السلام عليكم
انا إن شاء الله بتوظف قريب في قطاع خاص
براتب 3000 ريال وبريك يوم واحد


ما ادري الان اللي لي والي علي

سمعت ان صندوق الموارد البشريه يدعم بنصف الراتب

وفلوس التامينات كيف استرجعها ؟

والي عنده معلومات اكثر يفيدني مشكوين،،،

مالك ولا عليك راتبك 3000 هذا مقسم قسمين قسم راتب أساسي وقسم بدل سكن والمجموع 3000

بالنسبة للموارد البشرية تدعم بنصف الراتب أذاكانت شركتك موقعه اتفاقية دعم مع الموارد البشرية

وش تبي بدعم صندوق الموارد البشرية (الصندوق الأسود ) لو دعمك مرة مايدعمك مرة ثانية مدى الحياة

يعني أجله يمكن تلقاء شركة حلوة مدعومة من الموارد البشرية


بالنسبة لتأمينات يخصمون 9%من راتبك الي هو 3000 يعني يصفى لك 2730 ويخصمو ن منك 270

هاذي 270 لو مكملة سنة عند الشركة تقدر تستلمها من التأمينات لاكن لو كملت سنة ماتستلمة

الا أ ذا وصل عمرك 60 ولا صار عندك رصيد 240 شهر يعني 20 سنة يصرف لك راتب تقاعدي


والأفضل أنك ماتستلم شي من التأمينات حتى لو مكلمت سنة تخليها رصيد عندهم


وفقك الله

لاتنسانا من دعائك أي أستفسار أنا حاضر لاكن تراي والله أنساء والأفضل على الخاص

اعتقد بان وراء الوظائف ماقصر شرح كل شي

أول شي بالتوفيق وانا اخوك وفالك الوظيفه ومن نصيبك ان شاء الله


ثاني شي في وظيفتك لازم يكون بينك وبينهم عقد نصيحتي لك لاتتوظف عندهم بدون عقد ومثلكم عارف بعض الشركات اللي توظف بدون عقد


ثالث شي تأكد من اللي مكتوب في العقد ان عدد ساعات العمل تكون 8 ساعات هذا اللي معروف ان 8 ساعات هذا الدوام الرسمي للموظف لكن اذا لقيت الدوام في العقد أكثر من 8 ساعات مثلاً يكون 10 ساعات أو 12 ساعه طالبهم بصرف أوفر تايم على الساعات الزايده عن 8 ساعات وهذا شي من حقك

وتأكد من أجرة الاوفر تايم كم مكتوبه في العقد

رابع شي خذ نسخه من العقد اللي بينك وبينهم لانه تكون نسخه للموظف ونسخه لصاحب العمل وهذا نظام العمل وشي من حقك تاخذ نسخه من العقد ماعليك منهم هذا شي من حقك لازم نسخه من العقد معك عشان لاسمح الله صار شي او شي مستقبلاً تقدر تضمن حقك عند مكتب العمل بموجب العقد اللي معك

أتمنى اني اكون افدتك اخوي وفالك التوفيق والنجاح ان شاء الله
موفق خير اخوي

ادعوا لي الله يرزقني بالذريه الصالحه

سوبر فايرز ربي يرزقك الذريه الصالحه عاجلا غير اجلا انا تو ظفت بشركه لي عشر ايام مكتوب فالعقد ثمان ساعات ولقيت اني ادوام من 9/30 صباحا الى 6/30 مساء وطول اليوم واقفه وممنوع اجلس الا فبريك الصلاه طبعا حاسبين وقت الصلاه ومع وقت الصلاه يكون تسع ساعات طيب العشر ساعات ذي وش سالفتها فهمني ربي يرزقك

هلا اختي انتي دوامك 8 ساعات وفقا لنظام مكتب العمل السعودي


زايد عندك ساعه فقط اللي هي ساعة بريك للصلاة والغداء وفقك الله اختي هذا اللي فهمته


دوامك ماهو عشر ساعات فقط 8 ساعات عمل وساعه بريك


موفقه خير ان شاء الله

الدوام الرسمي 8 ساعات

لكن نصيحه لكل شخص ان ياخذ صوره من العقد ويخليها عنده يمكن تحتاجها لسمح الله وهذا شي من حقك ومن شروط العقد نسخه لطرف الاول ونسخه لطرف الثاني.

ضروري تاخذ نسخه من العقد .