينهم في المستشفى ولا في احتمال يكون تعينهم في مكان ماله علاقة بالمستشفى !


مشكوووووور

ولد القصادي الله يبيض وجهك وماقصرت

ولد القصادي يعطيك العافية ماقصرت بسألك عن تخصص علوم سياسية كم عدد الطلاب اللي قبلوهم في الدورة وفي اي قطاعات عينو

حيى الله الشباب

اقتباس:

المشاركة الأصلية كتبت بواسطة عطالة ليمتد يا خوي حبيت اسالك عن الهندسة عموما والهندسة الميكانيكا كم عدد القبول تقريبا .... والقطاعات بعد التخرج

ما عندي علم بالرقم بصراحة
لكن مثل ما ذكرت لكم .. الهندسة اكثر تخصص علمي بعد تخصص الحاسب
كثييير المهندسين في دورة 42 .. ماشاء الله
اتوقع انهم اكثر من 30 طالب

بالنسبة ل قطاعاتهم فـ من كل شيء ياخذون منهم
لكني في دورتي اكثر من اخذ منهم هو حرس الحدود و الدفاع المدني و يمكن الامن العام من بعدهم
البقية متوزعين بالتساوي تقريبا على بقية القطاعات ..
بالتوفيق يا بطل

اقتباس:

المشاركة الأصلية كتبت بواسطة الوجه البشوش ولد القصادي الله يجزاك خير حبيت اعرف كم عدد المقبولين من تخصص علوم طبيه تقنية مختبرات والتخصصات الصحيه وأكيد بيكون تعيينهم في المستشفى ولا في احتمال يكون تعينهم في مكان ماله علاقة بالمستشفى ! مشكوووووور

بعض الأسئلة اللي اقرأها ارجع لأخوياي من نفس تخصص اللي سُئلت فيه
بعض التخصصات العلمية و خصوصا الصحية .. هذول ما يقعدون غالبا معنا في الكتايب "السكن"
الكلية تستفيد منهم في المرافق الصحية مثل عيادة الطلاب و مركز الأمير محمد بن نايف
فأغلب وقتهم يكونون خارج السكن الا في الحصص العسكرية و التمام المسائي
فـ انا اسف ما اقدر افيدك بالعدد ..

لكن بالنسبة للتعيين .. ما اذكر نهائياً انه فيه طبيب او ضابط تخصصه صحي
ولا كان تعيينه في غير مجاله

بعض القطاعات عندها دورات تأهيلية لجميع الضباط .. يمكن يشارك معهم
لكن مع انتهاءها يتم تعيينه في الادارة الصحية اللي تخدم قطاعه

بالتوفيق لك

اقتباس:

المشاركة الأصلية كتبت بواسطة النقيب بودي ولد القصادي يعطيك العافية ماقصرت بسألك عن تخصص علوم سياسية كم عدد الطلاب اللي قبلوهم في الدورة وفي اي قطاعات عينو

قليل .. ما ادري بالضبط
لكن قليل جداً اللي معي من تخصص العلوم السياسية

بالنسبة لـ قطاعاتهم .. اتوقع انها محصورة ما بين المباحث و حرس الحدود
كل اللي اعرفهم من تخصص العلوم السياسية من هالقطاعين و حرس الحدود أكثر من المباحث ..

** شباب كلمة بسيطة بس اقولها لكم


لاحظت ان اكثر سؤال انسألت فيه هو كم عدد المقبولين في اي تخصص
مهما كان العدد المطلوب من كل تخصص .. تفاءل دائماً بـأنك من فئة المقبولين

يعني والله يا شباب و الشي هذا انا شهدته
زميلي من تخصصي قدم على الكلية الامنية و في نفس الوقت على مدينة التدريب بالأمن العام
طبعاً ما كان حاط اي امل بالكلية بحكم معدله .. كان جداً غير متفاءل
فـ يقول ابغى اي وظيفة و اتزوج .. الرجال مشت اجراءاته و يمين يسار إلى أن قبل بشكل نهائي وتعين بالمباحث ..

شخص ثاني من دورتي كان في دورة افراد الجوازات و فجأة قُبل للكلية .. سحب اوراقه من هناك و إلتحق بالكلية ..

انا تم رفض قبولي بدورة الجامعيين بـ وزارة الدفاع
ولا قدمت على الحرس بسبب قوة واسطاته .. الكلية أفضل من ناحية فرصة القبول
و قطاعات الداخلية افضل في كل شيء من الدفاع و الحرس الوطني
راتب+تعيين+راحة .. كل شيء

انتم فقط تفاءلوا و اعملوا بالأسباب
اللي عنده مشاكل بالأسنان يضبطها من الحين .. مشاكل بالعين .. وزنه مرتفع و غيره
يروح محطة الفحص و يسوي تشييك كامل على الجسم .. هذا أهم شيء
لأن ممكن تكون فرصتك اكبر من غيرك بكثير بس مشكلة في الاسنان او الوزن .. هذا تعطل شيء كل و ينظرون للي بعدك حتى لو كان معدله اقل منك بكثير ..

* يمكن ما استطيع الرد عليكم بإستمرار
لأن موعد تحضيري بعد صلاة العصر .. لكن اذا قدرت راح اجاوب باللي اقدر عليه
بالتوفيق للجميع

ولا تنسوني من دعائكم ..
اخوكم محمد

السلام عليكم ورحمة الله وبركاته

مســــــــــــــاء الخير

ياشباب الأمنية الأبطال نصيحة لاتسؤلوا عن كم عدد المقبولين في الكلية الأمنية من تخصصاتكم في الدورات السابقة لأن كل دورة يختلف العدد عن الدورات الأخرى

ثانياً تفائلوا بالخير وأبذلوا قصارى جهدكم للقبول في الكلية الأمنية والتوفيق من الله فلربما عدد مطلوب قليل من تخصصك مثلا 10 فقط فرصة قبولك ضئيلة وتقبل معهم أو ربما مطلوب عدد كثير من تخصصك مثلاً 150 وفرصة قبولك كبيرة ولكن لم تقـــــــــــبل (( لا سمح الله ))

الخلاصة (( القبول في الكلية الأمنية أرزاق من الله إذا كاتبها الله لك بتاخذه سواء كان العدد المطلوب من تخصصك قليل أو كثير وإذا لم يكتبها الله لك لن تقبل حتى لو كان يطلبون من تخصصك 1000 متقدم ))