السلام عليكم ورحمه الله





كيف حالكم عساكم طيبين



المهم مالكم بالطويله , موضوعي مجرد استشاره و اكتساب خبره



انا تخرجت من الثانويه بنسبه 87% علمي قبل 4 سنوات واللحين عمري 21 سنه .

اول ماتخرجت من الثانويه دخلت كليه الملك عبدالعزيز الحربيه لكن للآسف ظروف حالت بيني وبينها و سحبت ملفي بعد القبول النهائي و داومت في الكليه شهرين

بعدها جلست عاطل إلى السنه اللي بعدها و انقبلت بـ جامعه الملك سعود سنه تحضيريه

و درست ترم لكن للآسف رسبت بكم مآده و الترم الثآني رسبت بكم مآده و تراكمت علي المواد و درست ترم صيفي ولا عديت و اللحين جالس عن الجآمعه ما اداوم

آحترت و ضآعت بي الفرص و جآني القولون بسبب القهر و الحسافه على آني ضيعت كليه الملك عبدالعزيز الحربيه والله ياجماعه الخير شعر راسي بدأ يتساقط من القهر و بديت اكل حبوب للقولون العصبي من القهر و الوسوسه و الحسافه و صرت آجلس لحالي ولا اطلع من البيت ولا لي خلق للناس و الحاله مايعلم بها الا رب العالمين

فـ اللي ابيه منكم نصيحه لـ واحد مثلي بـ هالوضع حالياً وش يسوي ؟

لا تقولون خذ دورات حاسب و انجلش ما توكل عيش بهالزمن

آحول دبلوم كليه المجتمع ؟ هل تخصصات الدبلوم مرغوبه في التوظيف ؟

اكمل درآستي برا على حسآبي ؟ ولو انها مكلفه وانا غير مقتدر مادياً لكن ماعندي مشكله لو اتسلف بس آبي شهاده و وظيفه

يآليت احد ينصحني و يدلني و الله اني تآيه و السنين والايام تمشي و كل كلمته بسلم عليه قآل هاه ماتوظفت ما تخرجت إلخ , من هالاسئله اللي تجيب الهم و الشكوى لله

[align=center]الله يوفقك وانا اختكم ومتخرجة من 4 سنين

وماجبت معدل ادخل الجامعة-كانت نسبتي 67

كل الجامعات رفضوا وكان قدامي فرصة بجامعة الامام بفلوس 3000 دورة تأهيلية

ثم دخلتها ترم ونجحت وصرت رسمية بالجامعة وكان حلمي ادخل اصول دين
وقالوا اللي تجيب 80 بالمية تختار بكيفها اي قسم


ويوم جينا نسجل قالوا معليش اكتفينا قدامكم شريعة وعربي-تخيل تقرر مصير حياتك بلحظة وفجأة


وسألت البنات حولي وش ادخل وش اسهل قالوا شريعة وانا كان عندي رغبة واحب العربي


لكن قدر الله واخترت شريعة ورسبت بالمستوى الاول 4مستويات ثم المرة الخامسة

نجحت بكل مواد مستوى اول وحملت الفقه ورحت لمستوى ثاني


لكن رسميا انا مستوى اول لان معي مادة فقه ثم سحبت ملفي وقعدت سنتين بالبيت

السنة ذي سجلت بدبلوم حاسب 6شهور وبسجل تعليم عن بعد بالامام ب2500


حلمي اكون طالبة منتظمة بأي جامعة ..



.................................................. .....





بالنسبة لك اخوي ... اشوف فرص الشباب اكثر من فرص البنات

ممكن تشتغل بالتجارة ولهم مكاسب ماتتخيلها

اختي توها متخرجة العام وبدت تجارة هالترم ... تشتري بضايع من مندوبة او تاجرة ساعات

ملابس .. عطور اي شي بقيمة بحدود ميزانيتك 500 -الف الفين ممكن تبدا من الصفر بدين وسلف وترجع لهم الفلوس ولك مكب اكبببر


وفيه تاجرات كثير فيهم خير

وتصرف البضاعه عن طريق البلاك بيري -تطلع بن خاص بالشغل وتنشره

والله المكاسب ماشاءالله اضافت للحين 3000 جهة اتصال تبارك الله -ماشاءالله

شحن البضايع ممكن يد بيد من التجار وممكن عن طريق البريد وممكن عن طريق الشحن

شركة فديكس او غيرها

البنت في البيئة المحافظة تشتغل بحدود لكن بالنسبة للشباب المجال اوسع بكثيييير


ارسلي خاص لو تبي تفاصيل اكثر او ارقام تجار ومندوبين او مندوبات



ممكن تشتغل تجارة وتدرس وهذا شي مهم وضروري

عندك جامعة الامام فيها دبلوم 6شهور يفيدك بالتوظيف -البنات انتهى التسجيل

لكن العيال اتصل عليهم هنا

http://www.imamu.edu.sa/colleg_in***/colleg/IT/deploma/PublishingImages/m12.jpg

وممكن تدرس عن بعد مجال يناسبك وتحبه وتعرف قدراتك ورغباتك

وتسجل بجامعة تعليم عن بعد -جامعة فيصل -الامام -الجامعة السعودية الالكترونية

اسأل عن جامعات الشباب تعليم عن بعد وشوف



شوف هالكتاب تعرف قدراتك اكثر

http://www.4shared.com/office/6eIykvWp/_____.htm



وفيه وظايف كاشير بمحلات الشايع ب6000 لو تبي



مهما كانت ظروف الانسان باقي أمل بالحياة وتفاؤل .. بالحياة


وبالمكتوب عند ربنا



الرحيم اللطيف اشياء جميلة تنتظرنا .. ثقوا بالله العظيم

حرام صحتك تروح عشان اشياء مكتوبة من الرحيم بعباده سبحانه وكلها خير


في الحديث (المؤمن أمره (كله) خير ..

قال رسول الله صلى الله عليه وسلم: (عجبا لأمر المؤمن إن أمره كله خير


وليس ذاك لأحد إلا للمؤمن ، إن أصابته سراء شكر فكان خيرا له


وإن أصابته ضراء صبر فكان خيرا له)



علينا الرضا والصبر والاستمتاع باقدار الله الرحيم اللطيف




الله يوفقكم ويرزقنا وياك بالوظيفة المناسبة الكريمة باقرب وقت



فيه فرص عمل تجارية او وظائف بالقطاع الخاص ثانية -اتمنى من الاخوان يفيدونا[/align]

[align=center]
: : :

: :

أخوي دام أنك من أهل الرياض ..

أنصحك تدخل جامعة الأمام ـ تخصص ما فيه سنة تحضيرية ـ ..

و أتوقع عندهم تقديم للفصل الثاني , و ب هذي الفترة حاول تطور نفسك بالأنجليزي ..

الله يوفقك ويسهل لك أمممرك ..
[/align]

اخوي اول شي صل ركعتين ووكل امرك لله ..

اما بالنسبه لوضعك الحالي انا اشوفه عادي انت توك
ماشاء الله عليك صغير العمر وقدامك وقت طويل تفكر فيه
انا انصحك انك تدخل معهد الدراسات اللي بالظهران ترى
ممتازه مدة الدوره طبعا دراسه مدتها 3 سنين او سنه ونص
عندهم والباقي في بريطانيا تدرس على حسابهم واذا خلصت
ترجع السعوديه برتبه وكيل رقيب فني طيران ..
والله يوفق الجميع ..

المشكلة فيك لا تضيع اكثر مما ضاع الايام تمشي بسرعة توكل على الله واصبر مافي احد بينفعك الا وظيفتك والوظيفة ماتجي على طبق كلنا جربنا الجامعة دواماتها الزفته والامتحانات والتعب والارهاق وبالاخير نجحنا ونسينا كل شيء مر علينا
بالجد والاجتهاد تحصل اللي تبيه حنا في زمن المعلومات والتكنولوجيا والصناعه والطب اختار شيء قريب من نفسك وبحاجة له بلدك ابتعد كل البعد عن التخصصات التعليمية او التربوية

واذا كنت مو مال دراسة ابد عندك العسكرية وعندك القطاع الخاص وبالتوفيق

مووووووووووووفقة يااااااااااااااااااارب

اخوي انت تقول ما مشيت في الملك سعود اجل كيف تبغى تطلع برى وتدرس
وترى كل انسان له قدرات وعنده توجهات ما ابغى اتفلسف عليك بس من جد مو كل الناس لازم يمشون في الحربيه ومو كلهم لازم يمشون في الجامعه يعني واحد ما يمشي في الحربيه يمكن يمشي في غيرها وواحد مايمشي في الجامعه يمكن يمشي في غيرها
الزبده انك لا تشيل هم يارجال وشوف نفسك وش تميل له وسوه ان كان تميل للدارسه فحطه في راسك وشوف اي جامعه غير سعود الجامعات واجد وان كان نفسك عافت الدراسه شوف لك اي شي ثاني
محاكيك موظف حكومي جديد بس ما تاقلمت مع جو الوظيفه ولا احس نفسي فيه لذلك قررت اكمل ماجستير وبعدها بروح للجامعه محاضر اربع خمس سنوات يعني اجمع لي راس مال وبعدها بانطلق باذن الله في التجاره
المقصد ان الواحد يمكن ما يتاقلم مع الجو الي هو فيه مثلك يوم تقول رحت الملك عبدالعزيز الحربيه وبعدها خليته عادي يعني مثلي انا الان موظف حكومي وباترك الوظيفه عشان اكمل الماجستير مع ان الوظيفه كانت حلمي وكنت ابي اتزوج مع الوظيفه ومن الكلام ذا بس لما جيت للوظيفه ما تاقلمة وقررت اكمل الماجستير واجل الزواج الى ان استقر

تقديم الكلية التقنية يبدأ18/12/1433إلى 7/1/1434توكل على الله وقدم
بالتوفيق